《瑜亮之戀~初之聖誕與離別之日》
第四章

晚上 聖誕樹廣場
「嘩!好靚啊棵聖誕樹!」Venus望住棵掛滿閃亮燈飾嘅大型聖誕樹,開心得好似個細路女咁。
「你睇下,仲有聖誕老人添呀!我哋過去影相囉!」Hayden指一指遠處依然醒目嘅紅色大帽。
「好呀!」Venus開心咁拖住Hayden過去。
兩個人影到停唔到手,同聖誕樹影、同聖誕老人影、同聖誕老人屋企影⋯⋯有自拍、有叫途人幫手影,大部份都係兩個人開心嘅合照。
「咔!」
兩個人將寫上二人名字嘅心型小鎖扣上聖誕樹下嘅欄杆上,望著呢個象徵二人嘅感情嘅鎖緊緊咁扣住係欄杆上面,兩個人互相對望咗一眼,忍唔住甜笑起嚟。


「先生,要唔要買支花俾你女朋友呀?只要$50咋!」突然一個拎住花籃嘅女仔行埋嚟Hayden同Venus身邊問。
「好呀,俾一支我呀~」
「喂!⋯」Venus啱啱想阻止,Hayden已經拎咗$50俾咗個女仔,喺女仔手上拎過嗰支包得好靚嘅玫瑰。
「嗱~送俾你!」Hayden雙手將支玫瑰遞俾Venus。
「做咩駛埋呢啲錢喎,一支要成$50咁貴~」Venus接過支花,雖然覺得好開心,不過都忍唔住話兩句。
「你仲記唔記得我第一次約你出嚟嘅事呀?」Hayden忽然講。
「梗係記得啦~嗰陣你呃我出嚟,點知原來係幫你同阿純去賣花。」Venus藐一藐嘴,又諗番起起嗰陣嘅事。
「嗰陣我拎支花俾你,跟住話唔係送嘅,有人個失望樣我宜家都仲記得㗎!」Hayden望住Venus,依然係溫柔咁笑住講:「今日就補番數啦!」
Venus聽完之後,一臉冧爆嘅樣,輕輕咁挨咗落Hayden心口:「多謝~」
Hayden都輕輕咁攬住Venus,一陣之後笑笑口咁繼續講:「不過呢,我仲記得,嗰陣有人我讚佢靚女,即刻開心到不得了,拎住個花籃不知賣得幾落力!」


「喂呀!」Venus聽到之後,即刻紅哂塊臉,係Hayden個心口度扮嬲咁係咁細細力拍咗幾下。
「哈哈哈⋯⋯」Hayden望住Venus怕醜個樣,忍唔住開心咁笑,同時亦攬得更加實。

晚上 冰雪森林市集
「嘩~好靚啊!」Venus望著眼前雪白一片嘅景色,仲有點點飄落嘅「白雪」,忍唔住發出一次次嘅驚歎。
「你咪話好想感受下白色聖誕嘅感覺嘅?點呀,感覺開唔開心?」Hayden望著被眼前嘅「雪景」吸引住嘅Venus:「總有一日,我會帶你去睇真正嘅雪景,過真正嘅白色聖誕!」
「嗯!」Venus擰轉頭,望住Hayden溫柔嘅笑臉,快速咁錫咗佢一啖,之後就覺到自己臉上好似發燒咁講:「呢個⋯呢個就當係多謝你嘅禮物,我真係好開心呀!」
Hayden呆咗一呆,望住Venus臉都紅哂,又開心咁拖起Venus隻手:「嗰邊有啲攤檔,我哋過去睇下囉~」
「嗯~好呀!」Venus開心咁回應,感覺自己今日好似無一刻唔係笑緊。
「你睇下,呢個雪人好似你呀,傻下傻下咁。」Hayden指住其中一個檔攤上面一隻笑得好開心嘅雪人公仔講。


「乜呀,我話呢隻鹿先最似你,成個樣都鈍下鈍下咁。」Venus指住另一隻鹿公仔反擊。
「哎吔~你話我鈍!?」兩個人就係咁,一邊行住睇各種攤檔賣嘅嘢,一邊細聲講大聲笑,同時又影咗一大堆相。