Welcome to Knot ~ Season 2: #102

迷迷糊糊咁被拉到碼頭嘅一個角落，眼前人遞咗張紙巾俾我。
邊抹眼淚，邊嘗試令自己冷靜落嚟。
 
海風的確有治療嘅能力。
面向一望無際嘅海，坐咗係到吹風，眼淚的確係止住咗。
海…Ocean…
思緒又輕易咁跌入回憶嘅漩渦之中。
 
「點呀？喊咗出嚟發洩咗，有冇覺得好啲？」路比以佢最溫柔嘅聲線叫喚住我，再一次將我由深淵中拉返出嚟。
路比就係有呢種能力，可以由困苦之間拉我一把…兩年前可以，今日仍然可以。


 
「我收到你電話問我有冇大假拎，都估到台灣個邊有事。已經即刻飛過嚟架喇。」路比摸一摸我頭頂，就好似氹緊佢啲小妹妹咁。
我欣然接受呢種嘅呵護，對住呢位好兄弟微微一笑：「多謝你…」
「我入咗紙架喇，如無意外，都一定會批。放心啦！」路比撘一撘我嘅膊頭「唔使驚，路比係大廳！」
因為一個如此陳年嘅爛gag，我忍唔住笑咗出嚟。
 
我面向路比，決定要好好擁抱下呢個一直陪我渡過所有難關嘅好朋友。
我張開手，緊緊攬住路比：「多謝你呀路比！」
「唉～」係咪我錯覺，路比好似暗暗嘆咗口氣「做朋友，講呢啲！」
路比雙手環住我條腰。兩個人就係咁互相擁抱住。


 
「喂！！你兩個係到做咩呀？！」同路比半愕然半尷尬咁分開，先發現聲大大嘅係Taz，而佢身後，自然就係佢嘅愛人-靖。
「你兩個做咩攬埋一齊呀？Sky你對得住Oppa呀！路比你又對得住兄弟呀！」Taz衝上前一輪咀咁指責住我哋，完全唔俾機會我同路比反駁。
 
多得靖拉住Taz，避過一場街頭鬧劇嘅發生：「BB你冷靜啲先！」
「無嘢呀！」路比維護住大家「你咪癲啦！」
「癲？！」Taz似乎越講越激動「你哋明明攬埋一舊，你唔好話係我睇錯呀！」
靖加入勸說：「BB咪咁激動先啦！Sky有啲唔開心，路比安慰佢啫…」
「唔開心？」Taz轉為望住我「係咪Oppa蝦你？我幫你鬧佢呀！」
 


「BB，你咪咁…」靖改為望我，以眼神再詢問我「可唔可以講俾佢知？」
我無奈咁點一點頭。
宜家嘅情況變得有啲奇怪。係碼頭呢到，靖拉住Taz係一邊透露緊我嘅心結，而我就係另一邊，同路比解說緊靖同Taz嘅關係變化。
 
10分鐘後，我哋一行四人已經返翻去Knot。
望一望鐘，11：54am。
我拍一拍Kwan仔嘅膊頭，示意我接替佢個位，準備迎接繁忙嘅午市。
路比、靖同Taz就坐咗係吧枱最邊嘅位置，似乎係想密切留意下我嘅情況。