第二日,通告係「0600」,所以我凌晨五點半已經準時去到機場集合地點。雖然之前都有見過導演同監製,但只係兩日之前嘅事,一切都離得太快啦,我根本未消化得哂所有野,自己一個乜人都唔識,拉住個喼成個傻仔咁企左喺度等,好彩等左幾分鐘左右,就見到成班人浩浩蕩蕩咁行緊過離咋。

「...早晨!聰!」一個女仔微笑同我打招呼。

「...早晨!」我一邊回應,一邊同其他人點點頭,其他人都拉住好多行李,好多攝影器材,應該係大部分工作人員。

「...你好!聰!我係劇務icy,負責同演員溝通嘅,有啲咩問題或者需要呢,隨時可以問我。」個女仔揸住份表走左埋離,好似幫我地依啲三線演員點名,眼見其他演員都冇個識咁濟,忽然覺得自己知名度都唔差添!

點齊名...劇務icy幫我哋所有人寄哂行李,搞掂哂手續,之後我地就成team人一齊行入離境大堂,出發去拍攝地「四川成都」。





安檢、過關依啲例牌野都冇乜好講啦,過完關行去登機閘口亦都一樣順利,航班準時起飛,三個鐘頭左右,我哋就到達四川成都啦。

去到一落機就已經要轉車去拍攝現場,因為拍攝工作已經如火如荼咁進行緊,所以我哋就即刻轉車,搭戲組一早安排好嘅旅遊巴前往現場。一上車好多人都即刻訓哂,得我一個好好奇咁四周圍望。

「第一次出外景牙?」原來坐喺我隔離嘅劇務icy仲未訓著。

「...唔係第一次出外景...係第一次拍戲!」我尷尬回應。

「...係咩?之前好似見過你喺無記架喎!」icy有啲驚訝。





「...係...果陣客串左一排,都唔算啲咩啦,全部都係廠景離嘅。」我回應。

「...仲以為你都有唔小演出經驗添!」icy講。

「係呢...點解啲人咁快訓哂嘅?」我反問。

「...哈哈...冇經驗真係冇經驗,依家唔訓一陣去到都唔知幾時先有得訓架,所以你都唔好問咁多野啦,拿拿聲訓返陣先啦。」icy回應,就係咁...同icy傾完之後我都趕緊時間訓返陣先啦。

好彩我本身都係個幾訓得嘅人,加上全部車熄哂燈,窗簾亦都拉埋哂,喺咁嘅環境下我唔洗幾分鐘就已經昏昏欲睡,到我醒嘅時候已經係中午時份啦。果度唔係片場,係一個住宅區入面嘅一間真實嘅火鍋店。





「...到拿!」門口企左兩個男工作人員喺度,見到我哋就同icy打招呼,佢哋應該係識嘅。

「...咩環境呀?」icy回應。

「...進度唔錯,睇離就離可以放飯。」其中一個男仔回應。

我哋一個跟一個咁跟住icy行入去,其實間火鍋店係好大嘅,大家唔好想像係香港果啲舖頭,人地啲舖頭係成幢建築物都係佢嘅,所以我哋入到去都唔會阻外到入面嘅拍攝。入到去我地將行李放埋一邊之後呢,icy就叫我地可以休息一陣啦。周圍嘅野都好陌生,好有新鮮感,我同其他啱啱到步嘅演員一樣四周圍行離行去。行到舖頭嘅另一邊,已經見到好多工作人員喺度做緊野啦。周圍打哂燈,好似已經拍緊野咁。

「... 全場 Ready!」見到係麥導演,佢一出聲所有人都靜哂。

「...cam!」另一個人叫出。應該係副導演。

「rolling!」一個攝影師回應。

「Sound!」副導演再叫。





「speed!」收音師回應。

「...xxxx,第十場、take one!」有個人揸住拍板企喺攝影機前面講出一堆野。

「....~啪!」之後就拍一拍塊板。

「... Action!」麥導演大叫,演員開始表演啦,今場嘅演員竟然係一位樂壇天后,所有人都戰戰兢兢。

唔知係演員演技好定點啦,麥導演非常之滿意,連續多個鏡頭都輕鬆收貨,好快就到咗放飯時間啦。既然係餐廳,食飯就緊係方便就腳,喺返原地食啦。但係唔係打邊爐,餐廳員工一早就預備左啲大鑊飯,全部人好似放監咁款,好似自助餐咁,好多餸放哂喺度,白飯任裝。

