[誤墜]係獅隧口落車 就出左事: １２

我跛下跛下咁打算行返出大路，香港地咁細、只要肯行、點都不至於橫屍街頭既。

行到出去先發覺，沿途有座野叫『白祠』、頭先行過都冇為意。

間野既風格同典型平時成日見到既祠堂有啲唔同，分別係邊我又講唔出。

而且，一般圍村祠堂通常名命係『Ｘ氏宗祠』，四個字咁去。

好少咁簡潔，於是乎我又好奇望多兩眼、先走左去。





再望手錶、屋企人應該好擔心我，唉、拿拿聲出馬路截架的士喇真係。

行到一條巷，離遠見到有個細路女蹲左係某家人門口個地下好似喊緊咁。

屌，九成九係做錯少少野就比啲重男輕女既仆街屋企人，管左出門口靜思己過啦！

但係，我宜加自身難保、而且閒事奠理，根據我多年睇小說既經驗，小女孩絕對係麻煩既人物。

之但係，路就得一條，冇左走、冇右走，我唯有掂行掂過、扮睇佢唔到。





「哥哥……」一經過佢身邊，即刻叫住我。

喂，大姊、我幫你唔到架喎，唔通同你老豆隻揪、之後叫佢『以後咪恰你個女呀！』咁咩？

「嗚嗚……你有冇見過……我媽媽？」

哇，你老母仲要走埋佬？你又真係慘既。天口咁凍著得一條薄到死既裙就比人推出門口企。

「冇阿，我冇見過你媽媽阿。」





個細路女越喊越犀利，仲用典型既細路淘哭必用方法－－雙手係眼邊係咁捽、個人就係咁喊。

「乖，你起身先啦，我幫你向屋企人求下情？」我行過去，打扶佢起身。

由於現場太黑既關係、而佢佢又只係仰高左少少頭，從上而下望、我剩係睇到佢烏黑既雙眼，微微咁向上望緊我。

小女孩起身後仍然抽噎，而佢企係身只係去到我腰左右、我都係睇唔清佢個樣。

所以我唯有蹲下來看看她的臉，順道說說話。

「嗯？」等我幫你話下你個衰老豆，如果佢個樣唔係太惡既話。

小女孩慢慢放低對手、用黑色的大眼睛、定了睛咁望住我。

原來，佢對眼真係黑色……唔止個瞳孔，就連成隻眼都係完全黑色，冇眼白……





我果刻先留意到，佢仲流出黎既、係墨黑色既眼流，沿臉龐、沿法令慢慢滑下……

「哥、哥？」