「...唔該哂,bye bye!」阿瑜講完唔該之後就落左車啦,望住佢嘅背影真係好唔捨得。
 
「...唔捨得人牙?仲唔開車!」咦...喂,乜我講左出口咩,點解阿妹會知我諗緊咩架?
 
「...痴線!」我冇望到阿妹,一邊講一邊開車。
 
「...我第一日識你牙,你估你呃到我咩!」阿妹繼續潤我,好似已經估到哂我諗緊咩咁。
 
「...咁...靚女緊係會望多兩眼架啦,好正常姐。」我繼續兜緊,
同時帶返起副(黑超)盡量唔好比阿妹見到我緊張嘅眼神。




 
「...唔只兩眼囉,頭先你揸緊車果陣喺後鏡係咁𥄫過離,
咁明顯你估我睇唔到牙,連阿瑜都睇到啦。」阿妹好似讀心神探咁,
不斷講出我頭先嘅一舉一動,直頭係想叫我認左佢咁款。
 
我冇出聲...似係默認左咁,部車好快就返到我地屋企樓下嘅車場,
泊好車後...就打算行返屋企啦。
 
「...咦...係喎,阿媽今晚唔煮飯喎...唔記得同你講添!」
正當我想行返屋企果陣,阿妹忽然醒起。




 
「...吓...唔早講!」我問。
 
「...你唔早啲問!」阿妹妙答。
 
「......!」我o 左,唔知比咩反應佢好!
 
「...我地自己食囉!」阿妹一邊講,一邊拉住我落左商場,
一向對食冇咩要求嘅我唯有就範。
 




阿妹帶住我行左入一間日式嘅西餐廳,
坐左埋一張二人卡位度。
 
「...唔該...3號餐蛋包飯,阿哥你食咩呀?」
阿妹睇都唔洗睇就已經叫左個餐,好似好熟依度咁。
 
「...是但啦!」依間野應該開左冇幾耐,
所以我就真係未食過啦,完全唔知到底係食咩嘅!
 
「...咁我幫我話事啦吓,唔該...比多個雜菇焗意粉。」
阿妹好快亦都幫我叫埋。
 
「...係呢...阿媽做咩唔煮飯嘅?」我問阿妹。
 
「...唔知喎...好似話同老豆出去二人世界喎!」阿妹諗一諗之後講,




真係小有,佢兩老一向都冇咩情趣架喎,無啦啦出去都有嘅。
 
「...係呢...果個阿瑜,就係介紹你入去做果個牙?」
等緊食果陣,我心思思忍唔住向阿妹索緊料。
 
「...嘻嘻...都話你對人有興趣架啦!」阿妹又對住我奸笑啦。
 
「...唔好咁多廢話啦,咁係咪姐?」我繼續追問。
 
「...係呀...,仲有啲咩想知呢,我嘅好大佬?」
阿妹依家雙手拓住個腮,對眼轆到勁大咁望住我。
 
「...乜你有個咁嘅朋友,點解我從來都唔知架?」我問。
 
「...其實阿瑜係我以前中學嘅師姐離嘅,果陣佢係我地社嘅社長離架,




風頭簡直一時無兩呀,我啲咁嘅Small Potato當時邊會埋到佢身吖。
係最近...同個friend出席舊校聚會先見返佢嘅,果晚同佢傾開計先發覺原來同佢咁啱傾喎,
所以之後先friend左架咋。跟住早幾日同佢傾電話傾開我公司啲唔開心野,
咁啱阿瑜又話佢公司請人喎,咁咪介紹左我去見工囉。」阿妹憶述完畢。
 
