講左咁耐…期待已久,終於都離到joey姐演唱會嘅第四日啦,亦即係我做表演嘉賓嘅一日。今晚呢…我就要踏上一個歌手最嚮往最頂峰嘅舞台香港紅墈體育館。唔知點解呢…緊張左咁耐,到真係離到呢一日,感覺又相對輕鬆喎。之前幾晚我都有留意有關joey姐演唱會嘅消息,普遍都大鑊好評。雖然今日要去演唱會,但因為大台果邊已經復左工,所以今日一早我就返左公司辦公室。不過其實都未係真正有野做嘅,都只係開吓會,傾吓離緊會有啲咩比我做咁,Ella 話喎,離緊其中一部台慶劇主題曲會比我唱喎,而且我仲要出演其中一個角色。不過唔係啲咩重要角色離嘅,所以都比較輕鬆,都好嘅…如果係重要角色嘅話聽人講又要拍通宵又冇得收工咁架嘛,我就寧願唔做啦…!

傾完一輪,了解完套劇嘅基本資料,再約好離緊去錄音室練歌嘅時間之後呢,因為都真係未有啲咩做。所以中午時間左右我就拍拍囉柚走啦。距離演唱會仲有半日,又冇野做喎,見近近地我就走左返旺角老豆公司度啦。

「…咦!聰…唔係返電視台架咩?做乜返離嘅?」mandy姐一見到我就問。

「…冇呀,啱啱做完野經開附近咪上離睇吓囉。」我回應。

「…得唔得閒呀?」mandy姐問。





「…有貨急住送?」我問。

「…唔係,不過ivy依家要過總公司果邊set場,睇吓你方唔方便車一車佢過去咋嘛?」mandy姐有啲唔好意思咁問。

「…哦…好呀,橫掂我依家冇嘢做!」我回應。

「…唔該哂!」阿妹做樣同我講唔該,就係咁…我就同阿妹一齊返觀塘總公司啦。

其實都好似未同過阿妹一齊返去咁,今次都係第一次咋。





「…過去搞咩呀?」揸緊車果陣我問阿妹。

「…set場呀,頭先mandy姐咪講左囉!」阿妹回應。

「…哦。好地地做乜要set ?」我好似問左個無知問題。

「…大佬呀,我哋做室內設計架,唔間中轉下啲佈置比人睇吓,點說服到人幫襯我哋呢!」阿妹回應,好似唔多開心咁款喎。

「…做乜咁唔耐煩呀?」我問。





「…唉!唔知要搞幾耐吖嘛,你知啦…今晚演唱會唔遲得架嘛,一陣set完場仲要等攝影師影相喎,師傅又喺度,又唔可以話走就走喎,唉…諗起都煩。」阿妹一輪咀咁講。講到尾都係驚遲收工姐,真係愛莫能助啦。

既然阿妹講到時間咁緊迫,我就唯有開快啲車佢去啦。廿分鐘都唔洗就已經去到觀塘總舖。阿妹一枝箭咁仆到落車,而我就施施然咁泊好部車慢慢咁行上去啦。上到總舖中門大開,走廊放左啲新返嘅傢俬,阿妹同佢師傅力王已經開始緊,兩個傾緊啲野應該點樣擺先靚,而我緊係一於小理啦,同力王、其他同事打左聲招呼後,我就走左入房搵老豆吹陣水啦。

「…咦~咩風吹你離呀仔!」一入到房老豆好興奮咁同我講。

「…車阿妹上離吖嘛,咪順便睇吓你囉。」老豆回應。

「…哦!啱啦…拿你睇吓!」老豆喺櫃桶攞左幾張紙出離遞比我睇。

「…咩離架?」我一邊接一邊問。

「…離緊公司春茗你睇吓邊圍菜好啲?」原來係酒樓菜單,乜原來公司想搞春茗咩…都啱嘅就過年都要慰勞吓啲員工嘅。

「…是但啦,一係呢個囉,八八八八乜都包哂。」我敷衍回應。





「…我都係覺得呢個好,好啦一於揀呢個!哈哈!」其實係因為我見到老豆已經圈住左,所以我知佢鍾意我先揀呢個姐,嘻嘻…其實個個都差唔多架啦,不過見到老豆咁開心就夠啦。

「…吖!仲有!」老豆忽然醒起,之後再喺櫃桶個夾萬仔攞左張野出離比我喎。

「…咩離架?」我一邊接一邊問,但接到之後我就睇到原來係一張支票。

「…做乜比張票我呀?」我有啲疑惑咁問。

「…年尾分紅吖嘛,全部股東都有架,都係按比例分。」老豆回應,但股東關我咩事呀?

