「...關於第六代戰鬥機的細節....」(國)一個中年男人坐左喺梳化度傾緊電話,
身穿白色恤衫、黑西褲、黑皮鞋襯花襪,再加果個金槍人平頭裝,
典型大陸佬look,睇離依個就係思敏大伯。
 
「...照辦吧!」(國)中年阿叔見到我地行緊埋離,拿拿臨趕住收線。
 
「...大伯!」思敏講,比我估中左。
 
「...離左拿阿敏!」大伯轉返廣東話。
 




「...係呀,好掛住大伯你呀!」思敏坐左埋去大伯側邊!
 
「...哈哈哈~氹死大伯啦!咦...依兩位係?」大伯終於留意到企左喺度嘅我同老豆啦。
 
「...佢地係我朋友,同佢爸爸呀!」思敏介紹我地。
 
「...咦...拖友牙,大過女啦喎真係?」大伯陰陰嘴笑。
 
「...唔...唔係呀,大伯唔好亂講啦,只...只係...普通朋友咋嘛!」思敏面都紅埋,好尷尬咁講。
 




「...係咩?唔緊要啦...係朋友就得啦,兩位...賞臉喺度食個便飯嘛?」大伯臉帶笑容,
好似好熱情咁,可能國內人真係熱情啲。
 
「...哦...好...好吖!」老豆講完望一望我,見到老豆個肚餓樣,
就知佢好耐冇食過飯啦,咁我地兩仔爺就恭敬不如從命啦。

思敏大伯走左去吩咐工人安排晚飯,而我地三個就坐左喺大廳度休息一陣啦。
老豆挨住張梳化好快就恰著左,而我同思敏就無所事事咁開始閒聊。
 
「...今次真係唔該哂你啦思敏!」我講。




 
「...傻啦...舉手之勞姐!」思敏回應。
 
 「...講開又講啦,你大伯到底係咩人離架?住咁大間屋嘅,而且頭先喺高速公路果度,
點解啲交通警冇告我地不特止,仲同我地敬禮嘅?」因為我心入面有好多疑團,
所以嚫思敏大伯同佢啲助手行開哂之後,我忍唔住細細聲問思敏。
 
「...er...我諗係因為我大伯嘅工作關係掛。」思敏有啲尷尬回應。
 
「...吓...你大伯做咩架?」我好疑惑咁問。
 
「...點講呢...佢做官架。」思敏諗一諗之後回應。
 
「...官?法官?」我追問。
 




「...唔係法官...係政府官員,頭先個交警對住我地敬禮嘅原因呢,
我諗係因為見到我地部車嘅車牌係軍牌,
佢以為我地係軍人所以咪同我地敬禮囉。」思敏有啲尷尬咁解釋。
 
「...咁都得...,!」我驚訝回應。
 
「...er...,係呢... uncle佢點解會比人拉左嘅?」思敏hea左我,之後反問。
 
「...講起上離真係一匹布咁長....」就係咁,我將成件事嘅來龍去脈,由頭到尾講一次比思敏聽。
 
 「...原來咁大件事牙,咁點算呀依家?」聽完之後...思敏緊張回應。
 
「...我都唔知...最壞打算咪賠錢比人囉!」我無奈回應。
 
 「...大拿拿成千萬喎?」思敏講。




 
「...係就係好大條數,但係都不置於要訓街嘅,最多咪冇左間公司同層收租樓,
住緊果度應該冇影響嘅!」我樂觀回應。講真唔通喊住講咩。
 
 「...傾緊啲咩呀?」講到依度...思敏大伯忽然又走返出離,仲坐左埋離添。
 
「...吖...係啦,大伯...我朋友遇到啲麻煩呀,唔知你會唔會幫到佢呢?」思敏突然開口問,
估唔到佢會咁上心,講真頭先全靠佢大伯老豆先返到出離,我仲邊敢再要求太多吖。

