《陌樂偈》第43天-巴士司機的靈異經歷

https://www.facebook.com/ChatToStranger/photos/a.1840651986217877.1073741832.1816209411995468/1955832824699792/?type=3&theater


晚上,剛從巴士總站下車,走路回家途中
發現一位年約30的先生,獨自坐在路邊
跟大多數現代人一樣,如痴如醉地看著電話
我帶著100點的勇氣值,站到他身旁
進入了每場陌樂偈必經的【猶豫還節】
在這個還節中,腦袋會不斷發揮想像力




為自己製造「不要開口的十萬種原因」
 
「他可能不想被騷擾」「他可能很趕時間」
「他應該差不多走了,都傾不了多久吧」
「天氣有點涼,在這種傾偈會生病嗎?」
 
而以上種種理由,通通都是藉口
是人類的「自我防衛機制」
或者說,是「自我否定機制」
 




你也有類似的經歷嗎?
想做一件事情,但腦袋裏不斷出現各種原因
說服自己不要去做,結果真的沒有去做
 
所以,如果你真的想做到某件事
最簡單的方法,就是不要想太多,直接做!
 
那時候的我,當然沒有想得這麼通透
猶豫了差不多十分鐘,才脫離了這個環節
然後,進入下一個環節-【開場白環節】




 
這個環節,其實是一場攻防戰
我要作出進攻,令陌生人放下戒心跟我傾偈
對方則要作出防守,拒絕跟我傾偈
 
作為進攻方的我,有「勇氣值」來描述狀態
作為防守方的陌生人,也應該設定一個數值
我稱之為-「抗拒值」
 
開場白就是武器,對能否順利進攻,舉足輕重
始終每個人也很重視第一印象,對吧?
 
 
上一篇經歷,介紹了我的全新開場白
今次,是使用在雄性身上的版本:




「先生你好~」
他的眼睛終於離開了電話,茫然地望向我
他現在的「抗拒值」,是正常水平的100點
 
「我做緊一個計劃 ,係每日搵一位陌生人傾偈,我唔係Sell嘢、唔係傳教⋯⋯放心,我都唔係Gay嘅~我可唔可以同你傾下偈?」
 
這個開場白最厲害的地方,
是我一臉認真地說出自己的計劃時,
突然在最後幽他一個默,
讓整個現場氣氛瞬間變得輕鬆
 
(注意!本人沒有任何歧視或取笑同性戀者的意思,這句說話只是陳述本人並不是同性戀,放下對方會想「或許他是想追求我」的戒心,正如我會跟女士說我有女朋友一樣)
 
聽完我的全新開場白後,他輕輕一笑
抗拒值由100點下降到80點




依然有點保留地問:「傾咩先?」
 
除了直接拒絕我的人外,大部分陌生人都會問我:
「傾咩先?」
正如偉大的日本武術家-孫悟空先生曾經說過:
「同一種招式,對我使用第二次是無效的」
對這條問題,我已經有了充足的準備
 
其實本身這條問題,是極難回答的,因為我跟每一位陌生人傾的話題都是不一樣的。至於今次傾咩,其實要視乎對方想傾咩,但一日未開始傾,又怎知道對方想傾咩呢?
 
所以,其實我不懂回答這條問題,那如何在不懂回答這條問題的情況下成功回答這條問題呢?今天,就讓我把這個苦練了四十多天的秘訣傳授給各位!
 
 
 
秘訣就是⋯⋯




 
 
 
 
 
 
 
 
 
 
 
 
 
 
 




岔開話題!
 
 
 
 
 
「你係咪等緊人?」
「唔係,我開緊工」
成功了~千萬不要停下來!
 
「咁夜仲開緊工?你做邊行㗎?」
「揸巴士」
「哦~你係巴士司機嚟嘅,而家休息緊?」
「係呀,啱啱食完飯,除咗件衫」
 
「你哋每程車之間可以休息幾耐?」
「每轉休息15分鐘,食飯就一個鐘」
「你揸咗巴士幾耐?」
「6-7年」
 
傾到這裏,對方已經完全墮入了我的圈套
他接二連三地回答著我的問題
已經忘記了最初打算對我作出的質疑和提問
他的抗拒值慢慢由 80 下降至 30
 
(注意!必須問關於對方的問題,才會有效!
假如我問他:「一個農場內有八隻雞、七隻鴨、六隻豬、五隻牛,還有一個農夫和他剛懷孕了的太太,問農場內的所有動物,哪一隻跑得最快?」他的抗拒值,肯定像大奇蹟日的股價一樣極速飆升!)
 
