「...諗緊咩呀?諗到咁入神!」 
 
「...吓...咳咳....冇...冇野呀...哈哈!」思敏原來望住左我,嚇到我差啲連水都噴埋出離!
 
「.....!」依家到思敏唔出聲,單手拓住下巴,
眼定定望住我個樣望到實一實,唔知又諗緊啲咩咁。
 
「...吖...聰哥,其實你同文蔚係咪mix離架?」思敏竟然會問出一個咁嘅問題!
 
「...何以見得呢?」我好淡定咁飲住杯檸茶反問思敏。




 
「...因為你地輪廓都好深囉,而且聰哥你對眼又大、個鼻又高喎,哈哈...不過連黑眼圈都勁過人。」
思敏不停講出我嘅臉部特徵,其實佢都形容得幾好嘅,不過我地唔係mix囉。
 
「...唔係mix囉,我鄉下喺廣東!」我答。
 
「...哦...!」
 
「...係呢,唔見你陪女朋友嘅?」思敏真係好多問題,成個問題少女咁。
 




「...er...我冇女朋友嘅。」我都想有,可惜唔知點開口追阿瑜囉。
 
「...哦...,記唔記得下個星期六我生日先?」問題一浪接一浪。
 
「...記得!」其實佢唔講真係唔記得。
 
「...算你啦,依家呢...決定離我屋企搞大食會呀,星期六下午兩點開始,記住早啲到呀!」
思敏再三叮囑,睇離佢真係好重視依個生日會。
 
食完野...思敏繼續捉住我陪佢行街,買衫果陣又`係咁問我意見,




搞到其他人以為我地係情侶咁...。行到七點幾,因為思敏話要返屋企食飯,
所以我地就各散東西啦。佢就走左去坐接駁巴士返日出康城,而我就行返上樓啦。
 
第一日搬離就係唔多熟路,成日都要睇水牌,仲間中行錯路行返轉頭添,
搞左一輪終於行返去自己果座樓啦...但係當我行到大堂門口果陣先記得自己其實未有主戶証,
而且連門口密碼都唔知囉!
 
「...阿姐...唔該!」喺門口徘徊左一陣之後,我決定撳掣叫管理員啦。
 
「...噠!」阿姐撳掣開左度門比我,之後我就推門行左入去啦。
 
「...先生上幾樓架?」阿姐行左埋離問我。
 
「...13a呀!」我一邊講一邊步往電梯方向。
 




「...麻煩你登一登記先啦!」阿姐好緊張咁叫住左我!
 
「...阿姐我喺度住架,登咩記呀!」我用無奈加悔氣嘅態度回應阿姐,
唉...平時送貨都成日比人叫登記架啦,但係今次唔知點解真係無名火起,
話哂都係自己屋企,點都要威返次!
 
「...未見過你喎!」阿姐望住我講。
 
「...新搬離架!」我繼續悔氣。
 
「...你等等先!」阿姐有小小緊張咁call人離,睇離佢話唔到事,
亦都估唔到依度部安會咁嚴謹,不過諗深一層都係好事離嘅。
 
無辦法之下我企左喺大堂等,途中我call左老豆落離,
老豆落到離,一個睇似高級小小嘅男保安亦都出現。




 
「...輝哥牙,依位先生話佢新搬離架喎!」阿姐向男部安匯報。
 
「...哦...係咪13a呀?」輝哥話頭醒尾,
高級啲真係高級啲,好好禮貌咁問我。
 
「...係呀...今日搬離架!」老豆回應,順勢隊埋張主戶証比佢睇。
 
「...哦...我記得,張生吖嘛!」輝哥睇離真係認得老豆咁款,笑到四萬咁口。
 
「...係呀,依個我個仔離架...唔記得比張住戶証佢姐。」老豆對住輝哥講。
 
「...哦...明白明白兩位張生,ok架啦!」保安輝哥同阿姐交代完之後,我同老豆就上返屋企啦。
 
返到去...所有野都執好哂咁濟,阿媽坐左喺度睇電視,阿妹就喺間屋度不停自拍。




坐左一陣之後,等老豆沖埋個涼,我地全家又落返樓下食晚飯。
今次老豆比左張住戶証我,出入有張証拍一拍咭其實都幾方便嘅,
但係點都唔夠我以前喺公屋用(人臉識別系統)方便,即係啲阿姐見到認得你就開門呀!
 
食完飯...同佢地喺商場周圍行吓,熟悉吓附近嘅地方,
十點零鐘我地就返左屋企。
 
返到去都係執吓野咁,十一點零鐘,思敏例牌打離搵我傾左陣電話,
十二點左右我就上床訓覺啦。
 
張床真係好大,應該有五乘六呎半,我攤左喺度大字形咁訓都仲有鬆。
雖然舒服,但係此終第一晚訓...真係訓極都訓唔著,望住間房空蕩蕩咁,
忽然好掛住阿妹嘅鼻鼾聲,覺得好空虛、好寂莫,好凍...。
 
最後我典到三點幾先訓得著,之後星期日我地都係同琴日一樣繼續執野,




好快又到左星期一。今日係我第一日喺將軍澳返工,本來諗住搬左入新界好偏僻,
但係估唔到最後只係用左二十分鐘,就返到喺柴灣嘅公司,比起以前喺香港仔足足快左十幾分鐘。
今日返工繼續乏味,我開始厭倦咁嘅工作環境,好想快啲可以離開依度。
收工之後...原本諗住去跑馬地接阿妹,但係差唔多去到果陣,佢先話要上堂冇咁早走到喎,
無辦法之下,我揸住部車停泊左喺跑馬地黃泥涌道公廁附近。 我坐左喺部車度,
一邊撳電話一邊等阿妹,本來都相安無事嘅,但係坐左一陣之後,
眼前突然出現左一個我無法相信嘅景象....
 
