「...為你送上嘅係一隻好舊嘅作品,最近要重返香港樂壇嘅男神,
謝霆鋒早年嘅國語作品(點歌),跟住落離...為大家送上第二位聽眾所點嘅歌!」DJ嘅旁述,
因為夜嘅關係,十五分鐘左右,我就已經返到屋企樓下嘅停車場。
 
 
返到屋企已經成點鐘,所有人已經訓哂,我一個人坐左喺房入面嘅露台度飲悶酒,
其實我係一個唔多鍾意飲酒嘅人,對上一次隊酒,已經係同思敏發生關係果次,
可能覺得飲酒真係可以減輕我內心嘅痛苦啦,但係今次就算飲左酒,我嘅痛苦都冇乜點減輕,
腦海入面依然係不斷浮現出阿瑜嘅影像,個感覺就好似比人用把刀喺個心口度挖左個窿攞左個心出離,
再將個心揼落個深淵入面,睇住自己個心不斷咁沉落去沉落去,永遠都唔知幾時到底咁,




最後...我成晚都冇訓過覺,一直到第二朝嘅九點令鐘,我先體力不支不醒人事。
 
就係咁...我喺張床度足足四日,我熄左電話...訓吓又醒吓咁,
完全冇動力去起返身,就連飯都冇食,只係要去廁所果陣,
我先落一落床。
 
直到第五日嘅中午.....
 
「...咯咯咯咯~咯咯咯咯~」房門拍打聲不斷。
 




「...嚓~」繼而係開門嘅聲響。
 
「...夠啦!!!」係阿妹,無啦啦好炆咁走左入離我間房,
但係我緊係冇理到佢啦,繼續死蛇爛鱔咁郁都唔郁。
 
「...做咩姐你,值得為個賤人搞到自己咁咩?」阿妹繼續開炮,火力全開。
 
「...你唔好理我啦!」我細聲回應。
 
「...起身呀!」點知阿妹忽然好激動咁想拖我起身,




我一個措手不及比佢拉左落床,成個人撻左落地下
 
「...痴線架咩!」我有啲炆咁,一手推開左阿妹。
 
「...嗚~~係呀!我係痴線架,痴線到擔心你呀~嗚嗚!」阿妹激動到喊左出離,
仲坐左喺我床邊,嚇到我個心都離左一離。
 
「....sor...sorry囉!」我有小小內疚咁回應。
 
「...嗚...你知唔知我同阿媽都好擔心你架?失戀咋嘛...有乜野緊要得過屋企人吖!
最低限度你仲有我地呀!阿瑜唔要你係佢損失喳嘛,再講...依啲咁貪慕虛榮嘅人要唔要都吧啦!」
睇離阿妹應該喺公司收到風阿瑜搭上有錢仔嘅事喎。
 
「...吓...阿媽好擔心我?」我有啲內疚咁問。
 




「...阿媽依幾日,食唔安訓唔樂,又要擔心你,又要擔心老豆,
成個人都落哂形呀!!」阿妹回應。
 
「...老豆?老豆咩事呀?」我有啲疑惑咁回應,話時話都真係好耐冇見過老豆。
 
「...老豆已經幾晚冇返離訓啦,電話又成日唔通,就算通左問親佢乜事,
都淨係話冇野,話上左大陸買貨喎,一時又話搵個舊朋友,但係把聲就怪怪地咁,
都唔知佢邊句真邊句假啦!」阿妹憶述中。
 
聽阿妹咁講完,搞到我成個人心都噏埋,
好內疚咁走左去阿媽間屋度睇吓咩環境。
 
「...咯咯~~咯咯~~」我敲門。
 
「...入離啦!」阿媽溫柔咁回應。




 
「...嚓~~」我扭動門鎖開門慢慢行入去,見到嘅...係果個一臉愁容嘅阿媽。

阿媽已經訓左喺張床上面,墊住兩個枕頭招牌動作咁訓左喺度睇緊電視,
望到係我果陣仲即刻想坐返起身添。
 
「...阿仔...有飯餸呀,我出去蒸返熱佢比你食!!」阿媽好緊張咁彈左起身,
想走出去整野我食,但係比我叫住左。
 
「...媽...唔洗啦,你訓返低先啦!」我叫住已經行到房門口嘅阿媽。
 
「...冇胃口牙?好快架咋,蒸幾分鐘食得架啦!」阿媽好緊張咁再三強調。
 
「...得架啦...我轉頭會自己整離食,坐啦...媽!!」我搭住阿媽膊頭,慢慢佢拖返佢埋床邊。
 




「...仔...你?」阿媽有啲疑惑,呆左咁坐返落張床度。
 
「...我冇野架啦,你唔洗再擔心我!」我雙手搭住阿媽膊頭,
臉帶微笑咁講,希望減少阿媽嘅煩惱。
 
「...真...真係冇事?」阿媽繼續疑惑。
 
「...嗯...,冇野啦,大丈夫何患無妻姐,搵過第二個囉!」我喺度拋書包,繼續安慰阿媽。
 
「...阿仔...你...你冇野吖嘛?」阿媽繼續疑惑,仲用手放上我額頭度,
好似以為我發緊燒咁,又係嘅...我平時講野邊有咁文雅架,啱啱講完果句野,
自己都打一打冷顫呀。
 