就係咁...思敏又將我果番說話再一次轉述比佢大伯聽。
 
「...咁...係咩牌子嘅門呀?」大伯聽完之後問。
 
「...er...好似叫tata!」我諗一諗之後回應。
 




「...哦...咁好易辦姐,阿敏你搵你爸爸幫手咪得囉!」大伯講。
 
「...吓...老豆?」思敏好疑惑咁回應。
 
「...你唔記得你爸爸同tata個吳總好熟架咩?」大伯講。
 
「...吓...我係直頭唔知囉!」思敏驚訝回應。
 
「...搞錯呀,早兩年吳總離我度食飯你都喺度架,
你爸爸有代理佢公司啲木門架喎,你咁都唔知?」大伯理直氣壯咁。
 
「...咁耐之前點記得喎,況且老豆公司啲野我一向都冇理嘅...點會知姐!!」思敏扮嬲咁回應佢大伯。

點都好啦,思敏即時幫我打左個電話比佢老豆,三兩吓手勢就幫我搞掂左老豆搞成個月都搞唔掂嘅事,
真係識人好過識字,思敏老豆二話不說,就即刻應承供應四百度門比我,




仲話過兩日即刻喺倉度攞出離交貨添,今次老豆公司嘅危機總算化險為夷。

今餐真係好豐富,成十幾味餸,又水魚又盛咁,食到老豆好滿足咁攬住個肚。
食完飯之後,因為時候都唔早啦,本來打算同老豆走架啦,但係思敏大伯真係好熱情,
係咁話要留我地喺度過一晚夜,我見老豆都唔多願走咁款,而且思敏亦都留喺度。
所以最後我就同老豆留低左啦。 你知思敏大伯屋企幾大架啦,成六千幾呎,客房多的是,
所以叫我地喺二樓隨便揀間房就可以啦。因為眼見二樓啲客房都係單人房,所以我同老豆分開左房訓。
本來仲諗住過老豆房諗住搵佢吹返陣水嘅,但係我沖完涼無耐,老豆就已經訓到隻豬咁啦,
都冇辦法啦...唯有返返自己房訓啦。我行到返入房,訓左上張床度。挨住床頭坐喺度諗住開電視睇吓有咩睇果陣....
 
「...咯咯~咯咯~」房門口忽然傳離微弱嘅敲門聲。
 
「...嚓~」於是我就落床行返去開門啦,
 
「...咦~搵我有事牙?」我問,因為企喺門口嘅,竟然係思敏。
 
 「...無呀,訓唔著諗住搵你吹陣水姐,阻住你?」思敏一身睡衣look,個頭仲濕濕地咁,
而且身上仲散發住沐浴露嘅清香,應該同我一樣都係啱啱沖完涼無耐。
 
「...唔...唔阻,你想喺邊度吹?」我微笑咁問。
 
「...就你間房囉。」思敏一樣係微笑回應,而且一邊應一邊已經步入緊我間房。

間房其實唔係好大,只係得一張單人床,同一張櫈,本來我諗住叫思敏坐櫈,
但係我未叫佢就已經坐左上我張床度,咁我就唯有坐櫈啦。
 
「...er...上次...唔好意思呀,係我多事左。」我打開話題。
 
「...吓...哦,...我都唔記得哂啦,唔洗咁介懷喎!」思敏諗一諗,
之後笑笑口回應,睇離真係冇哂事啦,咁我都安樂啲。
 
「...咁...咁就好啦。」我回應。
 
「...係呢,同阿瑜幾好吖嘛?」思敏不經意咁問。
 
「...er....」我deadair 左,可能冇諗過思敏會突然間問啦,一時間唔知點回應。
 
 「...冇事吖嘛?」思敏有啲疑惑。
 
「...冇...我地分左手....!」我dup低頭回應。
 
「...吓!sor...sorry!」思敏異常驚訝。
  
 「...我冇野喎!唔洗介意!」我微笑回應,之後大家deadair 左幾秒,氣氛都幾尷尬吓。
 
「...不如我地轉個話題啦,係呢...你大伯係做咩官架?」我推開左個話題,嘗試令氣氛緩和返啲。
 
「...佢牙...,唔多清楚喎,好似話喺咩(中科院)度做野咁囉!」思敏一邊諗,
一邊好唔肯定咁答我,講完就好似冇講過咁。 就係咁,我地傾埋哂啲無聊野,
唔知點解呢,同思敏分左手之後,我對住思敏講野,反而冇咁大壓力,野都講多左,
傾左個零鐘左右,思敏就返返自己間房度訓覺。到第二日一早...大伯已經出左去工作,
食完早餐之後,華明叔就安排左司機直接送返我地返離香港。