「夜香阿伯?!」我忍唔住大叫左出黎。 

阿伯聽到之後面色一沉,最後搖了搖頭。 

「後生仔,你終於返到黎喇。」瞟了外頭一下,然後就無奈地嘆了口氣。 

「入黎啦。」佢講完就行左入屋。 

除左入屋,我別無他選、反正我本來既目的就係來這裡。 





只係對像唔同左、冇咁養眼,但我有種感覺。 

這個農村阿伯知既一定比個女仔仲多! 

剛行入幾步,就聽到內房有把女仔聲:「爸!誰來了?他嗎?」 

如果你有聽過有人好有感情咁讀中文課本入面既課文,恭喜你、這應該完完全全感受到我既違和感。 

個女仔真係用書面語黎講野! 





慢著,爸? 

那白衣少女從內房走了出來,向我點了點頭,然後走到已坐在椅子的阿伯身邊拉了一下茶壺、為阿伯斟茶。 

「你地係父女?!」我不禁失聲大叫。 

只見老伯帶有點無奈眼神望住我,而那個少女則點了點頭、微笑了一下。 

這好像……有點不對勁?點解老伯隻眼係正常既黑白色? 





「點解……你對眼……同你個女……」我口窒窒咁講、講落都有點唔好意思,人地既家事關我咩事呢。 

老伯白了我一眼說:「少年,太年輕了。」隨後、佢用手指點了點自雙眼,左、右雙一下。 

然後舉過黎比我睇。手上那兩片帶點透明、還有淚液沾住既膠片。 

而老伯本人亦都變成了純白既雙眼。 

「世界上有隱形眼鏡架嘛!年輕人!」老伯邊說邊笑。 

「呃……」我呆了呆,完全比唔到反應。 

喂!唔好咁茅好喎! 

然後,老伯又再次面色一沉、氣氛凝重了起來,我望向少女的臉孔、但連佢都表露出無比認真既表情。 





「外面黑眼既,係追住你、冇錯啦?」 

我點了點頭,大口地吞左啖口水。 

「你打開左人地啲野係咪?我一早就提過你,唔好亂搞人地既野!」佢厲聲疾詞地說。 

冇!冤枉啊! 

「我冇!我有聽你講,我見到個衣櫃入面好似有啲野,我想開佢黎睇、但我忍左手!」 

「你見到入面個衣櫃?」老伯厲聲再問。 

「係。」我問心無愧、答得理所當然! 





「咁你咪就係已經開左……」 

「開左?」 我一頭霧水,我冇開又話我有開。 

「就係果道鐵門!道鐵門先係唔可以打開既野啊!」 

我回想起,所有野真係好似由打開道鐵門開始…… 

我成個人離一離、有種錯手殺死左人既感覺。 

好似搞左個大頭佛出黎……