(8)

唔理咁多住啦,行完一日成身散哂,
拿拿臨拎好衫褲即時衝入廁所沖返個靚涼先。
 
「...喂...搞錯呀,打尖!!」嘻嘻...比我截糊嘅阿妹,
喺廁所門口拍枱拍櫈緊...鬼叫佢生得矮牙,對腳咁短係慢啲架啦。

沖涼果陣隱約聽到阿妹喺出面傾電話嘅聲,到我沖完涼出到離之後,
阿妹突然企左喺廁所門口,氣定神閒咁望住我,個樣面帶驚恐,


但係又有啲興奮咁,到底咩事呢?
 
「...鬼上身呀你?」我問。
 
「...衰人...!」阿妹無啦啦鬧我,到底咩事呀大佬?
 
「...咩呀...痴左線牙你?」我好疑惑咁問。
 
「...阿瑜講左比我知啦,仲扮野!!!」吓...阿瑜?
 


「...佢講左啲咩呀?」我好驚訝咁問。
 
「...六合彩頭獎...二...千...四...百....萬!」無啦,阿瑜終於都記得返我啦,穿崩啦今次。
 
「...吓...er...」我支吾以對。
 
「...我都覺得奇架啦,無啦啦買左部咁靚嘅車,過份呀!!!一世人兩兄妹,點解唔可以話比我知喎!」
阿妹越講越激動,講到直頭想喊出離咁款。
 
「...唔...唔係呀,我諗住安定左落離先講姐,唔好嬲啦...妹頭!」


我口窒窒咁搭住阿妹膊頭講沙哂冧咁。
 
「...衰人離架,你驚我分你啲錢咋嘛,我唔會囉!!」
阿妹繼續鬧我,搞到我都有小小內疚添。
 
「...點會呢,我最錫阿妹你架啦,乖啦...唔好嬲啦!」就係咁,我氹左阿妹幾個字,
佢先信我唔係驚佢分錢。

之後我話送部iphone比佢,佢即時開心返哂,
你都咪話唔現實呀,不過其實都好正常嘅,係人都會啦。
 
「...係啦,頭先阿爸打離話喺樓下(喜起)攞左位食飯喎,叫我地兩個落去。」冷靜果後阿妹突然醒起。
 
「...阿爸阿媽佢地知唔知?」阿妹繼續問。
 


「...緊係唔知啦,唔通我淨係呃你一個咩!」我好緊張咁答,費事佢又嬲呀。
 
「...係牙!」阿妹回應。
 
「...係呢...阿妹,你覺唔覺依幾日,佢兩個好似怪怪地咁呀?」之後我問。
 
「...點怪法?」睇阿妹個樣,似係完全察覺唔到。
 
「...兩日都失哂蹤咁,又唔煮飯...你唔覺得好奇怪咩?」我好認真咁分析緊比阿妹聽!
 
「...你咁講又好似係喎,點都好啦,一陣問吓佢地咪知囉...行啦。」
阿妹真係好單純,完全唔覺有啲咩問題,而我就有小小擔心。
 
落到樓下飯店,見到佢兩老坐左喺入面嘅一張四人枱度,
阿媽就洗緊啲碗筷,而老豆就拎住個餐牌喺度睇緊叫啲咩餸食,


身邊個位仲放左好多個紙袋一袋二袋咁,似係啱啱shopping完返離。
 
「...到左拿...坐啦,想食啲咩呀你地?」阿媽一見到我地就面露笑容好熱情咁,好似有啲陰謀咁喎!
 
「...嘩...阿媽做咩買咁多野呀?幾袋衫褲鞋襪又花膠咁,發左達咩!」講到依度,阿妹望一望我,
似係諗緊我到底有冇講大話呃佢,其實一早話左比佢兩老知咁。
 
「...係囉!」我當然做出一個無辜樣回應啦,因為我根本就冇講過。
 
「...嘻嘻...你地過離吖!」阿媽笑笑口,懶神秘咁伸手叫我地伸個頭埋佢耳邊,
於是我同阿妹就順勢伸左個頭埋去啦。
 
因為阿媽講得真係好鬼細聲,所以喺側邊嘅我真係完全聽唔到,
只係見到阿妹聽完之後個樣再一次黑哂,之後用仇視嘅眼神望住左我。
 


「...仲話冇呃我,阿爸阿媽都知啦,係得我一個唔知!「阿妹好嬲咁望住我講。
 
吓...乜老豆老母知道左咩?幾時知?點解知架?依家真係到我打哂問號啦。
我同阿爸阿媽你眼望我眼咁,大家個樣都相當疑惑,好似唔知發生緊咩事咁。
 
「...知咩呀?」老豆開聲問。
 
「...阿哥中左六合彩吖嘛,阿媽啱啱咪講左知囉!」阿妹大聲講。
 
而家我地一家人全部都靜哂,你望我望我,同時亦觀察吓其他人到底有冇聽到。
好彩飯店通常都比較嘈,望落啲人都好似冇咩反應咁,應該聽唔到。
我地dear air左十幾秒之後,阿爸終於都開聲講野啦。
 
「...阿聰中左咩?」阿爸細細聲問阿媽。
 


「...我唔知喎!」阿媽亦都好疑惑咁回應,
搞到依單野更加鬼異,佢地到底搭錯左邊條線呀?
 
