黃鼠狼特務II 赤地(搬家原故,本站停止更新): 章七:治樹鳥?
奇南道避風塘
戴漁夫帽的馮佩妮走上一艘停泊的小木船,船上原本在吃飯的漁民見到她,隨即放下手上的東西,準備啟航.船在平靜的海面航行,往遠處一艘漁船進發.
靠近後,馮佩妮越到船尾,甲板上站著一個滿臉鬍渣,托著拐杖的中年男人.
「求爺,妮姐到左.」跟在身後的漁民説完後,便自動自覺回到木船把風.
他留意到馮佩妮到來,深吸一口氣,以凌厲的目光迎向.
「點解要返嚟搵我,你唔係話要同我斷絕關係咩?」求爺踏前一步,用拐杖撞擊木板:「走!!」
「你以為我好想見到你咩?」馮佩妮掀起衣服,露出腹部一道疤痕.求爺默默把頭轉向另一邊,閉上眼睛,頭部抖動:「係韓傲清嘅..?」
馮佩妮黯然點頭.
「究竟喺格里諾克發生過乜事...?」
「你點解會知我喺嗰度,你追蹤我??」
「有個姓姜嘅人私底下向我交代你嘅下落....唔好誤會!咁唔代表我原諒你.」求爺把昂高的頭轉向馮佩妮.
「你都唔係我爸爸.....但係,悅萌依然係你嘅孫女.」
求爺聽到''悅萌''兩字,心裡打了個激靈,接著馮佩妮又說:「我避難到格里諾克呢件事,理論上只有我自己,姜總警司,仲有你知道.銀龍內部一定有人通風報信,紅槍客先會知道.」
「當日我同姜先生單獨見面,件事冇其他人知道.」
「你確定?當日冇其他人在場?」
求爺再仔細想,想起了甚麼,把目光移向在船上把風的手下.馮佩妮沿求爺的視線望向,雙目鎖定那手下,心中燃起怒火.
「冷靜D.....」求爺托著拐杖步前,馮佩妮已經把那手下的頭顱按到水裡,過半分鐘才把他拉出水面,此時他被淹得狂吐海水.
「話我知,係咪你將我嘅位置話俾紅槍客知道?」
「係又點?嘻嘻嘻嘻....」
聽到這個答案,馮佩妮揮拳揍他的腹部,又把他按回水裡,今次差不多過了一分鐘才被拉起.一記一記的拳頭送向,一下一下的海水吐出.越打,淚水便越多.馮佩妮見求爺走近,便鬆開拳頭,回到漁船.
「你讀小學嘅時候,每逢有同學蝦你.爸爸都會出手教訓佢地.」求爺踏上木船,盯住狂吐海水的手下:「係爸爸冇好好保護你,先會發生D咁嘅事.」他雙手舉起拐杖,朝手下的喉嚨狠狠刺向————————骨頭清脆的碎裂聲.
「忍左十幾廿年,喺時候俾D顏色佢地睇————————」
-------------------黃鼠狼特務II 赤地------------------------
-----------------------章七:治樹鳥?-------------------------
監獄
齊家尚把洪再明擊昏後,交由同伴拖走.秦世樂用意志抵抗暈眩,再度站起,竭力向他們走向.
「齊家尚....咪走....」秦世樂衝前把齊家尚摔到地上,兩人在地面翻滾幾轉,齊家尚用箭矢刺向,秦世樂向右翻身躲過.齊家尚趁機會起身,由上而下朝秦世樂刺向,秦世樂用腳踢開齊家尚,齊家尚失重心倒在地上,見秦世樂走近,他掏出弓向天花板射出一支箭矢,箭矢發出煙霧,遮擋秦世樂的視線.直至煙霧散去,齊家尚已不見蹤影.
----------------------------------------------------------------------------------------------------------------------------------------------------------------
洪再明被囚在漆黑一片的空間達兩小時之久,突然聚光燈打在他身上,令他驚魂失措.蒙住的嘴巴和綁住的四肢更令恐懼大增.前方,一雙發光的眼睛盯住他看,即使看不到樣子,但洪再明清楚知道他面對的是Woodpecker的首領,鳥嘴人.
