[誤墜]係獅隧口落車 就出左事: SP01(1)--小白篇

冬天既下午好舒服、我坐左係一個角落、合起眼享受住我最喜歡既陽光。 

細個係村入面除左睇書、其餘時間都好空閒，所以一有機會、我就捉住阿爸嬌嗲佢帶我行出少少、咁我就可以沐浴著暖和的日光睡一個舒服的午覺。 

諗起阿爸、雖然個心仍然會大大失落，但我知佢在天之靈見到我平安無事、一定會滿懷安慰。 

可以這樣空閒坐係到沐陽光浴、係因為阿壯叫我係樓下等佢一陣、話上樓拎副墨鏡比我帶住先、然後一齊出『新城市』配眼鏡。 

而佢交帶左幾句就上左樓，留低我一個係樓下、仲『千奇唔好走開阿，知無？』咁，當我細路女。 





有時覺得阿壯份人先係小朋友，雖然偶爾會有英氣既一面。 

雖然我唔知『新城市』係咩地方、但通常有個『新』字既都唔會太差、所以我好期待等陣會見到既城市有幾『新』、比起我住既『舊』村會新幾多呢，真係好期待、好好奇。 

充份照沐陽光令我感到全身暖暖、開始有點想睡的感覺－－好想快點抱住『阿壯熊』啊。 

懶意洋溢既我，站起身張開兩手伸了個懶腰。 

然後慢慢張開雙眼、仰視上方那帶點灰的藍天。 





飄著幾片灰雲的天空照著不算刺眼的陽光，但仍是讓我瞇起眼來。 

本來坐我大腿的依貓因為我固意站起來而跳了開去。 

「喵～」 

仍然瞇起雙眼的我稍微回頭看一下，好似見到一個男仔企左係到。 

那男的看著我、視線由下而上，定定的看了一會、看得出神。 





最後望到我的臉上時，終於發現了我、然後靦腆一笑。 

「做咩發哂呆咁阿？」見到佢笑到咁尷尬，我都忍唔住笑。 

這男的沒說什麼、只是搖了搖頭，手上提了一個不大不小的手挽布袋走了過來。 

當然－－這男的就是阿壯。 

「我拎左個以前養兔仔既寵物袋比依貓，既然我地帶埋佢出去、就唔好要佢陪我地行喇，怕佢唔適應咁多人。」 

之後就抱住依貓放左入寵物袋，雖然明顯看得出換成『抗爭樣子』的依貓有著相當大的不願意、但也是沒辦法了的吧。 

「然後，副眼鏡你既。」 

阿壯放好依貓就走過黎幫我帶上一副墨黑色鏡片的眼鏡、然後就托住下巴望著我。 





「果然，真係好襯你！」阿壯把聲有點興奮，大概是看到我很合適這眼鏡的緣故？ 

「行喇，我地搭巴士出新城市。」說罷，就掛起手挽寵物袋至右肩上、一把拖起我右手走了出去。 

我望住阿壯回來後第一次拖住我手既背影、心跳好像似有點微微加速。 

胸口有種好像上次食朱古力該種甜味，嘻嘻，原來阿壯隻手都幾大、幾暖。

**

「哇……巴士原來好大架！」我細細聲同阿壯講。 

在巴士站等了一下、就有一架雙層高的白色巴士駛來。 





巴士的號碼牌寫住『２８２』、目的地是沙田市中心。 

走來巴士站的路沿途中，一直不住有人向我打望，有男有女、但大多數都是善意的。 

但有個奇怪的現像就是、通常女的就上下打量了我一下就別過了頭去，但男的雖然一樣會打量我、但總會上下打量多好幾次、甚至雙眼好像有點發光，然後就換向望住阿壯、最後流出驚詫不爽的表情。 

「阿壯呀？其實你條村既人係咪唔太中意你？」我係阿壯耳邊講。 

但阿壯竟然一臉無奈的望住我攤了攤手說：「以前就唔係既，我諗就算係……都應該係岩岩既事。」 

＊ 

「兩個丫唔該。」阿壯投左啲銀幣落個匣入面，然後同司機講。 

其實我都唔清楚3.7即係幾多錢，但一問起阿壯、佢就開始吟吟沉沉，話以前平好多、九巴係咁加價又唔開密班次啲車之類既說話，但我就完全聽唔明。 





我地揀左個雙人位坐，阿壯話比我坐窗邊可以望下風景、巴士『洪洪』兩聲之後加速。 

「哇……阿壯，原來巴士開得好快！」我有點緊張、捉住阿壯隻手。 

「哈，睇黎真係要搵日同你去坐下亡命紅ＶＡＮ。」 

「即係咩，好快架？」 

「一架紅頂既單層巴士，比普通巴士、快兩倍都仲得！」 

不是吧，我有點懷疑阿壯是故意拋唬我的、明明巴士已經這麼快，要是比巴士還要快兩倍、裡頭的人不會暈的嗎？ 

先別說這個……望著窗外的風景在高速飛轉、我好像有點暈。 





「壯……我好似唔係幾舒服。」 

「哇，你面青青咁既、邊到唔舒服？」 

「大概係哩到附近。」我指著胃左右的位置，這兒好像有點『瞞瞞頂頂』。 

「小白－－你今次係第一次搭車？」 

我點點頭，有什麼好奇怪、出村的事我還是第一次阿！ 

「咁你宜加係咪覺得有啲野想湧出黎咁？」阿壯好似好緊張。 

「原本都唔覺，你講完……又好似有啲－－」死火，突然好想嘔！ 

阿壯一下很快的動作，按了身旁黃色杆上面的紅色按鈕。 

我地係一個叫文化博物館既地方落左車，落車之後我就唔講喇 

之前睇書都唔會明白、到坐完我先知－－原來坐車係咁辛苦架。