［短篇］香港都市傳說: 傳說一：不能觸碰的四不像（二十二）
「阿良！」一把聲音從阿良背後傳來，感覺非常耳熟。
阿良聽到後，一陣寒意油然升起，全身起了雞皮疙瘩的他，完全不敢回頭。
「阿良……做咩唔應我呀？」那聲音再次響起，並好像帶有魔力般，使阿良慢慢回過頭來。
當他回頭後，他看見的，是半顆頭都破爛掉的阿強，他正一步一步，慢慢的接近阿良！
「阿良，我個頭好痛呀！點解會咁嘅？你……你幫我睇下咩事？」阿強像喪屍般慢慢靠近阿良，在極近的距離下，阿良看見阿強的腦漿不斷的向外湧出。
「我……你……唔好……唔好……」阿良驚慌失惜得連話都說不出來。
而這時候，阿良發現自己手上多了一個鐵鎚，他想也不想便把鐵鎚敲在阿強的頭上。
受了重擊的阿強，立刻便倒在地上。
而阿良仿佛害怕他死得不夠徹底，一下又一下，用盡全身的力氣敲下，直至把阿強弄得血肉模糊，他才停止動作。
然而，那攤血水像有生命力般，又再逼近阿良：「點解你要殺我？點解？」
「呀！！！！！！」阿良再也忍不住大喊起來。
「吁！吁吁！」阿良睜開雙眼，看著眼前白色的牆，才想起自己正在家裏。
「係夢？一定係夢！無錯！阿強已經死咗……」阿良在心裏想著，又想起昨晚在燒烤場發生的事情。
對，沒有錯，他的確把阿強徹底的殺死了！
「阿強……我會代替你，好好生存落去！多謝你！」阿良在心中起誓。
「城大學生XXX疑因讀書壓力……」正在咖啡室約會的Keith和Tina聽到這則新聞。
「阿強佢……走咗啦……」Tina聽到後，忍不住伏在Keith的肩膊上哭了起來。
「係……佢走咗啦……」Keith安慰著Tina，眼睛卻看著手機，不知道在想些甚麼。
「之後……係咪會到我地啦？」Tina抬頭看著Keith。
「嗯……唔駛驚，無論點都好，我都會喺你身邊。就算係死嘅時候，我都一定會喺你身邊，你放心！」Tina聽到Keith這樣說，感到非常甜蜜，卻未曾想到，這句說話，還有另一層意思。
「最後有你陪住我……我已經好滿足。」Tina深情的看了看Keith，給了他一個吻。
「咦……係喎，阿良應該會係下一個，唔知佢依家點呢？」Tina突然想起另一個身中詛咒的同伴。
「佢應該無事嘅。」Keith脫口而出。
「無事？」Tina感到奇怪。
「哦，我係話，佢應該都接受咗個命運。何況，如果佢真係覺得有唔妥，應該會主動搵我地。」Keith隨即編了其他理由。
「咁又係，算啦，唔諗其他嘢啦，我淨係想剩低嘅日子入面，每日都陪住你。就算係……死嘅時候……」Tina甜蜜但帶點悲傷地說。
「放心，就算係死，我都會喺你身邊，一定！」Keith緊緊捉著Tina的手，堅定地說。
然後，時間就這樣過了數天，阿良亦沒有再夢到阿強，一切都變得正常起來。
直到阿強死後第七天。
「阿良，今晚去唔去飲嘢呀？」他的同學向他詢問。
「我……唔去啦，我今日有啲嘢做，你地玩得開心啲啦！下次我一定Join！」阿良婉拒了他們的邀請，獨自回到宿舍。
自從阿強死後，他從二人的宿舍房，遷移到同層的單人房。
回到房間後，他拿出了一盒魚生和一包「紅雙喜」，放在阿強的照片前。
「阿強，多謝你幫我解開咗詛咒，今日係你頭七，我無咩可以為你做到，呢盒魚生同紅雙喜，都係你鍾意嘅嘢，希望你收到啦！」阿良點燃了三支紅雙喜，雙手合十在阿強的照片前說著。
原來阿良所說的「有啲嘢做」，就是回來祭祀阿強的頭七。
雖然阿良狠下心來殺了阿強，但在他心底裏，大抵也是有一個悔咎，所以才會夢見阿強以及做出祭祀的行為吧！
或許，在阿良心底裏，還是有一絲人性吧！
假若處境互調時，面對同樣的情況，你會選擇高潔的死去，還是背負著一生的愧咎而活下呢？
不管怎樣，阿良他已作出了選擇，他亦答應了阿強，會活得更有意義。
原本，一切都應該繼續順利進行下去的……
晚上，十一時五十分，不知道原因，但阿良整晚都感到心緒不寧，就是不想進入夢鄉。
這一個星期裏，阿良都不曾有過這種感覺，難道是殺害阿強的悔咎感在作崇？
「無可能，阿強都講咗佢願意幫我！唔好諗，快啲瞓！聽日仲要測驗！」他在心裏這樣告訴自己。
時間一分一秒的過去，阿良終於沉沉睡去，但他並不知道，他睡著的時間，剛好踏進了「00:00」，亦即是阿強死後的第八日。
「Times up, pens down！」隨著監考的導師聲音響起，阿良知道測驗總算完了，他對自己的表現不太滿意，所以在測驗完結後，他來到圖書館準備溫習下一科的測驗。
