黃鼠狼特務II 赤地(搬家原故,本站停止更新): 章二:冬眠
-------------------黃鼠狼特務II 赤地------------------------
-----------------------章二:冬眠--------------------------
香港 晨市大學
幾個學生趁午飯時間還未結束,躺在四樓的一排沙發耍廢.此時他們看到一個胖子跑了過來,東搖西擺的走姿挺具喜感.
「喂大家我有正嘢分享~」胖子見附近有人走過,壓低聲線說:「係政府內部機密文件,琴晚先披露出嚟嘅.」,眾人聽到後面面相覷,然後笑起來.
「咪戇鳩啦,邊個夠膽咁做喎...」
胖子確定沒有其他人看到,才從口袋取出一只USB:「D文件係Woodpecker披露㗎.我第一時間就將文件back up,同你地分享~」
「Woodpecker?嗰個駭客組織?」
「冇錯,聽講D文件係關於漁~夫~㗎~」胖子在說到''漁夫''兩字的時候提高了聲調.
「仲講咁多快D俾嚟啦.」其中一個遞手要USB,突然一隻手出現把USB搶去,是剛剛在商鋪買完東西,路過的區可頤.她一本正經道:「Really??你地想惹屎上身?知唔知俾人捉到好大鑊㗎?」
「我地作為市民有責任了解社會事㗎!攞返嚟啦區可頤!」
「係有責任知道,定係單純''想''知道㗎咋?」區可頤抱手在胸前:「你地根本唔關心政治,只係想食花生睇戲之嘛,am I right?」
「.........」眾人無法反駁,唯有以沉默結束話題.
演講廳 充滿修讀社會心理學的學生 區可頤不時望望剛剛拿到的USB,思索著甚麼.
「上堂講過,John Darley同Bibb Latane兩位心理學者曾經做過嘅一個實驗,發現原來目擊者會否向受害者伸出援手係同在場有幾多目擊者有關係.」台上的陳教授托托她的方框眼鏡:「同今日嘅香港雷同,每當有狀況發生,大家都理所當然認為會有其他目擊者出嚟解決事情,自己就可以縮埋一邊.呢種效應叫責任分散,當目擊者越多,責任感就越分散.相信大家對上個月嘅地鐵縱火案仲有記憶?」
學生紛紛點頭.
「發生事故嘅時候,大部份目擊者有乜反應?首先當然係影相啦~難得見到有個就被火燒死嘅人喎~」陳教授苦笑説.
「覺察,理解,責任,判斷,行動....係助人五階段.大家又屬於邊個階段?」說到這裡,陳教授看一眼在撰錄筆記的區可頤.
「教書多年,我見到年青一代好有抱負,渴望改變,創新,直至天幕事件發生後.....香港不知不覺咁踏入''冬眠時代''.」陳教授清清嗓子,提高聲線道:「在座有幾多位仲記得雨傘運動時候,仲係中學生嘅你地嗰種奮鬥嗰種意志?」聽到這句,區可頤輕聲回應:「我仲記得.....」
「John Stuart Mill講過寧做不快人,莫做痛快豬.」陳教授話未完,現場就傳出一道嘻笑聲,只有區可頤和幾個學生沒有跟著笑.
「我最討厭嘅就係D唔成熟嘅人,特別係男仔,Come on....已經係大學生喇...」區可頤向那群小孩予以蔑視,被揶揄的人顯然不是味兒.
鐘聲響起,弄醒了熟睡的傢伙,他們看到這裡只剩下幾個人,狼狽地拔腿離開.執拾好教材的陳教授,趁區可頤還未踏出門口叫住她:「區同學,你過一過嚟.」
「可頤.....恭喜你成功通過左審核!可以用學術研究嘅名義去監獄接觸囚犯.」陳教授把許可證明展示在區可頤面前.區可頤摀住嘴巴,不敢相信:「Oh my God!太好喇!」
「不過要謹記我俾你果份守則喎,唔好到時犯左乜錯俾人趕出去.」
「多謝教授!我一定會好好完成份報告~」
「聽講你想採訪嘅對象,以前同你同一間中學?」
「嗯....聖母會高照中學...」
-----------------------------------------------------------------------------------------------------------------------------------------------------------------------------------------
壁屋監獄的飯堂,囚犯們排著隊等候取餐.