「直播進行緊.」鳥嘴人一如以往用經過濾的聲音發話:「同你哥哥打聲招呼.」,無論洪再明怎樣找,要在漆黑中找出攝影機實在不可能.
「哥!你乜都應承佢地丫!!!我唔想死呀!!」洪再明吼叫同時,洪又達坐在奮銳黨辦公室的座位上,惆悵的看著手機屏幕裡的弟弟.
「你加入左計劃,就唔駛旨意反悔.」影片傳來鳥嘴人的聲音:「唔好做冇膽匪類.」
「你唔係唔知上面有幾恐怖嘛?我唔想比人捉去集中營!!我唔想成為下一個劉曉....」
「唔,好,做,冇,膽,匪,類.好嗎?事情完成後,我會安排假身份俾你地逃亡海外.」
「冇用㗎!!無論去到邊,佢地都會搵到你!!話唔定佢地依家就監聽緊我地!!」洪又達激動不已,慌張地四盼,像是附近有無數只眼聚焦在他身上.
「Woodpecker嘅技術媲美Anonymous,你唔需要擔心呢個問題.一句講哂,你只要做好自己本份,其他嘢交俾我地處理.」
「但係...」
「再見.」影片結束.
「我屌你老母呀!!!啊啊呀呀呀!!!!」洪又達抓狂大吼.
「後悔都冇用.」門外走來兩個人,是顏影寒和齊家尚.
「面對現實啦,抗爭先係出路.」顏影寒道:「你冇選擇.」
「你就係嗰個俾佢地捉去集中營嘅特務....霜寒....」洪又達語氣柔弱,像快沒有氣.
「我地係同一陣線㗎.」顏影寒遞出手掌:「為未來而戰.」,洪又達勉為其難的跟他握手.
「好好發揮你嘅影響力.」齊家尚說.
從閉路電視可以看見,齊家尚一行人殺入監獄,把洪再明帶走,還對著鏡頭比出中指.區可頤和張穎琳看過後一言不發,跟藍曉玲一樣坐在電腦椅上.玻璃窗外每個經過的工作人員和特務也有意無意的瞟區可頤和張穎琳一眼,令她們渾身不舒服.
「我冇諗過事情會咁發展....」區可頤說.
「組織損失慘重,班手足覺得你地俾到組織麻煩...」藍曉玲婉轉地說:「作為領導者,我有責任顧及大家嘅感受.」
「意思係.....問責我地?」
「確切D講,係趕你地走.」門外有數個特務特地走來,展示他們身上的傷口:「多得你地,有七個伙記死左,仲有三個昏迷不醒.」
「所以就將責任推哂喺我地身上?」
「當我求下你地,乖乖返去做你地嘅正義使者.呢度係大人嘅地方,唔係小朋友挽挽下嘅地方.」
「你地嘅存在會增加組織曝光嘅機會,烏有國度運作咁耐,從來冇試過發生D咁嘅事.」
特務們各自各宣洩一番,也各自各離開.
「真係冇彎轉?」剛才一直不作聲的張穎琳直視住藍曉玲,藍曉玲面向她,說:「我要顧全大局.」
「我對烏有國度好失望.」張㯋琳徑自離開座位,走出門外.經過走廊時卻遭到勇仔的阻撓————————
區可頤看一眼藍曉玲沈重的臉,繼而説:「顧全大局?」
「冇錯.」
「如果少數服從多數係必然嘅話,仲需要領袖做乜?」區可頤走到門口,開門前拋下一句:「你叫我相信,我相信左.你呢?」
勇仔一手按在玻璃窗上,眼神堅定不移:「一於去格里諾克!」
「算啦,你阿頭講過話唔俾.」張穎琳從勇仔的腋下穿過.
「所以先要瞞住玲姐行動.」勇仔的一句,成功讓張㯋琳回頭.
「我已經預左會冇左份工.咁又點?東家唔打打西家囉.橫掂我屋企附近荼記請人,人工仲唔錯~」
「多謝你....勇仔.」
「我地一定要救走個BB,仲要完好無缺咁返嚟.」勇仔語氣充滿自信——————————
-----------------------------------------------------------------------------------------------------------------------------------------------------------
晚上十時五十二分,某商業大廈.