「…我幾時做左股東架?」我反問。

「…一開始你咪夾左五百萬囉,你咁都唔記得。」老豆理所當然咁款,點解我完全冇印象嘅?





「…五百萬?果五百萬唔係夾份買樓架咩?」我再問。

「…咩呀,一直都話當你入股架嘛,係你冇心裝載姐,袋住佢啦。」老豆一邊講一邊張張票推落我件風褸袋度,搞到我想推都推唔到,因為其實我望到個銀碼都真係唔細,無啦啦比咁大筆錢囉,都唔知用離做乜。

「…但係…大拿拿二千萬喎,我分到咁多?」我有啲驚訝…因為二千萬喎,雖然我地依家已經唔係普通人姐,但忽然比二千萬我都真係有啲不知所措。

「…舊年市道好好呀,自從思敏老豆入股之後,生意不斷倍速增長,舊年全年營業額差唔多過憶,你果二千萬分紅係搵會計師根據各股東所佔嘅股權計出離,唔係我亂比你架。」老豆詳細解釋,原來公司搵咁多錢架,真係俾佢嚇一跳。

「…嘩…搵埋會計師咁認真架?」我有啲驚訝咁講。

「…有其他股東架嘛,盤數一定要清清楚楚架,加上依家申請緊上市,條數一定要做靚啲。」老豆再講。

就係咁…無啦啦就多左二千萬,依家拎到二千萬同當初中六合彩個感覺完全唔同哂。果陣係激動到好似痴左線咁,但係依家呢…因為本身已經有車有樓,再多嘅錢根本就係浮雲,所以真係無哂感覺啦,加上一日未解決我同詠恩之間嘅問題,就算有再多嘅錢都唔會開心,Anyway既然係公司制度我唯有照收啦。

同老豆吹左陣水見時候都唔早我就拍拍囉柚鬆人啦。臨走見到阿妹果個無奈嘅眼神,真係好想偷笑,嘻嘻…希望佢準時走到啦,見到佢師傅力王仲係好認真咁研究緊點樣可以再整得好啲果個樣,我勸佢都唔好咁大期望啦。落街攞車之後,我就開車過去紅磡啦。今次我醒啦…一早同Sandy 姐傾好哂,登記哂車牌,直接將部車揸埋入紅館入面,比起上次要喺商場行返過離,真係輕鬆得多。拍好部車我就經員工通道直接入到後台。





雖然依家距離開show仲有個幾鐘,但後台已經非常墟冚。除咗本身在場嘅導演、監製、場務,燈光、化妝、佈景、攝影…等等,仲有好多記者同其他藝人朋友,真係仲逼過行花市。同記者朋友其他藝人寒暄幾句之後,我終於都有機會走到埋joey姐身邊啦。

「…good show呀!joey姐!」我講左一聲。

而家嘅joey姐,雖然仲係著住便服,但個裝已經set到行一行,導演就喺joey姐隔離,應該係講緊一陣出場應該要點做之類嘅野。

「…聰!離左啦!」joey姐笑笑口講,睇得出佢經歷左頭三晚之後所有野已經適應哂,everything under control咁款,而家就只有享受。

不過joey真係好忙,講唔夠兩句,佢又比人捉走左唔知有啲咩要溝通咁。咁我緊係唔阻佢啦,自己四圍行吓睇吓啲佈置睇吓啲機關咁,再同其他人吹下水時間好快就到啦,距離開場時間只係得返半個鐘左右,導演再一次同我交代一陣我做特別嘉賓出場嘅流程,之後我就由工作人員安排到出面嘅vip坐位度坐低休息下啦。

除左我之外好多頭先喺後台見到嘅藝人都開始入坐緊,而同時公眾亦開始入場,一時間會場開始熱鬧起離啦。

因為四周圍都係vip,唔係藝人就係名流紳士,所以坐定左我都唔敢再亂郁,乖乖地咁準備欣賞演唱會啦。雖然話就話唔亂郁姐,但係眼睛依然會四周圍望嘅,眼見入場嘅人越離越多,但係我比詠恩嘅兩個坐位依然係空無一人。我比詠恩嘅飛雖然唔係vip區,但都係最貴嘅位置中最近嘅,同vip區距離唔遠所以我可以好清楚咁睇到。時間一分一秒咁過,詠恩始終都無出現,到開場前幾分鐘先見到阿妹同黑仔兩個跑住咁入離,點都好啦…詠恩無離已成定局,依家我唯有暫時拋開一切嘅壓力,拋開一切嘅苦惱、煩惱去享受一個好和平、好和平,好親切嘅音樂會。