「下一個.」懲教人員叫著,排在後面的秦世樂上前領餐,卻被牆上掛著的電視吸引視線.
「聲名狼藉嘅私刑者霜寒仍然在逃,香港政府同多國達成協議,一旦成功將犯人逮捕,會將犯人引渡回港交由香港警方處理.要綫電視記者張仁彩報導.」
「攞完就走啦,後面有好多人等緊㗎!」懲教人員向秦世樂罵道,這時秦世樂才發現後面已經排了長長的人龍.
「Sorry.」秦世樂把目光放回到手上托著的飯菜,想在擠滿人的飯堂找個空位.那個昨天入獄,手臂粗壯的金髪男子,他霸佔了整張桌,不讓他人接近.
「想問下呢度有冇人坐?」他問.
「張枱我㗎,知冇?」金髪男子攤開雙手,拍拍枱面:「過主啦~」
秦世樂四盼周圍也沒有其他空位,便直接坐下.金髪男子不由得愕住了.
「好.....好....」金髪男子打量一下秦世樂瘦小的身軀,嘴角戚起笑了笑.秦世樂無視他的舉動,專注在自己的午餐上.
「喂~」金髪男子撥動秦世樂的頭髮:「你咩字頭㗎?」,見對方不理會,他弄走秦世樂手中的筷子:「我問你嘢呀!」
此舉動引起了其他囚犯的注意,他們紛紛望向金髪男子,眼神帶點不安.
「大家放心!我唔會欺負弱小嘅!!!」金髪男子像對待寵物狗般拍拍秦世樂的頭:「只要你地乖乖地~順從我~」
「新嚟嘅...」後面一個囚犯向金髪男子語重心長説:「我地呢度一直都好和平,冇人打交,冇人搞事,想唔想知點解?」
「關我撚事?」金髪男子走到他面前,不把他放在眼內.
「因為大家唔敢.」那個囚犯道把目光移向正在專心吃飯的秦世樂.
「你地居然會怕呢個瘦猛猛嘅細路?一睇就知係無名小卒嚟㗎咋!!!哈哈哈哈哈~」
那個囚犯盯住金髪男子,表情嚴肅:「你口中呢個無名小卒,曾經一丁友闖入監獄將全部囚犯同獄警殺撚死哂.你想招惹佢嘅話,首先要諗定遺言.」
「咩話?」金髪男人回頭望向秦世樂幼嫩的樣子,怎樣也不相信他所説的話.直至看到其他囚犯微微做出「不」的手勢,他才乖乖坐回原位,安靜吃飯.
在這裡待了兩年的秦世樂,已經習慣失去自由的生活,每日除了清理打掃之外,還要上監獄設立的課堂,接受定期的心理評估.然而這些也沒有讓他忘記當日,他在憤怒驅使下闖進監獄,把周乙丙拉到烈日下的操場:
''呢對,係你做壞事,洗黑錢嘅污糟手.''秦世樂掏出手槍朝周乙丙的手掌各開一槍.
看著他慘叫一會兒後,秦世樂才朝他的左右腿各開一槍:''呢對,係你踐踏平民嘅狗腳.''
再等他慘叫一輪,便把槍支塞進他口內:''呢把,係你是非不分,滿口謊言嘅臭口.食子彈啦.''
''唔好呀!!唔好呀!!!''即使嚎叫,也無濟於事.秦世樂扣動板機,給予他致命一擊————————
「秦世樂,有人嚟搵你.」懲敎人員的一句把秦世樂從回憶拉回現實.他被帶到一間只有木桌和椅子的房間,裡面等著他的,是區可頤.秦世樂見到她,淡淡的説一句:「好耐冇見喇,區區.」,說完就忍不住笑.
