中左六合彩頭獎四千八百萬，依家唔知點算?: 86 作曲人
「…喂，Ella！」我聽左。
「…聰！做緊咩呀？」Ella問。
「…冇呀，食緊野！」我回應。唔通話自己百無聊賴咁行緊街咩。
「…聽講你之前上左大陸拍戲喎，你就威啦…連電影都撈埋。」Ella笑笑口講。
「…哈哈…配角仔姐！」我回應，講真唔通等你搵我咩，等得你離我都餓死啦！
「…你同果個fafa果個網絡節目都好成功呀，連老細都留意到。」Ella再講，睇離佢有備而來喎。
「…咁所以呢…公司叫我離緊開始幫你接返啲jobs ，咁你意思點啊？」Ella有啲尷尬咁問，哈哈…終於都搵我啦咩！
「…er…好吖！」我回應，唔係點答姐。
「…Good！咁離緊你會好忙架啦，做定心理準備啦！」Ella講。
「…係呢！有冇寫定啲歌咁呀？」Ella再問。
「…er…最近寫緊一首！」我回應。
「…順唔順利呀？有啲咩問題可以上公司studio搵啲同事幫幫手架。」頂佢，之前又唔見佢咁好人，依家我人氣高返就乜都得，世界真係現實。
「…係呢…聽講joey演唱會搵左你做嘉賓喎！」咦…佢咁都知？
「…係呀！咁醒嘅你咁都知。」我笑笑口講，唔係有啲咩問題吖嘛？
「…哦～幾好吖，可以谷一谷你嘅人氣。」Ella回應，好彩佢冇阻頭阻勢。
「…第幾場呀？」Ella問。
「…好似係第四場！」我諗一諗之後講。
「…第四場…即係仲有十日咋喎！」Ella講，吖…佢真係所有野都知得一清二楚架喎，專業果然係專業。
「…咁佢哋應該過幾日會搵你去夾吓野架啦，到時唱啲咩歌，有啲咩安排記住同我講聲喎。」Ella講完之後就收左線。
估唔到等左成年，終於都可以做返一個歌手。真係太耐啦，所有野都放低哂。所以呢…同Ella傾完之後，我就返左屋企繼續寫好我首歌。我好專心咁寫，唔經唔覺又寫到凌晨時分，全首歌嘅曲大至上都完成左啦，有啲乜野聽日先講啦…zzz…。
到第二日…朝早幫老豆公司送完啲貨之後，我走左上唱片公司studio，嘻嘻…既然有資源啦，咁就緊係幾大都用盡佢啦。始終自己喺屋企造歌太單一化啦。本身我就冇乜呢方面嘅設備，再加上淨係自己一個造，造出嚟都唔得客觀，咁所以呢…我一早就去到公司錄音室啦。
「…咦～～嘩…聰，好耐冇見你上離啦喎，近排搞咩呀？」一上到去，一個熟悉嘅助理豪子開門比我。
「…之前返左大陸拍戲吖嘛！」我回應。
「…哦～正啦，北上搵人仔啦。」助理豪子笑笑口講。
「…香港電影離架！」我回應。
「…哦！今日上離有咩搞呀？」助理豪子問我。
「…有首歌想執執佢，今日full唔full呀？」我問。
「…你好彩啦，今日冇乜人book，依家打後到6點都ok呀！」助理豪子望一望電腦之後回應。
「…係喎，Eric哥上咗離喎，你洗唔洗過去同佢打招呼呀？」豪子忽然醒起。
「…佢上左離咩？喺邊呀？」我有啲緊張咁四圍望緊，因為Eric哥並唔係普通人，佢係我哋音樂界好知名嘅前輩，作曲家，因為之前我唱嘅其中一首劇集主題曲係由佢作曲嘅，所以我哋都尚算認識。
「…喺B房呀，你過去望望！」就係咁，同助理豪子吹多兩句之後呢，我就鬼鬼鼠鼠咁走左過去B房度啦。
喺門口裝下裝下咁，見到Eric哥企咗喺panel前邊，好認真咁同混音師唔知搞緊啲乜。
「…咦～聰仔！」裝左分幾鐘，佢終於都望到我啦，依家揮手示意叫我入去。
「…嘻嘻～Eric哥。」我笑住咁行入去。
「…好耐冇見你啦喎！」Eric哥問返頭先豪子問我嘅問題，我亦都係同樣咁解答。
「…哦，咁今日上離有咩搞呀？」Eric 哥問。
「…嘻嘻～冇呀，寫緊首歌諗住上離執執佢囉。」我有啲尷尬咁講，大佬呀對住全港其中一個最知名嘅作曲人話自己寫左首歌喎，唔驚比人笑咩。
「…咦～乜原來你識寫歌架？咩曲風架？」Eric 哥有啲驚訝。
「…嘻嘻～好皮毛架咋，都係啲普通pop歌。」我繼續尷尬笑。
「比我聽吓！」反而Eric 哥非常認真，仲好有興趣咁叫我比佢聽吓，於是我緊係即時乜都比哂佢啦。自己喺屋企錄嘅usb手指連手寫譜所有野都隊晒比佢。Eric哥 叫混音師將條聲過左入電腦，之後就帶住個耳機好認真咁聽啦。唔知點解呢，Eric 哥聽緊果陣我真係超緊張，好似考完試比老師改緊卷咁，唔知出離個成績會係點！
「…唔！」Eric 聽完之後沉思緊。
「…點呀？」我主動問。
「…你自己寫架？」Eric哥反問。
「…係…係呀…好差？」我戰戰兢兢咁問。
「…個demo編得ok啦，如果係第一次寫離講呢，算唔錯架啦。」Eric 哥竟然讚我。
「…拿！依家加返啲鼓聲做底睇吓個效果先！」之後Eric哥同混音師就開始幫我段聲搞一啲微調啦。加左鼓聲之後即時唔同左，啲層次即時分明好多。
「…係咪好好多呀？」Eric 哥好興奮咁問。
「…係呀，層次分明好多。」我回應。
「…旋律就唔錯啦，啲chord都落得幾好，但係intro、副歌同outro可以試吓加啲鋼琴落去，咁首歌就唔洗得啲結他聲咁單調啦。」Eric 歌講完之後就即刻走左埋個琴度彈起上離喎，果種即席揮毫真係睇到人高潮一浪接一浪呀！
「…咁樣會唔會好啲呀，聰仔！」彈完之後， Eric哥問我。
「…好似係喎！」我回應，就係咁…之後Eric 哥叫我現場彈一次，咁我唯有獻醜啦。雖然中間有一兩下甩左小小，但係整體都彈得唔錯，加上錄音室嘅儀器，就算彈錯咗，都可以補彈返落去，所以問題不大，就係咁…經過幾個鐘嘅彈奏，修改，再彈再改，我自己作曲監製填詞嘅新歌終於都叫做完成啦。雖然啲詞仲係唔係填得咁好，之但係我又唔想搵人幫手填囉，始終都係一首想講自己內心嘅歌，冇理由要人代填㗎，唔緊要啦仲有時間，開演唱會之前一定會填得好嘅。
造左成日歌，返到屋企都真係咩都唔想做，食完飯就只係想攤喺度，開始沉思返今日錄歌嘅過程。有高人指點所有野都事半功倍。依家只係淨返啲歌詞，睇吓仲可唔可以進一步收改，因為第二段嘅歌詞都仲係唔係填得太好，始終都係唔知淨啲咩咁，就好似入咗個死胡同咁，永遠都走唔返出嚟。