「...哦!」我呆左咁哦左一聲。
 
「...係咪想追人先?係嘅話我作為你嘅好細妹實會幫到盡架喎!」
阿妹控左個頭埋離問,野食亦都同時送到。
 
「...咳...咳...,食野啦...講咁多。」我咳左兩聲,之後就hea左阿妹個問題啦。
 
之後返到屋企,我個腦基本上,全晚都係諗住阿瑜。
但係依一刻嘅阿瑜,對於我離講係可遠觀而不可褻玩嘅女神,
唔好話係追求吖,連做朋友都真係唔係好敢。




 
唉....自從七年前同對上一個由讀書時期開始嘅女朋友分左手之後,
我嘅性格就變得孤寂,加上我嘅工作關係,生活圈子就只係得返同事。
同女性接觸嘅機會就更加小,惡性循環之下,我變得更難面對女性,
所以依家基本上除左同事之外,我都唔係好敢主動接觸女仔。
 
好唔容易又到第二日啦,琴晚真係好辛苦,我訓喺張床度個心囉囉攣咁典左成晚。
今日係星期六,五天工作嘅關係今日唔洗返工。訓醒都差唔多中午十二點啦。
 
「...吖!」伸伸懶腰,起左身之後,我就走左出廳挨左落張梳化度呆坐。
 
老豆老母琴晚好夜先返離,但係今朝又一反常態一起身就唔見左人,
而阿妹就喺廁所沖緊涼似係準備去街咁。
 
我同平時一樣挨左喺度打左陣機,其實同以前嘅生活真係冇咩分別,




唔通我真係要搵返個人生目標先得?
 
「...坐過小小啦...阿哥。」Hea左一陣,阿妹亦都喺廁所沖完涼出離,
同平時一樣張啲衫灘哂喺梳化度嚫緊。
 
「...~情迷不意亂 共坐太空船~妳飛多遠陪伴多遠~縱已知 明明似非有緣~
劇情 無人可扭轉~」阿妹果部放左喺梳化嘅iPhone 忽然響起。
 
「...阿哥...無手呀,幫我聽住先啦。」拎住件衫唔知搞緊咩嘅阿妹離遠叫我,
於是我就幫佢接聽左個電話啦。
 
「...喂...!」我喂,但係冇人應我。
 
「...喂...!」於是我再喂多一次。
 
「...你係...?」電話傳離一把少女聲,我認得把聲係sonia。
 
「...er...你等等先!」唔知講咩好嘅我即時趷左起身,
拎住個電話行左埋去阿妹身邊隊左個電話落佢塊面度。
 
「...喂...係,果個我阿哥離架,就出得門口啦,點半香港仔(利港)等吖嘛...okok,
好啦,好啦,轉頭見。」阿妹講完我就幫佢收左線。
 
「...阿瑜離架?」我問。
 
「...係呀。」
 
「......去邊呀?」
 
「約左班friend去中山公園野餐呀!」
 
「...哦...!」我哦左一聲,野餐?乜依家啲人咁崇尚大自然架咩?
 
「...係喎...,係阿哥你認識阿瑜嘅好機會呀!」阿妹忽然大叫。
 
「...吓...咩呀?」
 
「...依家阿哥你有部靚車,可以車我地去野餐喎!」...且...仲話咩好機會喎,講到尾咪又係想痴車坐。
 
「...你諗吓喎,可以車住阿瑜周圍去,朝夕相對...容乜易日久生情呀,
到時一個唔覺意做埋情侶....然之後呢....」
 
「....得啦...得啦,怕左你啦(火、頁)。」我打斷左阿妹,因為佢真係好鬼死長氣。
 
就係咁...我就屈服左喺阿妹嘅淫威之下,洗完面刷完牙之後,
求其換左套t恤牛仔褲就同阿妹一齊落街攞車啦。
 
有我依個職業司機喺度,未夠點半鐘我地已經到達香港仔(利港)。
我張部車泊埋一邊,阿妹就行左去同佢啲friend匯合。

坐喺部車度諗諗吓,我記得阿妹讀書果陣啲friend好似全部都係(豬西火雞批)離架喎,
有個仲四眼鋼牙添...諗起都打冷震。