因為我唔太肚餓,所以其他人食緊飯果陣,我就自己一個拎住份劇本行埋一邊開始忖摸一下自己嘅角色啦。

「...做乜唔食飯呀?」睇睇吓。忽然有人叫我。





「...唔肚餓咪唔食囉。」我冇望過去,一邊睇劇本一邊回應。

「...離緊我地都有幾多對手戲喎,多多指教!」叫我果個人一邊講一路行左埋離,我霎時間感覺到一陣好強嘅氣場。

「...sor...sorry呀!一時投入左留意唔到sammi
姐你添。」我緊張回應。

「...哈哈...唔緊要,當我普通人得架啦,唔洗介懷喎,係呢...有幾場戲想同你夾一夾先...」估唔到天后真係多數冇架子架,sammi姐同joey姐一樣係勁nice,工作亦相當認真竟然主動走埋離我依啲三線演員度傾計。

同sammi姐傾左好耐,傾到大家都食完飯,差唔多開始下午嘅拍攝啦。繼續係sammi 姐嘅戲份,冇份嘅演員們都睇得如痴如醉,其他工作人員就非常緊張,盡量希望唔好有任何差錯。

拍攝都尚算順利,等咗個零鐘頭左右,終於到我嘅戲份啦。我飾演嘅係一個火鍋店嘅員工,要拍的劇情就係講身為老闆娘嘅sammi 點樣去鼓勵我呢個犯過事嘅員工,重新投入社會。其實就好似Sammi姐鼓勵我點樣去演依部戲一樣,我只要有咁嘅心態就可以演得唔錯,開頭雖然有啲緊張,都NG左幾次,但係麥導演好有耐性,而且Sammi姐亦都好配合,亦都好體諒我呢個新人,最後都有驚無險咁完成咗幾個同Sammi姐做對手戲嘅鏡頭。拍完之後都差唔多天黑喇,麥導演望一望隻錶,加上周圍環境開始暗,所以叫所有人收工。

估唔到第一日嘅工作咁快就完成。感覺都唔係太辛苦姐。收工之後全個劇組嘅人一齊去食飯,今次真係去打邊爐啦,都係喺拍攝地點附近嘅一間當地好出名嘅火鍋店,原來係sammi 姐開聲話請,所以所有人都好踴躍,我哋一行二十幾人,去到包左間房,個個都有講有笑,大家都開始互相介紹,又傾返頭先拍攝嘅一啲流程,就好似一啲賽後檢討咁。大家都熟絡咗好多,食完之後劇務icy帶左我地一班今日先到嘅演員去到我地嘅住宿地點,其實都係喺返拍攝地附近嘅一棟住宅大廈,公司應該包左果度嘅兩層單位,你知大陸地方幾大架啦,啲地又唔多值錢嘅,所以我分配到一間自己嘅房,其實佢又唔多似住宅,但又唔係酒店,應該話係一啲酒店式嘅公寓,有廁所加開放式廚房,但係就冇房,間隔就好似香港一個劏房一樣,但係係加大版嘅。點都好啦...已經比我想像中靚好多,搞掂哂所有行李,沖完涼...打點好一切之後已經夜晚十點幾啦。我灘左上張床度,無無聊聊咁拎左部手機出嚟撳吓啦。





咦!原來今日上飛機之後,全日我都冇開過部電話添。開返之後...即時彈左好多whatapp訊息出離,睇吓先...

「...加油呀聰哥,等睇你出好戲架!」 3:00pm思敏,咦...思敏又知我返左大陸嘅...可能係阿妹講佢知。

「...大佬!一路順風呀,記住買啲麻辣火鍋湯底返離比我地呀!」5:00pm 阿妹,真係阿妹,佢當我去旅行咩...麻辣湯底!

「...順利嘛?」 5:00pm 詠恩

「...?仲忙緊?」7:00pm 詠恩

「...無事嘛?」9:00pm 詠恩

原來詠恩搵過我咁多次架,唉...點解我會唔記得開電話架。但係依家差唔多十一點架啦喎,咁夜搵返佢,會唔會唔係咁好呢?

