Welcome to Knot ~ Season 2: #150. 樂少

點算? 我應該點做?
如果真係嗰個Teddy，咁我…
我係應該理直氣壯咁去見佢哋，好型咁話「青係我嘅!!!」
定係應該笠晒水咁，扮唔識、見唔到呢?
又一或，好專業咁話「宜家你哋專心上堂先，私人事，放學先處理。」
 
但其實我係青嘅邊個呢?
究意我係正印定小三呀?
咪住…我唔會係小四、五、六啩。
究竟Oppa去咗邊? 宜家我想搵個智慧老人問下都冇呀，陰功~


 
我一邊好茫然咁行返舖頭，一邊就係到苦思究竟我應該點做嘅時候…
「喂! 作死你咩~ 發雞盲定發雞瘟呀你?」呢把咁震撼嘅聲音…
「吓?! Taz! Sorry呀，我諗緊嘢，睇你唔到。」
「冇嘢呀你? 成舊黑雲係你頭頂咁，有咩事呀?」可能我真係烏雲蓋頂，連Taz都察覺到我有啲唔妥。
「我…嗚~~Taz! 救我，我個腦十年冇咩點用，宜家唔識諗嘢呀。我…我好多問題解決唔到，好多煩惱呀!!!」
「妖~ 大街大巷，你咪搞到人哋以為你俾人搞大咗個肚咁先得架! 去…去Knot到坐底先講啦。」雖然由細到大Taz都係蝦我多過照顧我，但我知佢其實好鍚我架。
 
「我…我返舖頭拎啲嘢，轉頭過嚟得唔得?」我只可以用感激流涕嚟形容我呢刻嘅心情。
「咁…一係半粒鐘後係Knot等啦。」講完，Taz就邊玩電話邊行咗去喇。


 
我決定唔理三七廿一，跑咗返去舖頭求其拎咗套gear，又跑住拎返去俾瑪莉姐，都費事講多兩句留多兩分鐘，我又一支箭咁跑咗返屋企，諗住換過套衫。
 
半個鐘頭後，都唔知點解我會有啲心虛嘅感覺，打算鬼鬼竄竄咁走入Knot。
點知一推門入去，我竟然見到…
就係Knot最入嘅位置，坐咗一小群人。
望真啲，Taz坐咗係對正門口的位置，左手邊坐咗一身咖啡師服嘅靖，右手邊係King哥，重有小卒同魚魚，連只有夜晚先出動嘅獅都係到。
我呆咗咁坐咗係門口位置，突然有人拍一拍我膊頭，回頭一望…
「喂! 做咩傻咗咁企係門口唔入去?你班friend係嗰邊喎!」係亞師同師太!
亞師半推住我咁行埋去Taz佢哋到：「Hi~ 我同師太帶埋樂少嚟咗喇!」


「點解…??」
我都未嚟得切問，King哥就已經開口：「你話啫喱唔見咗，我咪趕返入嚟睇下咩事，咁啱Taz話約咗你，又咁啱師話啫喱琴晚有嘢講底咗俾我哋知，咪一齊嚟咗囉。」
小卒亦都接住講：「我係見就嚟陪魚魚飛，所以過嚟行下，順便叫埋獅一齊出嚟玩。」
我面前突然出現咗杯mint mocha：「飲杯嘢，醒下個腦先啦。」係善解人意嘅Kwan仔…
Oh! I love my friends~~~~~