Welcome to Knot ~ Season 2: #197. Joe

我認為，可以係完成當日煩重嘅工作之後，嚟到Taboo去繼續我醉生夢死嘅生活，都可以算係對自己嘅一種獎勵。
Player？我唔會覺得自己係。我個人認為Player好犯賤，係唔單止同人上床，而且仲係會玩弄埋人哋感情嘅仆街。
我唔會咁賤去玩弄人哋嘅感情。因為我最怕嘅就係女人嘅眼淚，尤其係因我而流嘅眼淚，我真係自問承擔唔起。
SP？太煩喇。我都係女人，我好清楚女人係擁有豐富感情嘅動物。即使限制住自己只係有肉體上嘅互動，日子耐咗，就難免會投放咗感情。而付出咗嘅感情，就好似撥咗出去嘅水一樣，收都收唔返，結果總會係最少有一方受到傷害。
所以極其量，我都只不過係求ONS。
食完就走，你情我願，互不拖欠。啱我！

咁難得我今晚可以係Taboo瘋狂一下，打算「搵下嘢食」，點知就俾一個我睇唔順眼嘅人破壞咗！
本來落到嚟，我好快就睇中咗個女仔。
見個女仔係個舞池到搖得咁勁，不其然令我想像到佢係床上嘅表現。


點知我行到埋去同佢有啲表示嘅時候，佢就同我講:「對不起！ 我今晚看中了另外一位，有機會的話我們下次再一起玩吧！」
講完，佢就行咗去吧枱嗰邊，同一個坐左係到飲酒嘅TB講嘢。可惜講唔夠兩句不個TB就揚一揚手，耍走咗條女。
望真啲個TB，原來就係我最唔likey嘅人！ 真係冤家路窄。

「點呀？！今晚唔駛做你嘅觀音兵咩？」我老實不客氣咁坐咗係佢隔離，仲叫咗支啤酒。
客氣？！我唔覺得對住呢位叫路比嘅Madam要客氣喎。
當年我接咗Sky單嘢嚟做，佢呢隻塘邊鶴就係到嘈生晒，以為自己識好多，隨便就係到吔文吔武。又唔諗下呢到係我地頭。
「我？！我只係同你揮個手，打個招呼啫。點鬼知你自己會走過嚟啫？」路比佢真係太囂張喇！的而且確好乞我憎。
「我自己走過嚟？係你揮手叫我埋嚟架！我見跳到攰先俾面你過嚟坐陣咋！」
「頂你呀！話時話，點解你咁得閒嚟跳舞溝女？！Sky單case你搞掂晒喇咩？」


「哈！你都幾搞笑，我點做嘢需要同你交代？我點做你唔駛理。你不如諗下，我搞掂晒啲嘢，Sky就會返香港，返到去又有十萬隻蜜蜂嗡住佢，你點去追佢好啦！」
「…」路比並冇回答我，反而將手上嘅啤酒一飲而盡。「你都覺得…我應該宜家同佢表白？」
唔係啩！佢竟然會問我意見？！

「我唔鍾意你，正如你都唔likey我，但大家又未至到要害大家。而我宜家問你嘅事，對你嚟講根本無利害關係。 所以你嘅意見，反而有可能係最中立。」
「今次你啱，我buy。」輪到我將手上的啤酒一飲而盡。「可惜我唔再相信愛情，所以我幫你唔到。」

大家都再冇講嘢，只係靜靜咁飲住酒，望住出面舞池嘅人，燈紅酒綠，瘋癲狂放，大家都只係求短暫嘅快樂。
「點解唔再相信愛情？」路比突然問，殺我一個措手不及。
我沉思咗一陣，先諗到一個合適嘅答案:「因為…愛情太重，重到…我抖唔到氣。」