「...無野呀!啱啱先收工返到旅館咋!」10:45pm 哈哈...我點會覺得唔好意思架,即時whatapp返過去回詠恩啦,唔知咁夜詠恩仲會唔會覆我呢!可能今日真係太攰啦,我等下等吓…唔知等咗幾耐,就已經瞓着咗。我有返知覺嘅時候已經係第二朝嘅七點鐘啦。





唉...點解我會瞓着咗㗎,即時彈左起身睇一睇個電話,不過詠恩都冇覆過我,可能佢都一早瞓咗啦。有啲失望但係都冇辦法啦,因為今日通告係開0800 ,所以時間都幾趕下,嗱嗱臨梳洗完之後,就即時飛的返拍攝現場。
今日嘅拍攝好頻密,可能所有演員都到齊嘅關係啦,由朝頭早八點一直拍到夜晚九點先收到工,中途仲要係邊食飯邊拍,人地拍緊就你休息,終於都嘗試到拍戲嘅辛苦啦,希望快啲可以適應到啦。
返到旅館同琴日一樣都係成個人散晒咁,一樣去沖個涼梳洗完之後即時開返部電話,睇吓今日到底有冇人搵過我先。

「...哦!辛唔辛苦呀?」詠恩 9:00am

「...睇來你真係好忙啊,你得閒先覆我啦。」詠恩18:00 am

竟然都係得詠恩果兩個whatapp,其他人都唔記得咗有我依個人啦咩!忽然覺得有啲孤獨添,睇嚟返大陸拍戲除咗要克服拍攝時間嘅問題,仲要克服人在他方冇朋友嘅問題。

「...嘟嘟~~」我忍唔住直接打左個電話比詠恩。

「...嚓-~~喂!」響左幾下之後,詠恩好快就接聽左,把聲仲有啲緊張添。

「...阻唔阻你啊?」我問。

「...唔...唔阻嘅!」詠恩回應,聽得出佢有啲開心,但係又真係好似真係有啲野做緊咁。

「...做緊乜呀?」我再問。

「...浪緊衫咋嘛。」詠恩回應。

「...哦~」我deadair 左幾秒。

「...係呢...拍攝順利嘛?」詠恩問。

「...ok嘅...不過....!」我忐忑回應。

「...不過咩呀?」詠恩有啲疑惑。

「...唔知係咪去咗第二個地方嘅關係呢,感覺就係好空虛咁,有一種孤獨同落寞嘅感覺...好難受。」我感性回應,因為喺依一刻係旅館對住四面牆,有種好似坐監嘅感覺。

「...唔好咁諗啦...好快過姐。」詠恩安慰回應。

「...我好寂寞...英文點講呀?」我忽然問詠恩。

「...吓... I am so lonely掛。」詠恩有啲摸不着頭腦。

「...唔係I love u咩?」我反問。

「...咩...咩呀!」詠恩有啲尷尬。

「...你冇睇周生馳套「算死草」咩,莫文蔚係咁同周星馳講㗎嘛。」我回應。

「...無...無聊,仲講到無聊野即係冇咩事啦。」詠恩扮嬲。

「...好想見你呀...!」我繼續發動攻勢。

「.......!」詠恩deadair 左幾秒。

「...係呢!公司點呀?」我轉話題。

「...都係咁啦,你都冇做啦,咪鬼理佢啦。」詠恩回應。

「...你仲喺度架嘛,想知多啲你日常嘅野吖嘛。」我答,唔知點解呢...離開左香港之後個人可能真係太寂寞嘅關係啦,講嘢都大膽左好多,言語間都帶多左挑逗性。

「都係咁啦,冇乜特別。」詠恩回應,就係咁...我哋傾左好耐,就好似讀書果陣啱啱一齊果陣時咁。

之後嘅日子我好快適應左,朝早一早就返工,夜晚收工食完飯,我就會好準時咁返到公寓果度同詠恩傾電話,好快就已經幾個月啦。sammi 姐同其他大明星嘅戲份都已經拍哂,所以佢哋全部都已經走哂唔見哂人啦。留低喺度執手尾嘅都係我依啲二三線演員同埋啲特約演員。

難得今日同聽日都係假期,冇任何嘅通告,而且已經係秋冬季,四川依度已經好凍仲落埋雪添,我見冇野做又好奇,於是一個人膽粗粗咁去左一個附近嘅山上滑雪場玩吓,輕鬆一下嘅。