Welcome to Knot ~ Season 2: #188. 路比

我完全唔明白究竟啫喱同Sky諗緊咩。佢哋係樓上傾足一粒鐘，落到嚟咩都冇講，啫喱就捉咗Kay出去。
無論我點旁敲側擊，Sky都只係笑一笑， 完全莫視我問嘅任何問題。
明唔明白個種感覺係幾無助同妒忌？
我絕對有種「我係外人」嘅感覺，而明明一直留係佢身邊、陪住佢嘅人係我。

當問到連我自己都覺得自己煩嘅時候，我好無癮咁返咗自己房。
百無聊賴咁坐係露台，注視緊出面一個二個著住背心熱褲、青春可人嘅美媚。有時我都忍唔住問自己，出面咁大個樹林，點解我偏偏要咁死心塌地咁對一棵樹好？
你話棵樹對你有反應，會回應你嘅好，會對你一條心，咁都重好啲呀。但係宜家我呢棵樹又唔俾反應我，更加唔係只對我一個好，分分鐘重會跟咗第二個喎！
我就真係點諗都諗唔通，唯有話可能係我前世玩弄咗佢嘅感情，今世我要雙倍還返俾佢囉。



「叩叩叩~」無啦啦邊鬼個嚟敲我門呀！？
門一看，原來係我棵樹。但係我嘅視線第一眼望到嘅，係一隻玉手。正確啲嚟講，應該係一隻豎起咗嘅食指。
「搞咩呀妳？」我輕輕撥開指住我鼻頭嘅手指。
「我問你搞咩呀？！一個人上咗嚟，又無嚟神氣咁。」Sky好溫柔，溫柔到…我有個㩒佢落床嘅衝動。
正人渣！為咗唔俾自己呢個咁禽獸嘅諗法變成真實，我一個轉身就返咗入房，唔敢再望佢。
「你無事呀嘛？」溫柔嘅聲音係背後緊貼住我，我知佢入咗嚟我房。
「無事呀！妳上嚟做咩啫？下面唔忙咩？」我呢刻只係希望佢快啲走。
「暫時都OK，不過轉頭要返落去架喇。」
「嗯！咁妳去做嘢啦，唔駛理我。」
「我上嚟係有嘢同你講呀！」


「嗯？！」快講快走，我真係驚控制唔到自己。
「轉頭…你可唔可以代我送啫喱去機場？」
「咩話？！」我一個轉身，差啲就同身後嘅Sky撞埋一齊。「啫喱？機場？佢…佢要走咩？佢做咩唔陪妳？」
Sky先係俾我個反應嚇咗一嚇，繼而又笑咗出嚟，行到去我張床嘅床邊，好自然就坐底咗:「佢話既然我都知道咗自己想點，留係到又幫唔到啲咩，咁不如早少少返香港，幫我手睇住Knot喎！」
「咁…咁妳自己唔去送？！」望住佢短褲下嘅雙腳係床邊踢下踢下，大佬~唔係咁大誘惑嘛？！
「咁我放咗Kay假嘛，我都去送機咁OC點呀？Cyan返工趕唔切返嚟呀，你送啫喱啦。唏！又唔係無得再見，你代我去咪一樣！」
Oh yeah！我突然有種撥開雲霧見青天嘅感覺。
「其實…」宜家唔問等幾時呀？「其實…妳同啫喱佢…」
「同啫喱咪係好朋友囉！」Sky抬頭對我笑一笑。「嗯…係兄妹先啱！我哋頭先搞清楚架喇，大家都講清講楚。」
「兄妹？！你哋…」


「咪我哋你哋，你好轉頭落嚟喇。啫喱應該都執完嘢，係樓下架喇。幫你哋call咗的士架喇！」話口未完，佢就跳咗起身走咗出去喇。

咁即係點呢？
Ocean就已經放低咗，啫喱又只不過係兄妹，Cyan就更無可能啦，我又真係諗唔到重有咩人Sky會睇得上眼喎！
唔通…機會真係嚟喇飛雲！(註: 80後的你才明白的金句)