「…~呼~~」音樂特效開始響起,現場嘅燈亦都熄滅。

一個好似星球嘅波慢慢喺場中間降落離,而且星球外圍不斷發出金光閃閃嘅燈光,非常之靚…代表演唱會正式開始啦。

「…只知要飛….」星球上下打開,joey姐喺星球中間出現,果種震撼感真係好有張力,令全場嘅觀眾霎時失控大叫。

我亦都一樣啦,盡情享受…joey姐甜美嘅歌聲,恍如播放CD嘅唱功,簡直就係前無古人後無來者。好歌一首接一首,我一邊聽一邊欣賞住完美嘅特效,見到其中有幕嘅特效就好似落雪咁,霎時令我諗返起同詠恩一齊喺仙女山玩雪嘅情景,再望一望後面,詠恩果兩個位依然係空無一人,令我忽然有一種好失落嘅感覺,咪住先…「看有雪落了,獨自看都不震撼,跟你滑才開心。個唱棒極
了,但是你聽不見吧,使我忽爾傷感。」我忽然諗到我一直都覺得唔對路嘅第二段歌詞部分應該點樣改啦,拿拿聲攞個電話出離記低佢先。

時間過得好快呀,一首接一首嘅二十年經典金曲,真係令人聽出耳油,快樂不知時日過,諗一諗個rundown原來仲有兩首歌左右,就到我出場架啦。於是我就鬼鬼鼠鼠咁起身,經過走廊通道行到去一早已經知道嘅後台門口,再經由工作人員帶到我入到去後台嘅核心地帶啦。

「…敬聰已經就位,機械師…各單位注意,一陣joey講到預訂台詞之後就開始升敬聰上去。」導演喺後台好緊張咁吩咐唔同嘅部門作出配合,而我呢…就戇居居咁企咗喺個升降台度準備…喺呢一刻…我開始有緊張嘅感覺啦,時間過得好慢…感覺周圍嘅聲音越離越細聲,細聲到淨係得返我自己嘅心跳咁。

「…卜卜~~卜卜~~」每跳一下就好似跳左一世咁耐,果種感覺簡直就係折磨。我而家終於知道以前細個睇「男兒當入樽」入面個四眼哥哥點解射個三分都可以諗回憶諗幾集啦,原來真係可以諗幾集架!

「…因為以下落嚟嘅環節,係…特別嘉賓嘅環節!」聽到joey姐喺上面已經開始讀出台詞啦。

「…各單位準備,三…二…一!」導演喺對講機度大叫。

「…請以熱烈嘅掌聲歡迎我第四場嘅表演嘉賓!」joey姐講出關鍵台詞,升降台開始將我升上去。

「….登~~登登~登登登~~~!」同時我首新歌嘅音樂開始響起!

「…hello大家好!」

「…呼~~!」全場歡呼。

「…呢首歌想送俾一個好特別嘅人,順便送埋比大家啦今晚!」我講出一句台詞,之後就開始唱歌啦。

https://youtu.be/7lJMe7_6zEY

張敬聰 不幸的人(live)

要去約會了 我卻覺得不快樂 感慨突然單身
要拆禮物了 那秒快感怎會及 收你舊時那份

*原來人一旦獨身 再好節目亦無塵
 挫折 我倒不要緊 何曾共你 分過兩份
 望著 彤雲萬里 無人伴著我會恨
 若沒 情人像你 良辰樂事有缺陷

#那時 太快樂 快樂之後 更抱憾
 碰著好運 都不會 太令人怦然動心
 難怪 我最近判若兩人
我慶幸這樣不幸 單身了 以便能 完全獨吞 這黑暗

看有雪落了 獨自看都不震撼 跟你滑才開心
個唱棒極了 但是你聽不見吧 使我忽爾傷感

Repeat *,#

難平淡是你責任
那時 太快樂 快樂之後 更抱憾
那份高潮 今天我再面臨 何其陌生
難怪 我最近也沒愛人
我慶幸這樣不幸 不需要 再問誰 陪同受勛 最相襯

「…可惜呢個人始終都係冇出現,我唔知佢點解要刻意咁避開我…點都好啦…送比大家「不幸的人」之後將個台交返比今晚嘅主角!thanks you!」outro其間…我講出我嘅心聲!