《１１：６１》在家中見到女鬼請不要斬她: 戰
「你個打靶仔，有人唔做走去做魔物？之前我以為政府會解散我哋，只不過係鳥盡弓藏，兔死狗烹，因為香港要開發嘅地方都開發得七七八八，費事養住我哋。原來係另有內情！
唔俾我哋殺魔物？原來根本你哋就係魔物！」師父生氣地說。
中間那個高官男人突然大笑︰「哈哈哈哈，哩個世界向來都係係弱肉強食嘅世界，點解要選擇做被食嘅人類，而唔揀食人類嘅魔物呢？」
師父很生氣，但仍然冷靜地對我說︰「今日佢哋太多人，打落去都應該應該會兩敗俱傷，睇準時機我哋撤退先。」
此時見到牧盈跑過去出口位置，她應該是想先撤退，畢竟從未殺過魔物的她一次過面對這麼多魔物時應該會覺得很害怕。所以我們就先架上功架，想要保護牧盈先撤退。
誰知牧盈走到門口時，她沒有走出去，而是將門緊緊關起，再鎖住。
這個完全是我意料之外的動作，我們都呆呆地看著牧盈將門鎖起。
我緊張地向牧盈大叫︰「牧盈！你喺到做咩啊？」
聽到我大叫，高官男又笑得很誇張︰「哈哈哈哈哈哈！做得好啊牧盈！你睇吓佢哋個樣，好好笑啊！哈哈哈哈！哩幾個就係全港所有嘅滅魔師喇？」
聽到高官男與牧盈談話，讓我感到相當驚訝，我問牧盈︰「牧盈，你識佢？」
牧盈點點頭。
看樣子牧盈是出賣了我們，我憤怒地問︰「點解要咁做？！」
「點解要咁做？哩個問題我都想問你哋。我問咗好多次，你哋無一個人可以答到我！點解你哋要咁做？點解你哋係都要堅持去殺魔物！
我原本以為，跟住你哋一齊去可以了解到。或許魔物真係好似你哋所講咁十惡不赦，係要見一隻殺一隻！但係我見到嘅，只係一隻一隻無辜嘅魔物俾你哋殺咗！
我同你哋一齊巡邏嘅第一日，嗰隻魔物有無做錯啲咩？無啊！佢只係自己一個坐喺公園到聽音樂。佢咩都無做過，然後你哋就殺咗佢喇！
你知唔知嗰一晚我喊咗幾耐，嗰一晚我個良心不停責怪自己，我問自己，牧盈，點解你唔去救佢。
但係你哋殺完佢之後，仲好開心咁喺到慶祝！我真係覺得好得人驚。
不過我都認為要俾機會你哋，可能我只係咁啱見到一啲平常見唔到嘅野，可能嗰個麻雀魔物只不過係個別事件。
最後係點？你自己都知，每一次，係每一次啊！我都睇唔到隻魔物有殺嘅理由！你答我點解吖！點解要咁做啊！點解一定要去殺魔物啊！
如果滅魔師要做嘅，就係不停咁殺死一啲無辜嘅魔物！咁我寧願哩個世界唔再有滅魔師喇！」牧盈對着我大喝。
原來在巡邏的過程中，一直沒有引導到牧盈過來滅魔的方向，反而越走越遠。直至今天，牧盈已經連同魔物一起對付我們。
現在她對滅魔師已經釀成可以殺死的恨意。
大概是我們因為她是滅魔家族的人就忽略了她的個性，忽略了她的立場。沒有一邊滅魔，一邊教導她，才會有今天的環境。
「世姪女，魔物嘅食物係人類啊！佢哋會食人架！你爸無教你咩？」師父說。
「就係因為佢哋會食人，所以就可以隨便殺喇咩？」牧盈說。
「佢食人我哋仲唔殺佢？咁無辜嘅人咪會畀佢哋食囉！就算唔食，都會吸走人嘅精氣神！都係對人唔好架！」師父說。
牧盈搖搖頭，嘆一嘆氣︰「喺你哋嘅眼中，只有殺殺殺先可以解決到問題。我真係無心機再同你哋班暴力狂講野喇。或者哩個世界，無咗滅魔師會更加和平。」
然後牧盈就爬上貼在牆上的樓梯，往二樓走了上去。
上了去後，高官男的同伴馬上牽她過去。
她走到高官男身邊說︰「我唔鍾意打打殺殺嘅場面，放我走先。」
高官男指揮着他的同伴，帶了牧盈去二樓的一個逃生門，解開逃生門的鎖，牧盈就爬著安全梯離去。