一男一女喺我正前方出現,由左至右咁步向跑馬地遊樂場方向,果個女仔...正正就係阿瑜,
而男嘅...竟然係一個廿到尾,個樣睇落豪不起眼嘅死肥仔....講得貼切啲可以用其貌不揚去形容添...
而且佢兩個仲要係拖住手咁行....點睇都係情侶關係...,喺呢個moment...我要爆啦。
個心真係好唔舒服,真係好葡萄....個心就好似比人用把刀仔挖左出離,
再揼落個深淵入面,睇左自己個心不斷咁沉落去....,雙眼開始通紅....,
但係我忍住淚水...我入左廁所洗左個面,冷靜落離之後...我行返出去。
但係...天意弄人...當我行到出門口果陣,阿瑜又唔知點解會企左喺度....,
見到我仲好閃縮咁極力逃避我眼神,我同佢對望左幾秒之後,我就返左上車。
 
上車之後阿瑜一直都唔敢正視我,等到佢個肥仔男友喺廁所出返離之後,
佢地兩個就再一次消失於空氣當中。坐多一陣...阿妹打返比我之後,我就接阿妹返屋企啦。

果晚我成晚都訓唔著,腦入面全部都係阿瑜同個肥仔嘅畫面,之後幾日我都冇哂心情,
但係諗諗吓,阿瑜咁靚女有男朋友其實一啲都唔出奇吖,點解我要咁唔開心呢,
就算佢有男朋友,我都可以向佢追求架姐,男未婚女未嫁...公平競爭冇問題架!
 
就係咁...我決定就算輸都要輸得好好睇睇,試過追過唔得...起馬我都盡過力吖,
但係試都唔試就放棄,我諗我會後悔一世。
好快就到左星期六,因為我知道阿瑜會出席思敏嘅生日會,
所以我揀左今日出手....。
 
生日會兩點鐘開始,但係因為此終都係思敏生日,所以點都要買份禮物去架啦。
我喺樓下商場行左好耐都諗唔到送乜,到最後我求其買左盒朱古力比佢。
 
揀好禮物,我就膽粗粗咁一個人過去啦,其實日出康城都真係好近,
搭港鐵....十零分鐘就到達。思敏一早已經whatapp定地址比我,我跟住指示上到去一個單位。
一出𨋢....門口已經擺放左好多對鞋喺度,好啦...應該都唔會錯啦。
 
「...叮噹....叮噹!」我撳響門鐘。
 
「...嚓....wu....哈哈!」開門嘅就係思敏本人,屋入面亦都傳離人群嘅嘈吵聲。
 
「...聰哥...你離拿!」思敏好興奮咁歡迎我。
 
「...哈哈....生日快樂!」我笑笑口咁隊左盒朱古力比佢,之就跟左佢入屋啦。
 
一入到去就見到阿珠、維維同兩個男仔喺度玩緊猜猜畫畫,睇佢地嘅行為應該係佢地男朋友。
 
「...咦...阿哥咁遲嘅!」係阿妹,佢同阿瑜啱啱喺房行左出離。
 
「...係呀,買禮物買耐左!」其實係喺屋企hea耐左,
不過我都真係揀左一陣禮物架,所以都唔算講大話架。
 
阿瑜對住我笑左一笑,之後就走左埋去同佢地一齊玩猜猜畫畫。
本來諗住匿埋一邊撳電話嘅我,比思敏捉埋我過去同佢地一齊玩,
我同阿瑜、思敏、阿妹一隊,而阿珠、維維兩對男女就一隊。

玩緊果陣思敏對我熱情就緊架啦,但係唔知點解...對我忽冷忽熱嘅阿瑜,
喺依一刻又突然熱情起離喎,串我畫得樣衰之餘,間中我估到佢畫緊乜果陣,
佢又會好興奮咁同我擊掌喎,有時又會張個身輕輕挨埋我度,搞到我真係有啲摸不著頭腦啦。

玩到六點零七點就開始食野,soso怪魔阿珠叫左好多野食到會,又pizza又刺身咁,
大家自由發揮,食野嘅食野,打機嘅打機,思敏話佢啲屋企人今晚過左澳門玩,
所以玩夜啲都得,食到九點鬆啲思敏就開始切蛋糕同拆禮物。
真係估唔到...我求其買嘅果盒朱古力,竟然會係思敏最鍾意嘅牌子,
氹到思敏勁開心,連阿妹都以為我係有備而離。
 
 
拆完禮物都差唔多十一點啦,阿瑜話要走先,於是我就自告奮勇話要送阿瑜落去搭車啦。
由出門口到入𨋢我都唔知講咩好,我地dead air左一陣,
行到去港鐵站之前...我終於鼓起最大嘅勇氣啦。