其實，我只係一個普通MK妹: 好奇害死貓

我決定左去靠自己去查清楚呢件事

連登Post單新聞無開到綁架我個女人個名，為左咁，我去左一個我未去過嘅地方

中央圖書館

呢D俾學生名義上溫書，實際去互摷嘅地方我從來未去過

要搞野就開房啦，有咩好扮! 



用左成日，睇左成年嘅舊蘋果，我得到兩個資訊

第一，個女人應該係我老豆嘅小三 (小你老母個三)

第二，佢全名叫王嘉儀 (又一個公廁名)

雖然，我得到嘅係一個公廁名，都無阻我係Facebook起到佢底

係呀，女人真係一個天生嘅私家偵探，我有好幾條仔都係俾我憑Whatsapp名，check到邊個send嚟，再係Facebook搵到佢一腳踏兩船嘅證據



傷心嘅同時，我覺得自己好叻，亦覺得D男人好撚豬

個女人公開嘅post last update係14年前，2月20日

一張佢同生日蛋糕嘅合照，status 寫住【謝謝你，我好愛你】

直覺話我聽，呢個【你】係我老豆。

再睇落去，見到一張佢俾人tag左嘅相



Eric Wong 和Kaylie Wong跟另外8人

Status寫住【一家人團年飯】

呢個Eric，應該就係王嘉儀屋企人喇

佢個Facebook無咩嘢睇，但係個人資料就詳盡到wiki咁，D中年人玩Facebook就係咁，完全唔知咩叫保障自己私隱

我好想從呢個人身上，得到呢件事嘅始末，所以，我send左個message俾佢

Hi ! 

Hi 完，我就唔知點講落去好

喂~你係咪有個親戚叫王嘉儀呀? 我係佢當年綁個細佬女呀，點解佢綁我嘅? 



咁樣講，會唔會太直接? 

我諗咁多都無用，因為佢根本唔覆我，仲係已讀不回嗰隻。面對已讀不回，我好明白死chur係冇用，人地要覆就覆左架喇，有咩好chur。

結果我足足等左兩個幾月，因為一單悲劇，佢終於覆我。

【女嬰凱晴屍藏小提琴盒案】

初頭呢單案未破嘅時候，大家矛頭都直指係女嬰被拐，對於無咩新聞嘅香港嚟講，D傳媒梗係日寫夜寫啦，仲報導埋近20年嘅小童綁架案

當中包括我

小小篇幅隨即係Facebook傳開去，所有身邊人都知我老豆玩女人玩到個女俾人綁架報復



個個想問又唔敢問，至於我屋企? 依舊日日8點開飯，媽咪食完飯就坐埋一邊玩candy crush，好似咩事都無發生過咁

都好嘅，好過佢成日喊喊喊，睇見就憎

我已經好耐無開Facebook，直至有一日嘅早上，我收到個inbox 訊息

Eric Wong: Sorry for late reply. I know who you are now. 

嗯... ... 正當我諗緊點覆佢，佢再講

Can we talk in person? 

好! 夠爽快! 我鍾意! 睇佢個Facebook我知佢係中學老師，瘦瘦削削咁，應該都無咩殺傷力掛

特登約左佢係佢學校附近嘅starfucks，咁易俾人點相，佢想對我做咩都冇咁易



我地坐左大概15分鐘，佢問左我讀書讀成點，諗唔諗住駁番個degree，就好似新年同親戚講嘢咁

硬係都入唔到正題

終於，佢問我:【嘉儀最近點呀? 】

吓?! 我就係想問你王嘉儀嘅嘢，你問番我? 

【王嘉儀其實係你邊個?】

【我係佢細佬，唔係佢叫你搵我架咩?】佢個樣好驚訝，一D都唔似係扮。

【我未見過佢，至少記憶上無。你知當年發生咩事，佢仲點會同我接觸呀?】



佢靜左，好似入左回憶mode咁，應該諗緊當年嘅事? 

真係頂唔順D寧靜，我決定攞番個主動權

【實情係咁，如果唔係無意中俾我上網搵到當年俾人綁架單新聞，我根本唔知有呢件事。由細到大，我屋企都好正常，有個怨婦老母，有個爛滾老豆，其實真係好撚普通! 我宜家只係想知當年到底點解王嘉儀要綁我，我老豆玩佢要報復? 做咩keep住我咁耐又唔撚殺左我啫! 好過我宜家慘撚過死呀! 】

啊! 我終於講左出口。