中左六合彩頭獎四千八百萬，依家唔知點算?: 17
「...嘻嘻...唔該聰哥！」我遞左枝水比思敏，再遞多枝比佢阿哥。
「...喂...唔該...唔該。」思敏阿哥唔該前唔該後，睇得出佢係一個好識soso嘅人。
「...頭先唔好意思呀，搞到你個friend。」我有啲唔好意思咁講。
「...唔洗理佢，佢份人係咁，郁啲就炆。」思敏阿哥回應。
「...係呢，都未知點稱呼添！」我講。
「...佢叫黑仔呀...阿哥！」阿妹搭咀。
「...哦...黑哥，你好...你好！」我講。
「...黑仔得啦，都係一句姐！」黑仔有啲唔好意思咁回應。
「...得閒咪落離同我地玩吓囉，我地個個星期都有場喺度。」黑仔好客氣咁講。
「...喂...阿盤，去寶盈食（彩興）喎！」黑仔叫住行緊去門口方向嘅阿盤。
「...唔啦，聽日（少林）練波呀！」阿盤冇咩表情咁回左句就掉頭走左啦。
之後因爲黑仔叫埋我一齊食飯，所以我地大部份人都去左一間叫彩興嘅車仔麵檔。
原來間野就喺我屋企對面，比較平民化...無華麗嘅裝修，但係啲野食都真係得得地喎。
我叫左一碗佢話佢地自創嘅挍挍麵，啲麵好煙韌，彎彎曲曲咁果然有手製風味，
個湯底佢地話用豬骨整，我叫左我鍾意食嘅蟲草花加豬潤，
再整杯冰凍羅漢果茶，相當滿足。
估唔到自己屋企樓下就有啲咁好嘅食店，又長知識啦！
食完之後，我就同阿妹一齊返左屋企，
沖完涼Hea左一陣，思敏又準時打比我啦。
「...嘻嘻...做緊乜呀？」思敏問。
「...冇呀，啱啱沖完涼咋嘛！」我答。
「...攰唔攰呀，我見你頭先走果陣隻腳有小小趷喎！」思敏真係好細心，
咁細微嘅野佢都留意到，鬼咩十九幾年冇做運動，頭先未打完已經抽抽地筋啦。
「...哦...冇咩，小小抽筋姐。」我答。
「...咁就好啦，我幾擔心你呀，對唔住呀...要你陪我搞成你咁。」
思敏無啦啦對號入座同我道起歉上離喎。
「...吓...傻啦，邊關你事姐...係我自己太耐冇做運動咋嘛！」我好緊張咁回應。
「...而且...運動對身體好吖嘛，哈哈...所以思敏你叫我去做多啲運動就啱架啦。」
我繼續講，務求令思敏冇咁內疚。
「...真係嘅？」思敏問。
「...嗯...緊係啦！」我答。
「...咁就好啦，遲啲我仲諗住同聰哥你一齊去跑（渣打十公里）添！」思敏好開心咁講。
「...吓...十...十公里！」我口都窒埋，大佬十公里？唔好講笑啦...
一公里我都想死啦，仲話跑十公里...思敏咁睇得起我呀！
「...係呀，我已經跑左幾年架啦，幾萬人一齊跑好熱鬧個feel好正架。
如果下年可以同聰哥你一齊完成長跑...嘻嘻...咁你話幾好呢！」
思敏嘴角含春咁邊笑邊講。
「...乜你咁跑得架咩？跑到成十公里，仲要跑左幾年添！」我有啲驚訝咁問，
大佬平時男仔跑到十公里已經勁架啦，一個咁細粒嘅女仔都跑到喎，
搞到我有啲自卑添。
「...大學果陣入左跑會吖嘛。」思敏答。
「...吓...跑會，點解嘅？」我講。
「...吓...係...因為...想減肥囉。」思敏答得有啲尷尬，
原來佢就係果陣開始減肥嘅。
「...開頭都跑唔到架，頭幾次跑幾分鐘已經想死啦，但係我同自己講，
點都要頂落去，過左兩個星期之後我開始跑到半個鐘啦，期間我仲開始節食，
聰哥你知唔知我試過四日唔食野呀？」思敏憶述中。
「...四日？會死人架喎，你唔餓架咩？」我好驚訝咁問。
「...第一日係最難熬，因為你無時無刻都想搵野食，死頂到第二日，
因為我仲走去跑步，所以差啲暈低喺運動場，第三日開始...身體開始適應...