「No....呢個花名聽起嚟真係幾尷尬....」區可頤吐糟道:「不如叫返我做區可頤.」
「點解突然走嚟搵我.」秦世樂拉開椅子坐下,嘴還在敝笑.
「我要做一份關於私刑者嘅研究,交俾學校嘅....唔知你介唔介意....?」
「你叫得嘅我一定幫.」秦世樂微笑道:「我已經放低左,都好樂意同你分享.」
「多謝哂你~」
「唔駛.」
「咁.....不如你由成為私刑者嘅因由講起先?」區可頤掏出記事簿和原子筆.
「OK.」秦世樂注意到記事薄由第一頁開始,字的墨㾗猶新,字跡也完全相同,似乎.......是同一天寫好的.他疑惑地望一望區可頤,再快速收回視線.接著,秦世樂開始講述他的故事,區可頤也在旁邊記下重點,就這樣過了約莫十分鐘.區可頤看看手機介面,剩下的時間不多了.
「仲有一樣嘢...」區可頤蓋住記事簿,偷瞄一下守在旁的懲教人員,再把臉靠近秦世樂,壓低聲量道:「係關於漁夫.」,秦世樂聽到後開始覺得不尋常:「漁夫....同你嘅研究有咩關係?」
「從你地之前披露過嘅文件當中,我見到''天城騎士資格者''嘅字眼.究竟係乜嚟?」
「除左研究報告之外,你仲有其他目的....」秦世樂冰冷的眼眸,令區可頤本能地移開目光.
「你今日係以乜嘢身份嚟搵我?中學同學?大學生?定係.....」秦世樂把剛才的種種異樣連結起來,得出了一個結論—————————
「幫下我丫秦世樂,呢樣對我嚟講好重要!」
「走.」秦世樂冷不防説出這句.
「既然係咁.....」區可頤見他如此反應,也無謂勉為其難:「唔該哂你.」
「話哂係中學同學,做乜趕走人?」懲教人員看著區可頤氣沖沖的離去便説.
回到牢房,秦世樂在床上想了又想,從床底拿了一台小型通訊器,撥撥上面的灰䴤,輸入:「nice to meet you again.」
過了不久,對方回應了:「Lets talk.」
-------------------------------------------------------------------------------------------------------------------------------------------------
蘇格蘭 某小鎮
民居旁的河邊,站著一個上身穿著粉色寛鬆T-Shirt,下身穿著裙褲的少女.她掏出兩把金屬製匕首,看著刀面的倒影上,染滿血的面容.
「再見喇....以前嘅我...」她狠狠把兩把匕首丟到河裡,噗的一聲沉下河底——————她看了看河面上自己的倒影,順眼多了.
「蛋糕整好啦!」一把沙啞的聲音從民舍傳出,馮佩妮聽到後立刻回應:「係~」
老婦人戴著手套把熱騰騰的蛋糕從焗爐取出來,坐在嬰兒桌的悦萌目不轉睛的看著蛋糕,兩隻小手看像要把整個蛋糕拉過來一樣,十分逗趣.
「自家製鄧迪蛋糕~」老婦人滿有成功感地說.
馮佩妮幫忙準備餐具,亦跟剛剛起床,老婦人的英國人丈夫Michael説早晨.
「老婆原來你咁早起身,就係為左整蛋糕?」Michael意想不到的望著她.
「我都有份幫Anna整㗎~」馮佩妮説.
「為左紀念我地結婚50周年~」Anna給Michael臉上一個吻,再擁抱他.
「哈哈~老婆你咁多年嚟都係咁浪漫.」
馮佩妮看著他們倆,把他們幻想成自己和韓傲清,兩人抱擁的幸福畫面.
兩夫婦注意到馮佩妮的神情,互望一眼.
「Cindy.....過去左嘅事....就由得佢過去啦.」Michael道:「即使你男朋友唔喺度,佢都以另一種方式陪伴緊你.」他整理悦萌頭上的蝴蝶結頭飾,露出滿意的笑容.