一雙穿著皮鞋的腳踏近玻璃窗前.外面五光十色的景象,與伸手不見五指的辦公室單位形成對比.手掌探到褲袋,掏出一部掀蓋式電話.
「喂,是我.」是標準的北京腔普通話.
「嗯...劇本改變了嗎?」
「好.謝謝主任.」
掛斷電話,一個鳥嘴面具丟落在地上,任由皮鞋蹂躪.
---------------------------------------------------------------------------------------------------------------------------------------------------------
屈美站的工程地盤,顏影寒憑藉記憶帶著齊家尚到一道水泥牆前.
「就係呢度?」齊家尚指著水泥牆上的凹陷位,有一個鐵製手柄.
「嗯,肯定係呢度.」
齊家尚拉動鐵製手柄,暗門慢慢移開————————他們期待見到的載具和裝備,沒有如所想的出現在眼前.
「過左咁耐,睇嚟落入左其他人手....」
「呢度原本有好多可以上場嘅設備,宜家就冇哂.」顏影寒透過耳機,指令手下不用急著把戰略運輸機降落.
「終於等到你地嚟.」他們這才見到在牆邊,托著拐杖的求爺.
「銀龍五叔父之首,求爺.」顏影寒邊從鋼梯踏下,視線邊定在求爺不放:「係你做嘅?」
「D裝備載具喺我地手上,要攞返,就要將計劃嘅話事權俾我.」求爺道.
「荒謬,關你D黑社會咩事??」齊家尚失笑說.
「銀龍係黑社會,黃鼠狼係黑社會,Woodpecker係黑社會.對佢地嚟講,我地係冇分別.」求爺用拐杖敲地兩下,道:「我求爺唔會放過任何機會.」
「求爺你乜都有哂,點解會有興趣加入?」
求爺踏前幾步,在顏影寒耳邊輕說:「我想點又關你春事?」
「唔好同我講笑!!」受不住挑釁的顏影寒抓住他的脖子:「我地冇咁嘅幽默感.」,求爺用拐杖打走顏影寒,齊家尚拉弓指向求爺的頭顱.
「奮銳黨嗰班推兩下就暈嘅垃圾唔要都擺.」求爺説得很大口氣:「以我嘅地位,你要幾多人,隨便開口.不過我提醒你一下,你地所謂咁嘅計劃一定失敗告終,唔好抱任何期望.」
顏影寒爬起來,面轉向齊家尚:「點睇.」,齊家尚則以無言回應.
「既然你咁諗,點解要加入我地?」
求爺乾咳一聲,用拐杖輕力拍拍齊家尚和顏影寒的肩膀:「好簡單嘅理由,我輸得起....你地輸唔起.」,求爺把拐杖重新篤在地上,一瘸一拐的走向出口,一邊哼唱the who的''Baba O'Riley'':
「Teenage wasteland.....
It's only teenage wasteland~
Teenage wasteland......
Oh yeah, teenage wasteland~
They're all wasted~」
''我一定會成功俾你睇''
顏影寒很想大大聲把這句喊出來,可是這才發現.....其實自己沒有甚麼把握.
「咁奮銳黨班人點.」齊家尚問顏影寒.畫面一轉,手腳被綁的洪又達和洪再明被丟到泥漉的停車場,兩人至今還未搞清楚甚麼事.
「我咪應承左你地囉!!!你地宜家又想點??」洪又達喊道.
「世界好殘酷.冇利用價值,就講bye bye.」青年舉起槍枝,瞄準洪又達的頭顱.卻被同行的齊家尚叫住:「由我收尾,你返去先.」,青年把槍枝交由齊家尚後,便聳聳肩離去.齊家尚眼角偷瞄他,直至他從視野中消失,才收起槍枝,為洪氏兄弟鬆綁:「有咁遠走咁遠,永遠唔好再返嚟香港.」
「知....知道!!」洪氏兄弟一鬆綁,連目的地也未及決定,隨便找個方向奔竄.跑過天橋底時,洪又達腦袋忽然往左晃動,血花從腦袋噴出,身體接連倒下.齊家尚沿彈道方向一看,果然有狙擊手!是個戴著斗篷帽和面具,穿著紅色大衣的男子——————————齊家尚掏出弓箭對付,男子閃過箭矢,躲到掩體後,為狙擊槍上彈.在這個空檔,齊家尚趕緊跑到建築物裡,一樓,二樓....三樓......是四樓了!他拉起弓箭四處張望,目標可能會躲在這裡任何一部車後埋伏,只要中一粒子彈,就足以失去行動能力.