 
當抗拒值逐漸下降,便能進入真正的【傾偈環節】
「你點解會做呢份工嘅?你本身好中意巴士?」
「冇咩特別感覺,都係為咗搵錢啫~」
「以前有冇做過其他工?」
「揸過貨車,揸巴士輕鬆啲、穩定啲、冇乜壓力」
 
「你最憎邊種乘客?」
「有時啲車脫咗班,或者塞車遲咗,一到站某啲乘客就會問候個車長,當然會問候埋我哋屋企人。架車遲咗我哋都唔想㗎,㗎車遲咗關我屋企人咩事先?」
「我都好睇唔起呢啲人!根本都唔關個車長事,鬧佢做乜啫?佢哋只係為咗發洩自己嘅不滿,就搵個人嚟鬧,真係辛苦晒你哋~」
 
我繼續說:「作為乘客呢,我就最憎啲唔肯行入去嘅人,都唔明點解啲人係都要塞晒喺車頭度,後面啲人點上車啫?」
「佢哋剩係想自己企得舒服丫麻,理得人哋上唔上到車丫,到自己上唔到車嗰陣,又會覺得人哋塞住晒,一句講晒啦-人類都係自私嘅~」
 
「揸咗咁耐,有冇遇過靈異事件?」
他馬上回答:「有~」
「講唔講得㗎?」
「講得~有一晚收工,熄晒燈揸緊返廠,明明check過晒架車冇人,突然間有人撳鐘⋯⋯嗰陣好驚咁同自己講,個鐘壞咗啫,跟住熄返佢⋯⋯點知過咗一陣,個鐘又自己著返⋯⋯」
 
我屏住呼吸問:「咁你點算?」
「我即刻埋站停一停車,開一開車門,開返晒所有燈先開車走,之後個鐘就冇再著過」
「呢啲經歷成日都聽人講,原來真係有㗎?都幾恐怖~」
「不過個鐘有時凳一凳都會自己著嘅,所以都唔知㗎,可能真係壞咗呢?」
 
我正打算問他還有沒有其他經歷
我未開口,他已經繼續說下去
看來他的抗拒值,已經跌到0
 
「仲有一次,又係熄晒燈揸緊返廠⋯⋯突然間⋯⋯聽到嗒⋯⋯嗒⋯⋯嗒⋯⋯嗒⋯⋯聲, 就好似⋯⋯有人喺上層一步、一步、行緊落樓梯咁⋯⋯啲腳步聲愈嚟愈近⋯⋯落到最底之後,就消失咗⋯⋯我驚到完全唔敢望後面,唯有當冇事發生,繼續專心揸車⋯⋯」
 
我睜大雙眼,張開嘴巴,繼續聽他說下去
 
「靜咗一陣之後,我開始隱約聽到⋯⋯身後面有一把女人嘅呼吸聲⋯⋯啲聲越嚟越近⋯⋯越嚟越埋⋯⋯慢慢嚟到我耳仔邊⋯⋯嗰陣真係嚇到個腦一片空白⋯⋯」
 
聽著他描述,我的腦袋也接近一片空白⋯⋯
 
「突然間!有人拍我膊頭!」
他突然把手用力放在我的膊頭上!
使我嚇了一跳!
 
他突然轉換語氣說:
「嚇一跳!原來係人嚟嘅~喺上層瞓著咗冇落車啫~頂佢個肺,真係畀佢嚇死!」
頂你個肺,我都真係畀你嚇死!
 
「咁最後點呀?佢喺邊度落車?」
「最後咪車埋佢返廠,等佢自己諗辦法走囉~」
「如果佢冇起到身,咪困住咗喺架車度走唔到?」
「巴士廠有人嘅,你喺車入面拍都會有人聽到,同埋落車度門隔離有個制,你識開就開到,再唔係就去響咹」
「響咹,即係軚盤中間嗰個掣,係咪呀?」
「係,就算㗎車冇電都會響嘅」
 
我有時也會因為太累,在巴士上睡著
經常會害怕沒有被人發現,然後被困在車內
今天,又學懂了一項求生技能
 
當陌生人的抗拒值到了0
就可以進入【深入環節】
談及對方真正覺得重要的事情
通常也能夠聽到陌生人的心底話
 
「你中唔中意做呢份工?」
「做到厭晒,日日都做同樣嘅嘢,做到個人好灰,想轉工」 「咁你想做咩?」
「儲夠錢,想同啲朋友搞下小生意」
「希望你好快可以做到」
 
他看一看手錶,站起來說:「夠鐘開工喇~」
難得進入了【深入環節】,他就要走了
只怪自己一開始猶豫得太久,浪費了時間
「多謝你同我傾偈,有緣再見~」
 
他慢慢走向巴士總站,我轉身繼續走回家
我們不知道對方名字,沒有交換電話,就此告別
我們都是陌路人,就這樣傾了一場陌樂偈


https://www.facebook.com/ChatToStranger/photos/a.1840651986217877.1073741832.1816209411995468/1955832824699792/?type=3&theater
已有 0 人追稿