中左六合彩頭獎四千八百萬，依家唔知點算?: 88 綵排
「～～嘟嘟嘟～～她的心鐵石那樣無情～～」電話鬧鐘響起。
「…吖～～」我撳熄左，然後伸一伸懶腰。
望一望個電話，其實已經唔早啦，差唔多朝早十點鐘，但係因為我琴晚游完水返屋企修改歌詞都搞到幾夜吓，所以穩陣起見我都校定鬧鐘。因為係平日，全屋都冇哂人喺度，我施施然咁起身梳洗，執返靚仔個人剃哂鬚咁，我就出發去紅館啦。因為Sandy姐約左我下午兩點鐘，所以我去到紅磡都仲有時間可以走去附近嘅都會商場嘆返個午餐。不過正直係午飯時間，所以成個商場都報滿喺附近寫字樓返工嘅人，仲有大批地產代理，所以到最後我都係選擇買外賣嘅。我揸住個飯盒走返過去紅館果邊，因為唔知現場有冇車位泊車，所以我選擇將部車泊喺商場然後行過去。
「…送外賣打電話叫佢出離攞啦。」去到紅館大堂一個保安阿姐以為我係外賣仔。
「…er…我唔係送外賣架，我離做野架！」我尷尬回應。
「…做野？做乜野呀？」阿安阿姐有啲疑惑咁問。
「…係咪佈置果啲呀？」阿姐諗一諗再問。
「…係啦係啦。」我是但回應。
「…你要打比Helen喎！」阿姐再講。
「…邊個Helen呀…阿姐？」我無奈回應，因為都唔知佢講邊個。
「…你打比佢啦。」個阿姐堅持，到最後我都係要打比Sandy姐我先順利入到去。
Sandy姐帶住我經過一條通道就直接入到去場館中央，場內已經有唔小工作人員，包括佈景、燈光、樂隊、舞台特效、演唱會監製同導演，當然唔小得唱片公司職員，同主角Joey姐啦。
「…喜歡你讓我下沉～～」joey姐已經唱緊歌，其他工作人員就忙於調校器材，而我呢…就唔阻住joey姐，靜雞雞咁坐左喺頭幾行嘅坐位度享用我嘅飯盒。我相信都冇乜人試過一路睇演唱會一路食飯盒，果種感覺真係好特別。一邊食一邊欣賞joey姐精彩嘅表演，加上燈光效果真係有錢都買唔到。
食完飯因為joey姐同導演果啲仲忙緊，所以我一於小理，繼續坐喺度休息一下。就喺我攞本筆記出離好專心咁諗緊啲歌詞嘅時候…
「…聰！」喺台上嘅joey姐終於都留意到我啦，依家攞住枝咪大叫住我個名。
「….hi！」我喺遠處向joey姐揮手，而家所有人嘅注意力都集中哂喺我身上，搞到我都有小小尷尬，不過比起真正表演嘅時候成萬人望住我，依家都真係小巫見大巫，習慣定都啱架啦。
「…上離啦！」joey姐好興奮咁叫我上台，於是我就即時起身快步走向舞台啦。
「…聰！同你介紹，呢隊係我嘅樂隊！」joey姐向我介紹。
「…敬聰！你好你好！我係今次演唱會嘅導演，依家同你夾夾先。」導演向我講解果晚我出場嘅流程，大至係話我首歌嘅音樂一響，中間個升降台就會同時升我上去，咁我就可以開始唱架啦。導演安排左我一出場就唱一首solo，之後同joey姐傾一分鐘左右，就會再同joey姐合唱一首。
「…流程大致上就係咁啦，有冇問題呢阿聰你？」導演問我。
「…冇…緊係冇啦，我會全力配合你哋。」我緊張回應。
「…阿聰真係阿聰，講句嘢都爽快啲！」joey姐笑笑口講。
「…咁依家就同樂隊夾吓唱啲咩歌啦，係呢係呢…阿聰你想唱咩歌呀？」joey姐好興奮咁問。
「…er …諗住唱一首自己作嘅新歌。」我尷尬回應，之後就將usb手指同樂譜交比樂隊了解，再同佢地講解應該點樣演繹。佢哋聽完一次之後即時可以彈返出離，而且比我有過之而無不及，果然係專業樂隊。
就係咁…同樂隊夾完之後就開始正式綵排啦。唔係講笑呀，正式綵排非常認真，工作人員真係帶我落下面後台之後跟返安排升我上去架，因為冇現場觀眾嘅關係，個場面真係有啲搞笑。不過其他人就非常專業，樂隊演奏得非常陶醉，燈光師亦開始製造燈光效果，除咗冇現場觀眾之外，其他嘢同真正嘅演唱會完全冇分別，我唱完首solo之後同joey姐吹一陣水，就開始同joey姐唱第二首合唱歌啦。