有動靜————————
先閃到水泥柱後,剛剛在六人車和的士之間似乎有團紅色東西往左面掠過,現在的話,應該已經到了靠樓梯邊那台貨Van吧.
想走?沒有那麼容易!
箭矢從弓中送出,刺中男子的大衣,弄得他被釘在牆上.
「著貼身嘅衫執行任務係常識吧?」齊家尚邊走邊說:「你地紅槍客著衫咁浮誇,真係符合國情.」,這時男子猛力一動把大衣撕破,拋下被釘住那部份而逃上樓梯.
「霜寒,我需要你嘅支援,係紅槍客.」齊家尚聯絡顏影寒後趕緊追上去————————
----------------------------------------------------------------------------------------------------------------------------------
目的地:蘇格蘭,格里諾克小鎮 預計航行時間:八小時
「機上面有幾支礦泉水,呢八個鐘我地唔洗渴死~」勇仔看著雪櫃裡頭充足的糧食,感到安慰.
「我咁大個女都未去過英國,今次都係第一次.之前屋企人打算趁英國脫歐去嗰度挽下,但係後尾又冇左件事.....」張穎琳想起有點可惜:「不過今次嚟唔係為左挽,救人最緊要.」
「一定得嘅.」勇仔自信的笑:「一定得!」
男子在門邊等候齊家尚從樓梯走上來,一發手裡劍朝喉嚨殺向——————弓身閃起格走,兩人隨即展開近戰,男子夾住手裡劍揮向,齊家尚躲過幾招後,用弓身擊他大腿,拋下弓箭後抓緊他的雙手.見鋒利的劍尖迫近喉嚨,齊家尚勁力把他雙臂逆方向扭,手快被扭斷的男子用頭撞開他,劍尖再刺向,齊家尚避不及右肩中招.想把劍傷延伸向心臟的男子被齊家尚捉住手腕,批肘撃向上臂和下顎.拉開距離後顏影寒出現並起踢把男子狠狠送到一台房車的擋風玻璃上.玻璃碎裂觸發了警報器響個不停.
顏影寒看著負傷的齊家尚,拳頭握得最緊,冰霧從指間散出.男子從玻璃碎片中起身,此時拳頭已向他送去,他單掌接住顏影寒的拳頭,慢慢抬起頭,露出剛才被斗篷帽遮住的一雙眼.冰冷的感覺,似曾相識————————
男子連帶拳頭逆時針跳轉把顏影寒翻到地上,旁邊地面突然一支箭矢爆出閃光.齊家尚趁機拳揍男子的腹部,按住頭顱朝水泥柱送向.暗裡間,男子手中已準備好手裡劍,準備朝齊家尚的脊椎骨刺向.
「小心啊呀!!!!」顏影寒撲向把男子出暗器的手連同身體帶到地上,他猛力把男子的手骹拉斷,男子一腳朝天把顏影寒踢到後方再速速起身,自行把手骹推回原位.齊家尚按動弓箭的機關,弓身的護甲脫落,現出尖銳的金屬刀鋒.
「你信唔信我可以將你個頭斬落嚟?」
男子沒有回應,衝前戰鬥.他避開奪命的刀鋒,以雙拳間的手裡劍格擋每一下斬擊.
重新加入打鬥的顏影寒飛膝撞開男子,起左腳纏住他左臂把其重心拉下再右膝擊下顎,男子絆倒顏影寒,齊家尚的弓再斬來,男子用前臂格住,無論怎麼用力,刀鋒也切不破堅固的紅色風衣.格檔轉為肘擊,把齊家尚擊至倒地.顏影寒後踢擊飛男子,把受傷的齊家尚扶起,按住他血流不止的右肩.
男子的面具因撞擊地面而碎裂,他勉強自己站起來,往樓梯間一步併兩步的走.
「係你?.....」顏影寒認出他的樣子,是黑曜——————————