有時我都會係到諗,係咪人馬嘅佢天生就少咗條愛情觸覺?點解身邊所有人都知道…感覺到我係鐘意佢嘅同時,佢竟然好似一啲感覺都冇!?
抑或…其實佢一直都知,只係喺到扮唔知呢?

我唔想再去諗太多。
嚟到台灣嘅呢幾日,我發現我個腦冇一刻唔係諗緊佢,好似係為佢而運作咁。
老實講,我真係有啲攰。
拉開床頭櫃桶,拎起張回程機票望咗望,我就知道我嘅大假所餘無幾。表白嘅事,似乎真係要速戰速決。
下定決心之後,我反而有種安心嘅感覺。
結果上咗床,我好快就瞓著咗。



我係喺一陣咖啡嘅香味底下醒架。
擘大眼第一樣見到嘅,除咗係窗外嘅燦爛陽光之外,就係房入面茶几上嘅咖啡,同埋一個背住咗我、幫我執緊衫嘅身影。
呢刻我覺得自己好似望住一幅識郁嘅畫一樣,好靚!好靚!
陽光係窗口射入嚟,咁啱就落咗係佢嘅身影上面,佢嘅頭髮、背、手、小小嘅側面,都灑咗層金光。
佢嘅動作好輕,帶住一種溫柔。
整個畫面都好夢幻。
我壓制住自己想衝上去從後攬住佢嘅衝動,我同自己講,我要好好記住呢個畫面,即使表白失敗,我都可以擁有一個只屬於我嘅溫馨回憶。

「咦?!醒咗又唔出聲呀?」Sky一轉身,就見到我傻咗咁坐咗係床望住佢。
我覺得自己塊面紅咗:「吓?我…嗯…我費事俾你發現我醒咗,就唔再幫我執衫呀嘛!」


「痴線咩?」佢走咗過嚟坐咗係床尾。呢個咩人嚟架?!一啲危機意識都冇!「 一直以來你都幫咗我咁多,宜家我幫你執下嘢,又有幾閒啫?!」
「嘩!你同我講呢啲?!就算係,你唔係諗住幫我執幾件衫,就叫報答咗我呀?」
「咁唔係你想我點呀?以身相許呀?」
「係我又唔介意呀。你諗諗佢好喎!」
「哈哈哈~我唔想咁快俾你身邊啲妹妹仔溶咗,我仲有兩間cafe要睇住架。」
「巴閉呀你!兩間咁多,仲要有間係海外分店呀!」
「都幾巴閉架!」

跟住大家都無嘢講,靜咗落嚟。
機會似乎嚟喇飛雲!


我稍為深呼吸咗一下:「Sky!不如以後…你睇住兩間cafe,而我負責睇住你!」
Sky佢笑咗一下:「哈~做咩你要睇住我呀?香港警察收陀地呀?」
「我嘅意思係…俾我以後去照顧你。」

Sky佢抬起頭望住我,我當然亦都好認真咁望住佢啦!
但係佢咩反應都無,就只係一直望住我。
我又再吸咗啖氣:「其實我一直都好鐘意你,由係學校初相識到宜家,我都冇變過。見到你因為Ocean嘅事而落晒形,除咗心痛之外,我可以做嘅就係撐住你。後尾啫喱出現,我又會諗其實由佢照顧你係咪會好啲?但係我唔想…唔甘心再係咁,我唔想再只係個旁觀者。不如俾次機會我…俾次機會大家,我哋試下啦,好唔好?」
已有 0 人追稿