「…我地再一次多謝張敬聰！」
「…拜拜！」升降台將我同joey一齊降左落去下面，代表我嘅部份正式完結啦。
「…好野喎！聰！咁耐冇唱仲keep到喎！」落到後台joey笑笑口講。
「…嘻嘻…！」我尷尬笑。
「…係呢，你首新歌幾正喎，邊個幫你編架？」joey姐再問。
「…er …Eric哥幫手編嘅！」我回應。
「…原來係佢，我都估到架啦，聽落好有佢嘅風格，係呢…首歌改左名未呀？」joey姐問。
「…er …未改好呀，因為啲歌詞我仲諗住收改吓！」我回應。
「…哦！嘻嘻…聽落好似好凄美嘅故事喎，真人真事牙？」joey對住我陰陰嘴笑。
「…嘻嘻…講呢啲！」我hea左佢。
就係咁，同佢哋夾好哂野再同記者做啲簡單訪問之後，因為joey姐仲有好多野忙，所以我都唔阻住佢啦，同joey姐道別完我就一個人自己走先啦。行返過商場攞返部車之後，因為見都差唔多收工時間，所以就順路揸左部車過旺角接埋阿妹收工啦。
「…真係好呀！有好大佬車我！」阿妹一上車就係咁擦我鞋。
「…唔洗賣口乖啦！我順路姐，啱啱去完紅館綵排。」我回應。
「…係喎！我都唔記得左添！點呀？順唔順利呀？你就好啦，可以率先欣賞Joey嘅演唱會！」阿妹好羨慕咁款，其實我係去做野唔係玩㗎囉，不過其實都有啲享受嘅…嘻嘻！
「…ok啦，我只不過係做一做表演嘉賓唱兩首歌姐，會有幾辛苦吖！不過joey姐佢就真係辛苦啦，又唱又跳，見佢換衫果啲位好似打仗咁款，直頭係生死時速，睇見都辛苦。」我回應。
「….拿！」我一邊揸車一邊拎咗啲演唱會飛出嚟比阿妹。
「…嘩！～好野呀！多謝大佬！」阿妹一見到啲飛，雙眼好似發光咁。
「…拿！攞到兩張咋！」我回應。
「…兩張已經好夠架啦！嘻嘻！」阿妹興奮回應。
「…第幾場離架？」阿妹問。
「…咪第四場囉，我去表演果場！」我回應。
「…哦！咁你呢？」阿妹再問。
「…我？我都唔洗飛嘅，到時會有人帶我入去vip區架啦。」我回應。
「…咁…咁你唔係話比飛恩姐架咩？」阿妹有啲疑惑。
「…哦！得啦…我另外預咗兩張飛比詠恩同浠琳，放心喎…唔會攞返你果兩張飛喎！」我講。
「…哦！咁都好啲！」阿妹回應。
「…係呢！你同邊個去睇呀？黑仔牙？」我問，諗諗吓都好耐冇了解過阿妹依家嘅狀況啦喎，都唔知佢同黑仔點添！
「…er…應該係掛。」阿妹答得有啲含蓄。
「…做咩呀同黑仔？都好似好耐都冇聽過你地去街嘅！」我回應，因為都真係幾耐冇聽過關於佢地嘅野。自從我同思敏散咗之後，因為我都唔知點面對黑仔，所以就開始疏遠佢地，成年都再冇同佢地連絡過啦。
「…er…其實之前我地冷靜過一排！」阿妹有啲忐忑。
「…點解嘅？」我有啲疑惑。
「..因為….！」阿妹欲言又止。
「…因為阿哥？」我問。
「…你點知架？」阿妹有啲驚訝。
「…求其講吓架咋！」其實我真係隨口噏下嘅啫。
「…嘻嘻…你知啦大佬，咁你同思敏啲野，黑仔一定唔高興架啦…咁…咁有時講開你，咪成日同佢有拗撬囉！」阿妹回應。
「…對唔住呀！妹！我啲感情事連累嘛你！」我回應。
「…算啦，近排佢都冇再提啦，而且仲好似對我好左好多！」阿妹再講。
「…哦！咁咪好囉！兩個人相處緊有拗撬架啦，最緊要係識溝通，大家有咩都唔好放喺心度！」我好似識話人唔識話自己咁。
「…得架啦大佬！我識點做架啦。你呀！快啲追返恩姐返離啦。我都好想快啲見吓我個姪女呀！」阿妹再講。
就係咁，同阿妹有傾有講，話咁快就返到屋企啦。食完飯之後，我例牌走返入房，沖完個靚涼就坐喺部電腦前面，本來諗住再諗諗啲歌詞，但係諗左咁耐都冇乜大改進，不如暫時唔諗比個腦放空一下，忽然諗起有啲緊要野未做添！