在溫習的途中，他感到有點不自然，他好像無法回想起，測驗前所發生的事情。
他也不記得他是怎樣去到課室的，他感到愈來愈困惑，就在這時候，一名漂亮的女生俏然靠近。
「同學，唔好意思呀，我想問你借一借枱上本參考書呀。」那聲音非常吸引，教阿良不自覺回頭，漂亮，比他想像中還要漂亮。
「呀……呀……你，你要呢本書？你攞去啦，我用完架啦。」阿良結結巴巴的對她說。
「多謝你呀，你真係好人呀！係呢，你叫咩名呀？我叫Tracy呀。」原來這名女生就是Tracy。
阿良總感到好像在哪裏聽到這個名字，但又想不起到底她是誰，避免尷尬，只好先自我介紹。
「你……你好，我叫阿良。」阿良說。
「你好，係呢，我見你做咗好多筆記，好犀利呀！我平時好懶，都無咩做筆記，你介唔介意借俾我呀？」Tracy問。
「但……但我仲溫緊……」阿良也不知道為甚麼會拒絕一個美女的要求，但他的本能在警戒著她。
「咁……不如你加我Facebook呀，咁我有問題可以問你嘛。我諗你唔會介意嘅。」那聲音像俱有魔力般，本想拒絕的他，最後也抗拒不了她的邀請。
在拿到Facebook的瞬間，Tracy消失了！
就在他眼前憑空的消失了！
阿良嚇得大叫起來，然後，他才發現他根本不在圖晝館裏，他還是在宿舍。
甚麼測驗，甚麼溫習，都是假的！
然而，阿良回想起夢裏的Tracy，他不安的拿出手機，開啟了Facebook。
果不期然，在交友邀請欄裏，他看到了一個雙眼發出紅光的頭像。
「仆街！」他大喊了一聲，用難以置信的眼神看著那頭像！
第二天，他去拿了一張醫生紙，用作應付沒有去測驗的理由。
然後，他透過電話聯絡了某人，來到他的家裏。
「點呀？又係你呀？今次搵我咩事？」開門的，正是Daniel，而聽他的語氣，阿良不是第一次獨自來找他。
「仆街你係咪坤我？」阿良憤怒的拿出手機，向Daniel展示Facebook裏的交友邀請。
「我照你講嘅，喺十二點前殺咗阿強，點解我仲會夢到果個咩Tracy，仲會收到呢個交友邀請！你係咪呃鳩我呀仆街！」阿良控制不了，在大門前大吵大鬧。
「屌！你咪撚咁大聲啦，入嚟先講！」Daniel把阿良拉進屋內，兩人面對面坐著。
「講呀！點解會咁呀！你又話殺咗有詛咒嘅人就會無事！我殺阿強之前仲特登搵你確定！你係咪坤我呀仆街！」阿良失控了，但這也難怪，由絕望變成擁有希望後，又再一次墮進絕望，正常來說也會失控吧。
Daniel冷靜地呷了一口咖啡後，便說：
「你肯定有跟足我指示，喺十二點之前殺死阿強？」
「梗係啦！我驚殺佢唔死，將佢半個頭打到爆開咁滯！我之後睇過電話，喺『00:01』，即係我呢個時間前就殺咗佢啦！」阿良說。
「呢個時間前？咁你即係唔肯定係咪『23:59』或之前殺佢啦！我咪講咗囉！你一定要係時間到之前殺死佢，就算你搵槍射人嘅大腦或者心臟，都唔係果一秒即刻死！所以時間係好重要，你拖到咁遲，好大機會佢係俾詛咒殺死而唔係你殺佢！」Daniel冷靜地解釋。
阿良冷靜回想當時的情況，的確在他敲下鐵鎚前，阿強好像已經失去了意識一樣。
而在敲中他的頭部時，連一絲一毫的反應也沒有，難道……
「唔通我……真係無喺十二點前殺死佢……」阿良懊悔地說，他不但對阿強做出這樣的事情，最終還未能成功解咒，雙重打擊下，阿良感到徹底絕望。
「咁你又唔駛咁傷心，你應該仲有兩個目標架？」Daniel冷靜地提醒他。
「目標？」阿良雙眼重燃出希望，而且更帶有濃厚的殺意。
「無錯，既然你做得一次，無理由做唔到第二次架？呢個係你最後機會！」Daniel在一旁推波助瀾。
「最後機會……無錯……最後機會！」阿良這樣想著，便離開了Daniel家裏，而目送他離開的Daniel，則露出了詭異的笑容。
「Keith？無錯，阿良嚟咗搵我！佢應該會約你出去架啦！嗯，無錯，佢失敗咗，你應該都知道架？你果日偷偷地去咗佢地宿舍，仲跟踪阿強，你應該知道佢殺人果陣超過十二點架啦？哈哈，唔好咁講，我只係想幫你地。不過，你殺咗阿良嘅話，你女朋友就要等死架啦！哼，果然夠狠！好好好，反正我只係提供方法俾你地，你想點做我都唔會過問！好，拜拜！」Daniel掛斷電話，安坐在家中，等候著事情的發生。
而阿良在思考了一段時間後，在詛咒的最後一天時，他約了Keith晚上十一時在宿舍旁的石硤尾公園碰面。
這次，阿良決不會再次失手！
Keith也準備好一切，到底，他們兩人，誰才能生存下來？