[前傳]是咁的，我嘅職業係幫想自殺嘅人寫遺書: 87.畫作
我行去幾個記者聚集嘅畫作嗰邊。
點解⋯⋯會咁？
一陣寒意喺背脊亂爬。
兩個記者影完相喺我身邊行過：「畫埋啲咁嘅野，會自殺都正常嘅。」
「藝術品可以反映創作人嘅內心，佢畫親都係依啲野，唔自殺先奇。」
一排展出嘅五幅畫作，令我有反胃嘅感覺。
第一幅，暗紅色嘅背景中心坐住一個裸體嘅大肚婆，而佢肚入面有一堆扭曲到不似人形，血淋淋又面目猙獰嘅bb仔。
佢地用刀插對方，咬對方嘅肉，有啲無手有啲無腳，有啲爛面有啲無眼珠。
第二幅，一個女仔企喺樹旁邊，木無表情咁望住睇畫嘅人。皮膚呈現慘白色嘅女仔圍咗條頸巾，頸巾連住樹。
係一個吊頸嘅女仔。
第三幅，一個光頭嘅裸女下跪祈禱，佢背脊上插住刀劍槍斧頭，有槍傷刺傷血窿。佢祈禱嘅對象，係另一個頭部好似巨形腫瘤咁嘅木偶。
「佢老豆係生腦癌死，一知道作者嘅經歷，依幅畫就好易明。」
嗰兩個記者，一個負責影相，另一個就喺筆記記低重點。
「咁第一幅呢？」
「同佢阿媽有關。」