Welcome to Knot ~ Season 2: #201

9月。
照道理，9月算係冇咁忙嘅其中一個月份，啲學生返咗學，海邊照常嚟講應該少人啲。
但係今年嘅9月，似乎人人都好忙。我指嘅係全香港，人人都好忙。
朋友之間嘅聚會亦似乎少咗啲暢所欲言嘅歡樂，大家都好似多咗重隔膜咁。有啲話題，都係聚會中成為咗禁忌。

呢個幾星期，我都刻意提早閂門。為嘅就係想早啲出發。通常都係啫喱車埋我、Taz同樂少出去，有時就係搭靖車。
啫喱會拎啲面包餅乾，我就通常會沖定兩三壺咖啡出去。
靖同Taz就會幫手運啲急救用品同水; 樂少就最乖仔，會私伙出錢買自己舖頭啲潛水鏡拎出去。
「喂！你老豆仲有冇話你？」樂少幫手運嘢上啫喱車嘅時候，問咗Taz呢句。
「唓！我都好少見到佢。我返到去佢都瞓咗啦，到我瞓醒起身，佢又返咗酒樓喇。仲邊有機會嘈？」


「你咁都叫好啲呀！我日日局住聽亞Mary姐係到鬧，真係想一拳中暈佢架。」話口未完，樂少就一拳打咗落堆毛巾到。
「仲玩！？快啲啦，如果唔係都唔知幾點去到中環。其他人一早到咗喇。」啫喱一發號施令，所有人就立刻加快手腳，希望早啲可以出發。

其實呢排我都少咗同路比聯絡，一來我知佢好忙，亦好大壓力，二來我都唔想因為其他事而影響咗我同佢嘅關係。
聽聞有啲人直情會同啲朋友因意見不同而unfriend，或者絕交。
真係有咁嘅需要咩？我真係唔知。

不經不覺已經嚟到中環。講真，要嚟到呢到真係唔容易，因為有好多地方都已經行唔到車，所以我哋好多時候都係拎住啲好重嘅物資，好辛苦先行到嚟呢個位。
「喂！呢邊呀！」靖、King同小卒一早就到咗，set好咗個地方俾我哋。
係呀，如果可以嘅話，我同啫喱每晚都會過嚟派下面包餅乾同咖啡，或者補給下其他用品，算係為咗留守係到嘅市民同學生出分力。



今晚我又見到佢。
其實呢幾晚，我都見到佢。
佢係個高高瘦瘦嘅TB，戴住副眼鏡，揹住個背囊，成晚就不斷咁穿梭係人群之中， 拎住部相機四圍咁影相。
「Hi！我可唔可以要杯咖啡？」今晚佢行咗埋嚟同我講。
我笑咗笑，遞咗杯咖啡俾佢，同一時間，佢都遞咗張相俾我。
我接過望咗望，係張黑白相，相入面我見到我自己低著頭，微笑住係到沖咖啡。
我完全無印象幾時俾佢影過。
正想抬頭問佢，就發現本來企係我前面嘅人已經唔知行咗去邊。
我唯有再望下張相，睇下有冇咩線索。


我發現相嘅背面，寫咗行字: 「希望有機會飲到你沖嘅咖啡 -- Earth  2014/9/30」

哈～係喎，我都唔記得咗！
除咗海洋，仲有陸地，係同天空相連架。
我抬頭望上去，呢到全部都係高樓大廈，冇海，唯有陸地同個天相連，一直伸展開去。
Ocean - Sky - Earth。
係咪一種啟示？
 
 

Season 2
完