「冇錯.」馮佩妮也望望悦萌,把她當成韓傲清的化身:「佢依然陪住我.」
「緣份係一件好奇妙嘅事情,我地兩公婆結左婚咁耐都生唔到BB.而妳同悦萌嘅出現,帶俾我地好多...好多歡樂.」Anna道.
馮佩妮邊淚邊笑,彷彿擁有了全世界.
「一切都要多謝姜總警司.」馮佩妮口中的姜總警司,是一年前協助她逃到英國,並把她交給這對夫婦照顧的人.
「係....我地要多謝佢.當年如果唔係老傑,我都離開唔到香港....唉,咁就過咗五十年喇......」Anna想起舊日的老朋友,姜思傑;此時彼地,姜思傑正對著一具被冰層覆蓋的屍體陷入沉思,旁邊不斷呼叫的聲音他也聽不到.
「喂!!聽唔聽到呀??快D同我走返出嚟!!」警長刺耳的聲音終於使姜思傑回過神來,才發現自己剛才不知不覺走進了案發現場,便立即從警戒線走出來:「Sorry sir.」
「你!去幫手擋住班狗仔.」警長指著案發現場附近一堆想衝進現場拍照的記者,他們拼命拿著攝影機拍拍拍,務必把第一手資料拍攝下來.姜思傑納悶起來,最後也不得不守在門口,跟幾名警員一起作肉盾,抵擋如同喪屍般的記者.
「警長警長!!上一宗命案嘅死者都係俾冰層冰住,想問今次案件係咪又同嗰個私刑者有關呀??」
「傳聞話霜寒開始對無辜平民落手,警方有乜嘢睇法呀??」
「班友真係好撚煩....」警長顯得不耐煩,朝那群記者喝罵:「收埋把臭口,死返出去!等陣警方就會向你地交代現場情況!得未??」
那群被嚇呆的記者不再發問,乖乖遠離案發現場.
「沙展.」一個巴基斯坦裔警員步到警長身旁:「發現到疑犯嘅蹤影.」,在旁的姜思傑聽到後,猛地瞧向警員手中的平板電腦.
潮濕的窄巷,一個戴著面罩,背着背包的男子被幾個警察追著.他一手觸碰牆壁,牆壁立刻起了冰面伸延至地面上,弄得追來的警察滑倒在地.他跑到熱鬧的大街上擺脫追捕,再躲進後巷匿藏.見那群警察在眼前走過,才鬆一口氣.
「顏影寒.....好耐冇見喇....」旁邊走出一個人,是姜思傑.男子瞟了一眼他的襯衣上無徽識,只有編號的肩章,諷刺道:「有乜貴幹丫....姜總警司?...」
「今個月第二宗同類型嘅命案,屍體都被凍結.」姜思傑沒有理會對方的嘲諷,一本正經的說.
「你覺得係我做嘅?」
「呢個世界有異能嘅人唔只你一個,我相信兇手唔係你.只不過我想知,點解你會返嚟香港?」
顏影寒用幽深的眼眸回應姜思傑,轉身離開.
「我知道你討厭我,係我間接害死你嘅同伴.....求你,俾我一個贖罪嘅機會.....」姜思傑道:「我答應過秦世樂,要保護你地.」
「..........」顏影寒想起昔日一同作戰的同伴,不禁慨嘆:「我收到情報,紅槍客最近同泰國特務合作將狄光欣捉走左.而執行任務嘅殺手,係嗰個人.我終於知道條友有個稱號叫''騰蛇''.」,他一想到那個穿著紅色西裝的殺手,巴不得馬上把他折磨至死.
姜思傑做出''請''的手勢,示意他繼續.