牧盈一離開後，逃生門又再度鎖上。
現在，是我們和高官男的困獸之鬥。
高官男他們有九個人，換言之，我們必須每人同時殺得到三殺魔物，才可以有命離去。
情況很惡劣。
師父對我們說︰「盡量企喺原位打，哩到夠窄，可以一打一。如果啲貨冧咗，就埋牆角打，明唔明？」
「明白。」我們都架起武器準備。
「個打靶仔有人唔做做魔物吓話！隻怪就交俾我處理！世姪女就打嗰三隻精，阿城嗰五隻妖就交俾你！」師父說。
竟然要我同時打五隻妖！對我來說實在太困難了吧！這次大概真的無法活著命回去了。
不過我也向師父點頭說明白，畢竟我們已經沒有選擇，連逃走的選擇都失去了。
我別過頭看一看村姑，我們對視了一下，我對她說︰「我愛你！」
她也笑笑地跟我說︰「我都愛你！」
「多謝你喺我受傷嘅時候咁照顧我啊！」我對村姑說。
「我都多謝你陪我去食蛋糕，我知你根本就唔鍾意食。不過你都要陪我去睇流星雨，雖然我都知你根本唔想睇。」村姑笑著說。
「本來可能唔想架，不過陪你嘅話去邊都無問題。」我說。
上面的高官男已經魔物化，手指變成了鐵爪，他用鐵爪敲打著防跌的鐵欄，發出「鏘鏘鏘」的聲音，吸引我們注意。
「我向來都係好樂意聆聽市民嘅意見，你哋有咩遺言可以同我講。如果可以幫到手嘅，我一定會同我嘅團隊齊心咁去幫你哋。」高官男似笑非笑地說著。
我對着高官男說︰「係咩？我都好鍾意聽高官嘅遺言喎，你又有無說話想同我講啊？」
高官男立即變了個臉，然後就從二樓跳了下來。其他的同伴也立即跟著一起跳了下來。
高官男一跳下來。我們馬上準備好迎戰。
堆積如山的貨物令我們暫時看不見他們，不過也做好萬全的戰鬥準備。
很快，師父那邊的方向聽到了腳步聲。高官男向着我們衝過來。
他的手指都變成了鐵爪，舉起就向師父抓過去。
師父右手舉刀一擋，刀身立即出現火花。師父順勢將他的手一撥，左手的刀立即向他刺進去，高官男一個轉身閃開，順著轉身的力度踢了一腳過去，師父被這一腳踢開，撞向身旁堆積如山的貨物。
師父被踢中的力度不輕，一撞上貨物，貨物立即塌下來。然後就像骨牌一樣，疊起的貨物一棟一棟地跌下來。
沒有了貨物阻擋視線，我們能清楚地看到每一個對手。只是就像失去了保護一樣，我們很有被圍攻的危險。
師父立即站了起來︰「打靶仔吖，咁鍾意做魔物？做怪吖嗱！今日我俾個機會你做靈啊！」說罷，師父就繼續往高官男衝過去。
村姑跳上一箱貨物上，然後就跳過去三位剛好站在一起的精身邊，展開攻擊。
本來我們應該找個牆角躲起來才對戰，不過村姑應該是擔心那三隻精會找上我，所以才主動走了過去，做一個不利的攻擊。
畢竟她也知道，我不是精的對手。何況是三隻。
村姑跳了進去後，就不停揮舞著鐵叉保護自己。
不過我也沒有空閒去看村姑，一隻妖已經朝我攻了過來。我立即揮刀擋住，第二隻又再攻過來。
我立即後跳上一箱貨物上。
腳又馬上受到攻擊，我從貨物又再跌倒落地上。
我一倒在地上，就看到有隻腳想往我頭上踩，我在地上滾了一圈剛好閃過，一閃過就立即站起來，面前已經有爪子想插向我。我又揮刀擋住。
五打一，根本就沒有任何喘息時間！
我只好邊打邊退，接二連三的攻擊，我要不就剛好擋住，要不就用退的步法閃過，好不容易終於可以照師父說的退到牆角。
這樣，我空蕩蕩的背就不需要特別注意了。
也因為我退到牆角，能同時攻擊我的魔物只有兩隻而已，這樣比之前輕鬆得多了。
雖然要擋住攻擊比之前輕鬆，但不能有任何失誤。因為我已經沒有退路了。