Welcome to Knot ~ Season 2: #148. 樂少

頭開始痛。
究竟係因為宿醉，定係因為同一時間我要諗太多嘢呢？
 
行下行下，我對腳竟然帶咗我去…潛水班集合地點？
「妖~搞錯呀！」就係我低頭對住自己對腳「小」咗一聲嘅時間，又有人叫我。
「樂少！」係一把女聲。
唔係咁邪吓嘛！唔通真係亞青？
 
震住咁慢慢轉身…
「呼~ 乜係你！嚇死人咩？」原來係負責安排借用潛水器材嘅美女，我老闆 - 瑪莉姐。


嗱，叫得做「瑪莉」，而唔係Mary，重要加埋個尊稱「姐」，就知我老闆嘅地位係我心目中係幾咁崇高，同埋我老闆係年齡層嘅人。
「你宜家見到我好驚咩？」我成日都好有衝動，當瑪莉姐瞪大對眼望人嘅時候，我伸出我對玉手放係佢塊面下面接住個對可能會落嚟嘅明目。
「唔…唔係。點會呢？傻豬嚟嘅。」作為一個top sales，口才嘅嘢，你懂的「只不過今日我放假，都可以見到你，覺得好…三生有幸咋嘛。」
 
「你留返你啲甜言蜜語對啲客，同你條女啦。」口係咁講，但睇住瑪莉姐咀角含春咁嘅樣，好明顯佢係受啦。
「邊係啫瑪莉姐，你咪係honey我囉。」落多兩下咀頭，唔知年尾花紅會唔會多少少呢？
「咁…亞honey，不如你就抵諗啲，返鋪頭拎多套gear嚟，今日有個插班生嚟試堂呀。」瑪莉姐真係…勁呀！
「吓？！但係…我今日放假喎。」我都要好好維護下自己福利先得。
「嗱，你幫我返去拎套gear嚟，一來一回，俾夠你半個鐘好未？咁計返條數…補返$30…呀唔好，補返半個鐘俾你，聽日你遲返半個鐘啦。」嘩~好數口，咩都算到盡呀。
「咁都得？？」我O大我個咀，真係諗唔到可以再講啲咩。


「得，實得。我話得就得。快啲去啦，咪拎啲靚嘢俾人用呀。」
瑪莉姐正想推我上路嘅時候，我忍唔住都要問佢一句：「咁個學生係男係女，高定矮，肥定瘦，我都要知架。」
「唏~ 早講呀。嗱，呢張係佢fax嚟嘅form，你自己睇啦。」瑪莉姐一手飛咗張紙過嚟，差啲接都接唔住呀。
 
我邊行返舖頭邊睇：
姓別 - 女。good喎；
年齡 - 29。嗯~ 大咗啲；
潛水經驗 - 玩過下。咁寸？
身高 - 173cm。嘩，都幾高喎！
體重 - 59kg。都正常。


哈哈！唔記得睇叫咩名添！
姓名 - Teddy！！！！！！
 
唔會係…亞青個Teddy啩！！！！！