「...阿媽我真係冇野啦,對唔住呀...要你擔心我。」我再一次回應。
 




「...咁...咁就好啦,我...我聽日真係要去還神啦!」阿媽由頭先緊張又疑惑嘅樣,開始變得鬆容。
 
「...阿爸點呀?」我問,但係問完之後...阿媽又由鬆容變返做好擔心嘅樣。
 
「...唉....!」阿媽嘆左一口氣。
 
「...以前會以為...發左達之後所有野都會好美好,但係...原來啱啱相反,
個仔同個老公,日日都早出晚歸,見面嘅時間越離越小,
成日都見到你地好似好辛苦咁...又要擔心,好似以前咁,冇乜錢住喺公屋,
雖然冇靚屋住,又冇得想買乜就買乜,但係人與人之間嘅溝通,家人嘅關係...
一直都可以維持得好好,有時我會諗...中左六合彩到底係好事定壞事呢?」
阿媽好感慨咁講,依個時候...連原來企喺門口偷聽嘅阿妹都行埋入離,
眼發淚光咁,好似好認同阿媽講野咁。
 
「...放心啦阿媽,我應承你...由依家開始,我會比多啲時間同屋企人相處,
唔會再令屋企人擔心,總之...齊心就事成啦!!」我好誠懇咁一手搭住阿媽,
一手搭住阿妹講,搞到阿妹再一次山洪暴發。
 
「...咁...老豆其實咩野事姐?」等佢地心情平復返之後,
我開始問返阿媽一啲關於老豆吧事啦。
 
「...er...都十日八日前架啦,你老豆開始神神祕祕咁,本來平時都係十一、
二點左右返到離嘅,但係果陣開始,佢就凌晨兩、三點先返,隔兩、
三日又會有一晚直頭冇返添,見到佢精神一日比一日差,個黑眼圈又一日比一日勁,
但係問嚫佢都只係話公司多野做,好小事咁,我又唔想比太大壓力佢喎,
所以都唔敢再追問,直到早兩日都依家連續三日,佢直頭返都冇返過離,
我都真係唔知佢究竟喺出面搞乜!」阿媽好無奈咁憶述,講到想喊咁濟。
到底老豆去左邊呢?佢又搞緊啲咩野呢?依一連串嘅問題,真係要好好咁思考一番。
 
同怇地傾完一輪之後,係咁易梳洗吓,之後我開返電話。
睇睇先...原來已經係三月十九日,星期一。嘩...一開機即時彈左幾百個whatapp出離,
九成訊息都係離自經理人Ella,由四日前好緊張咁打鑼搵我,中段開始喊打喊剎,
到最後即係琴日放棄狀態,我都知依劑大獲,不過唔錯都錯左啦,都冇計架啦,
而家唯有打返電話比Ella扮死狗囉。
 
「...嘟嘟~~嘟嘟~~」
 
「...嗒~」電話接通。
 
「...Ella ?」我問。
 
「...捨得打返離啦咩?」Ella好晦氣咁講。
 
「...sor...sorry呀,因為有啲家事處理,所以....」求其搵住啲藉口先啦。
 
「...哦...係牙,冇野架...甩左幾組劇、一個商場show,同一個電台訪問節目咋嘛!」Ella 講野非常有骨。
 
「...對...對唔住!」我唯有硬食。
 
「...never mind,咪當上左人生寶貴嘅一課囉!」Ella 繼續單打,
我當然係繼續唔出聲等佢發哂啲炮,希望可以平息佢嘅怒火。
 
「...知...知衰啦我!」我繼續死狗回應。
 
「...唉...聰哥,你失蹤都講聲吖,等我有啲準備都好吖,唔洗搞到而家咁,
比人問到我口啞啞,電台訪問都還好,商場show真係搞唔掂,
人地差啲要告我地公司咁濟啦,好彩最後嘉儀幫你頂左先冇事咋!」
Ella好勞氣咁回應,聽得出佢真係好無奈,好彩嘉儀頂左,不過提起嘉義,
我又諗起阿瑜,唉...唔好諗...唔好諗...清醒清醒清醒!!!
 
最後Ella 話公司高層對我有啲微言,話要暫時停一停我手頭上嘅工作喎,
美其名等我休息吓,等我情緒控制好啲先,實際咪就係驚我再玩野雪藏我囉,
都好嘅...自從做左歌手之後,同家人嘅關係真係差左好多,
希望係依一段時間,可以修補返吓。
 
既然冇野做,冇理由成日喺屋企量地架,見時間尚早...一於去老豆公司,
睇吓佢到底搞緊啲咩咁神秘。

於是我換完衫,就揸車落觀塘,直踩上老豆公司啦,
冇記錯好似係廿九樓,睇吓先...零一室、零二室,吖...係依間啦!