冇咁肚餓，不過就成日都會好攰好眼訓咁，到第四日已經完全冇哂肚餓嘅感覺啦，
不過見到自己四日輕左成十磅我都真係驚會死，所以到第五日就即時食返野啦。」思敏憶述完畢。
「...嘩...你真係好有恆心，點解會無啦啦想去減肥嘅？」我問。
「...因為...一個人嘅一句說話囉。」思敏突然變得好認真。
「...咩...咩說話呀？」我問。
「...佢...佢話佢唔鍾意肥嘅女仔。」思敏口窒窒咁講。
「...你以前啲男朋友講架？」我戇居居咁問。
「...聰哥...你係我第一個男朋友。」思敏繼續口窒，乜原來...思敏佢未拍過拖架？
咁講我咪即係佢初戀？吓...咁果晚咪即係佢...佢嘅...初夜...一個處女...
就咁糟蹋左喺我手上...突然覺得超級內疚，好想即刻搵個窿捐囉。
「...乜...乜係咩！」我好緊張咁回應。
「...記唔記得中三果年，我成日都上你屋企呀！」思敏繼續講。
「記得...果排你成日上離。」我答。
「...有一日你收工返到離我仲未走，之後無意中聽到你同人傾電話，
當時你對住電話講左一句（我最唔鍾意肥妹架啦...咪搞我。）」
思敏講到瀝瀝在目咁，但係我就一啲印象都冇啦。
不過事實我又真係鍾意偏瘦嘅女仔嘅，我諗我唔會係好重口味掛，
大部份男仔都唔會鍾意偏肥架啦。
「...乜...乜我有講過咩，哈哈...一啲印象都冇」
原來思敏就係因為我一句說話，就走去地獄式減肥，
唔通果陣佢已經...？
「...可能果陣喺你眼中，我只不過係一個豪不起眼嘅細路女，
但係喺我眼中，聰哥你...，我....我...都唔知點講，一舉手、
一投足，甚至乎係一個笑微，都深深咁吸引住我，我唔知係幾時開始...，
總之就係中三果年，我鍾意左聰哥你......」講到依度...思敏停左落離，
而我亦都唔敢出聲，我地dead air左十幾秒....
「...聰哥？」思敏開聲叫我。
「...係...係。」我緊張回應。
「...哦...幾驚悶嚫你，仲以為你訓著左添！」思敏講。
「...點...點會呢，哈哈...」我繼續扮笑，其實滴緊汗....。
「...總之依家有聰哥你愛我，我就好滿足架啦，
之前果啲艱辛又算啲咩吖！」思敏用好幸福嘅聲線講。
「...哈哈...緊係啦，緊係啦！」思敏呀，其實我唔係你諗到咁好架咋...。
同思敏傾到十二點左右就收線訓覺，喺床上面我輾轉反側，一方面覺得受寵若驚，
另一方面又覺得非常內疚，喺依一刻我好痛恨我自己無本事去解決，
點解要咁拖泥帶水...但係諗諗下，我係咪可以嘗試去愛思敏呢？此終都係血肉之軀，
人地對我好，我點解唔可以對人好啲呢？諗到依度...我決定去試吓接受思敏嘅愛。
第二日起身我照常返工，今日老豆話要去（公司註冊處）幫間新公司做註冊喎，
所以返工前我就車左老豆出去啦。老豆張間公司名改左做（聰蔚裝修工程、室內設計有限公司），
我諗唔洗講大家都知點解啦。
車完老豆之後我就返公司，去到停車場我如常泊車，
但係當我泊好部車準備喺停車場行返過公司果陣...
「...砵...！」停車場入面，突然有部黑色(Benz b200)砵我...，
到佢攪低車窗伸個頭出離我先知道依個人原來係....