「...咩呀,阿媽你啱啱話我地屋企中左架嘛,仲話咩搬屋嘅!」阿妹反問。
 
「...我話你老豆中左呀!」阿媽回應。
 
「...吓!」
 
「...吓!」我同阿妹同時大叫,依家o哂嘴咁,你眼望我眼!
 
「...咪住先,搞清楚先,阿聰中左咩獎?」阿爸好冷靜咁問阿妹。
 
「...頭獎囉!,咁老豆呢?」阿妹仲係戇居居咁。
 
「...吓...原來阿仔同你老豆一樣中左頭獎?」阿媽興奮到爆左出離,
唔拿係咁橋吖嘛?兩父子一齊中六合彩頭獎?
個機率應該難過打飛機真係打左架飛機落離囉,做戲咩依家。
 
太奇幻啦依壇野,經一輪求證後,證實原來我同老豆喺同一期中獎,
當日分左我二千四百萬果個,原來就係我老豆本人,
對唔住我要收返當日咒佢生仔無屎忽果句說話。
 
食完飯之後返到屋企,老豆同我地講,原來依兩日佢地就係去左睇樓,
而且啱啱已經比哂錢買左一個八百呎左右嘅豪宅單位。
 
「...吓...咁快?」阿妹問,因為阿媽啱啱話上手業主係炒家,早兩年新盤買入之後完全冇住過,
就咁放喺度到依家老豆接左,話啲裝修好好,新嘅一樣唔洗點搞就可以搬入去住喎,
不過老豆係裝修老行專,佢講得話好野,都唔會差得去邊嘅。
 
「...係呀,樓都收左架啦,約埋搬屋公司,個零兩個禮拜就可以搬啲野過去。」老豆答。
 
「...咪住先...搬去邊度呀?」我問,因為估唔到老豆會決定得咁快,
比著我就可能拖好耐都決定唔到,搞到我有啲招架唔住添。
 
「...將軍澳,天晉!」老豆答。
 
「...吓...新界?返工咪好麻煩囉?」我都未出聲,阿妹已經率先彈左出離。
 
「...阿女,仲係十幾年前咩!我了解過架啦,作為新市鎮,
將軍澳算係發展得相對成熟,周邊配套又多,掙係公園都有幾十個,
最緊要係咩呀?仲喺低水吖嘛,比起香港區同九龍區啲豪宅樓價差成截,
又唔會好似元朗上水果啲咁遠,真係一個唔錯嘅地區。」老豆分析得相當好,
睇個勢佢已經做左一段時間嘅資料搜集,成個地產經紀咁,講完之後搞到我都覺得果度幾好咁添。
 
估唔到老豆買樓就好似買棵菜咁,幾日就搞掂,可能年紀大啲人生經驗豐富啲做一個決定都唔同啲。
因為間屋喺大家住嘅,所以我話比返一半錢,間屋原來九百幾萬,有成差唔多八百呎,
計返都係萬鬆蚊呎又真係幾抵嘅,加上我同老豆兩份,圍返都係攞四百幾萬出離,
就已經解決哂我依幾日諗極都諗唔掂嘅難題啦。
 
沖完涼之後,我坐左喺梳化度睇電視,阿妹就跟住我尾入左廁所沖涼,
老豆小有地走左出離,坐左埋離梳化同我一齊睇電視喎。
 
「...阿仔...啤啤佢呢!」老豆喺雪櫃攞左兩罐啤酒出離,跟手隊左罐比我。
 
「...thx!」我接過啤酒,諗落都真係好耐都冇試過同老豆兩個坐喺度傾計。
 
「...啞....!估唔到我都有咁嘅一日!」老豆一口飲完大啖啤酒之後,好感觸咁講。
 
「...冥冥中好似有主宰咁,有啲野係你嘅此終都係你嘅!」
老豆單手揸住啤酒,企左喺窗邊,用個背脊得住我講。
 
「...老豆做咩今日講野咁玄嘅,點解咁講呢?」我好奇咁問。
 
「...你知唔知老豆廿幾歲果陣,有個睇相佬話我會發達?」
 
「老豆...個個睇相佬都係講呢啲架啦。」我有啲質疑,
因為我一向都唔信依啲野嘅,我覺得命運此終係掌握喺自己手嘅。
 
「...你可能會話我迷信,但係到目前為止,果個睇相佬講嘅野都差唔多中哂喎!」
老豆突然開左認真mode,睇離有古仔聽啦。
已有 0 人追稿