「黑曜都一樣,俾騰蛇捉走左.」
「你打算去救佢.」姜思傑約莫知道他口中的殺手的實力,便説:「憑你一人之力?」
「黑曜係我嘅同伴,我一定要救佢!!」
「佢地都將我老婆由我身邊搶走!!我好希望可以查清楚呢一切!!天幕計劃,天城騎士資格者,紅槍客,漁夫乜嘢都好!!」姜思傑激動道:「而依家我只係個任人差讉嘅巡警!!!俾人點嚟點去沖咖啡買外賣!!兩年喇!!!我仲未可以走入會議室,冇權限!冇機會去查任何嘢!!」他把積聚已久的憤怒全部爆發.
顏影寒等待對方冷靜下來,才回應:「因為知道你同黃鼠狼合作過.」
「........」
「出發啦.」聽到顏影寒這一句,姜思傑猛地抬頭,接著對方再說:「你仲有幾多彈藥?」
「六粒子彈.」姜思傑望望他腰間的S&W M10左輪手槍.
--------------------------------------------------------------------------------------------------------------------------------------
姜思傑率先踢開木門,舉槍走在前頭.顏影寒跟隨在後,探探周圍的環境.
屋內除了他們兩人外,沒有其他人.
「睇下.」顏影寒留意到剝落的牆紙上掛著的合照,從面容辨別到,抱著小孩的是騰蛇.可是相片上的他滿臉甜蜜的笑容,毫無殺人時的戾氣.
「你確定佢係你要搵嘅殺手?」姜思傑問,只見顏影寒把目光移到檯燈旁邊的打字機,姜思傑見他如此入神,從嘴裡擠出一句話:「年輕人,呢部叫打字機....以前...」
「我知,你地D大人唔好成日當我地白痴先得㗎....」顏影寒拿走打字機上的電報.
''-4.771983, 55.956476''
「睇落似係座標嘅數字....究竟係邊度....」顏影寒腦海充滿疑問:「又乜解呢間屋一個人都冇?」
「弊喇....」姜思傑焦急的掏出手機,查詢這串座標指的是何處,看到查出的結果是位於英國蘇格蘭的小鎮格里諾克之後,一臉不安.
「做乜?」
「馮佩妮同悦萌就住喺呢度....」
兩人拔腿離開此地.誰料到,門外已經有一群飛虎隊隊員等著他們————————
「點解...」姜思傑見到此景愕了一下,為甚麼他們的行縱暴露了?
「係我地蠢...中左佢地嘅計....」知道自己被耍的顏影寒只感到滿滿的不忿:「故意放假消息引我返香港.」
「捉住佢地兩個.」從中間走出來的人,曾經是姜思傑的下屬,現在則是飛虎隊指揮官.
「咪阻頭阻勢!」顏影寒緊握拳頭,準備施放異能,卻被突如其來的一針刺中肩膀——————————他全身發軟,雙膝跪下.
「支箭係針對你呢類怪茄而研發嘅,入面嘅毒素可以令你失去行動能力.」指揮官一路看著手下把兩人抓起,送到廂型車上:「姜思傑,堅持走不切實際嘅理想路.淪落到今日咁嘅結果,係你自己攞嚟㗎咋.」
「你條冚家鏟.....」被鎖住雙手的姜思傑,拼命想解開手銬,卻被打昏————————
----------------------------------------------------------------------------------------------------------------------------------------------------------------
大廳的家居電話響起,Anna一如以往地拿起電話接聽,用地道的格拉斯哥腔道:「Hello~?」聽到對方說的話後,Anna臉色大變,緩緩望向正在切菜的馮佩妮,就像附近有人監視一樣.
「She's not here....」Anna掛斷電話,僵在原地.
「假嘅...係假嘅...」她邊安慰自己,邊刪除剛才的來電紀錄,當作沒有發生過一樣.
「Hey~」馮佩妮説:「我打算聽日帶悦萌去老地方挽喎,你地有冇興趣?」
「我地兩副老骨頭去到都散哂啦,唔去喇.」看著報紙的Michael説:「俾多D機會你兩母女享受天倫之樂~」
「咁我地兩母女自己去~」
Anna懷著笑容,對馮佩妮說:「挽得開心D喎~」