Welcome to Knot ~ Season 2: #193. 樂少

聽聞我個好Oppa返咗嚟，我呢啲好兄弟，梗係第一時間要去搵佢，一來我要話佢知呢幾日香港發生咩事，包括嗰個恐怖嘅森木返咗嚟；二來我當然要得到第一手資料，要知道Sky同我Buddy路比宜家點；三來…我好相信Oppa唔會唔記得我啲手信嘅！

放工立即連蹦帶跳咁過咗去搵Oppa，點知…
強嫂竟然話我知，Oppa俾一條女夾咗出去？！
邊個？究竟邊個搶咗我嘅頭啖湯？可惡呀！
因為唔知佢去咗邊，又唔好意思打電話催Oppa返嚟，咁話晒我都唔係佢條女嘛～所以我可以做嘅，就只係坐係舖頭到，等佢返嚟。
等呀等，等呀等，有一刻我真係覺得，自己好似人哋啲老婆咁，一直係到盼夫歸。
啋～型B嚟架嘛，諗埋啲咁嘅嘢！

就係我玩緊自相矛盾嘅時候，Oppa終於返咗嚟啦。真係開心到要跳隻開心舞。


我開開心心咁跳到去Oppa嘅面前，但得嚟嘅，就只有佢一臉嘅驚嚇。
宜家咩意思啫，見到我好唔likey咩？
「Oppa，你返咗嚟香港，做咩唔話我知呀？你頭先又係同邊個出咗去呀？」我開始係到發洩我啲不滿。
「嘩樂少，你咪用啲咁嘅眼神同語氣同我講嘢先得架，等我以為我唔知幾時溝咗你做咗我條女呀。」Oppa嘅說話，有時嚟得都幾狠。
「咩女呀？！我係B嚟架，我唔會同人BBL架。」我點都要捍衛一下自己。「咁我作為你由細玩到大嘅好兄弟，加上我有啲重要情報要同你講，我先咁緊張啫。」
「好好好…我明白。咁你宜家想問咩呢？」Oppa好努力咁想安撫我。
「呀～你頭先去咗邊呀？」
「頭先…去咗碼頭。森木嚟搵我，我同咗佢去傾咗陣。」Oppa好平淡咁講。
「咩話？！？！你已經知道森木返咗嚟？咁我啲情報咪啫係冇用？」
「都係架，咁你仲有咩想知想問呀？台灣同Sky啲嘢，你無理由唔想知架！？」


「…唉…咁你講啦。」嚟到呢個位，我仲有咩好講。

Oppa開始講佢台灣嘅經歷同體會，同時間講埋佢同森木嘅對話。
「總而言之，我同Sky係好兄妹，而森木呢，只要佢唔搞到我同你哋，河水不犯井水，我係唔會理佢係邊到開舖同生活架。」Oppa嘅整段對話，就係用呢句嚟總結。
「咁又係嘅，timing同人，是但一樣唔啱，到最後分手收場，咪仲傷。Oppa你好叻呀！」
Oppa只係笑咗笑，並無答我。
「呀…Oppa呀，我想問多你一個問題。」我呢個好奇小寶寶，當然係有問題就會問架啦。
Oppa飲咗啖水先講：「問啦。」
「我想知呢…你其實返咗嚟咁耐，點解咁晏先返到嚟嘅？」等我試探下先。
「哦！我請咗靖去接我機，咁佢同Taz就接咗我返Silence，我同佢哋飲完嘢傾埋計，就自己返嚟先。我啲行李都係靖到，佢晏啲先車返嚟俾我。」


「吓？！」我好大聲咁叫咗出嚟。
「做咩呀你，嚇死人咩？」
「照你咁講，即係話我唔係第一個知你同Sky嘅事啦。就連手信，我都唔會係第一個有得拎架啦？！」
「嗯…其實呢，我只係買咗啲鳳梨酥返嚟俾大家分架咋。」
「…你！！！！你實在太無良心喇。」我可以做嘅，除咗淚奔之外，仲可以做咩呀？
好！我走……我決定走上去佢房，飲晒佢啲私伙酒！