[前傳]是咁的，我嘅職業係幫想自殺嘅人寫遺書: 71.討厭
「個個都話悲傷會隨住時間流逝而變淡。」
時間會沖淡一切，係鐵則。所以為咗唔俾心痛消失，我先每晚睇一次金弦嘅遺書。
「但其實傷心只係變成另一種形式，植根喺身上。」bobo話。
佢望向我，眼神好似問緊：「可唔可以⋯⋯俾我死？」
「而我地永遠都無辦法再變翻，未曾受傷嘅自己。」
學習背負傷痕行落去，叫做堅強。
但無可否認，行落去嗰個，一早已經唔係完好無缺、純淨無暇嘅自己。
所有人，都只能夠接受唔再係以前嘅自己。笑容唔再開懷，愛人嘅心唔再毫無保留。
如果討厭自己背負傷痕頂硬上嘅身影，就無可能再行落去。