中左六合彩頭獎四千八百萬，依家唔知點算?: 96 生日會？
「…貝沙灣五期吖嘛？」司機望一望倒後鏡回應。
「…貝沙灣？」我呆咗咁望住詠恩。
「…係…係呀！」詠恩有啲尷尬咁講，到底發生咩事呀？
「…五期！八號屋唔該！」去到貝沙灣閘口，詠恩較低車窗同保安員講，之後保安員就開閘放左我哋部車入去啦。
「…咩五期八號屋呀？恩？」我依家成面問號啦。
「…我都唔知架！我都係琴日離過一次架咋，不如一陣你問老爺啦！」詠恩回應，咁我唯有一陣問老豆啦。
一入到屋苑，首先經過四期九幢高樓大廈，之後又去到一個閘口，一個黑人保安行咗埋嚟，之後詠恩校低咗車窗俾咗張住戶證個保安睇，黑人保安睇完之後就放咗我哋入去啦。再經過一條旋轉而上嘅天橋就到達五期洋房嘅範圍啦。司機車到我哋去到八號屋門口就放低左我哋，一落車就見到阿媽喺屋門口車庫拜緊神。
「…聰！返離拿！快啲過離攬過火盆然後裝枝香先。」阿媽一見到我就走左埋離拖左我過去做左啲拜神儀式，又碌柚葉有火盤咁，搞完一輪之後，就叫我入去睇吓我哋間新屋喎。
一推開門…係一個玄關位，除低鞋換咗拖鞋之後，我同詠恩就行左去屋嘅大廳啦！喂…大佬…個廳大到呢…放左張六、七人大梳化喺度，但係依然係覺得好空曠…！
「…阿仔…家嫂返離拿！」老豆喺其中一間房行左出離，應該係書房之類嘅野。
「…嘩！老豆…搞咩呀？」我有啲驚訝攤大兩隻手板咁問。
「…鍾唔鍾意啊？我哋公司裝修架！你個妹親自設計！」老豆好自豪咁樣講，之後佢就搭住我一齊坐咗埋沙發嗰度啦。
「…玩到咁大呀！唔平㗎喎…呢啲獨立屋憶憶聲㗎喎，你邊有咁多錢呀？」我好疑惑咁問，雖然老豆而家有錢姐，都未至於咁快可以買到過憶嘅貝沙灣獨立屋掛。
「…租架咋嘛，唔洗廿萬！」老豆笑笑口講，哦…原來租嘅，咁就合理好多。
「…都唔洗租咁大間屋吖，廿萬都唔小錢架嘛。」我講，因為間屋真係大到離哂譜，就咁睇落應該有四、五千尺，望到出面有個大花園，花園邊仲有個泳池仔添，使唔使咁誇呀！
「…其實你未入醫院之前，我已經租咗呢度㗎啦，個業主都係投資客離嘅，之前都係搵我地公司做室內設計，同佢傾開佢問我有冇興趣喎…佢話成年都未有人租可以平租比我喎，你知啦…嚟緊公司上市，做得上市公司主席，無返間似樣啲嘅屋點得啊，而且離緊家嫂同孫女會搬入離架嘛，我哋原本嗰度邊夠住呀，況且依家仲多咗個慈菇定添！哈哈…諗起就開心啦，我哋張家終於有後啦。」老豆越講就越開心，仲攞埋支紅酒出嚟飲添，簡直就係一個入型入格嘅上流社會有錢佬咁款。
「…但係廿萬一個月都真係幾貴吓！」我再講。
「…傻仔！入公司數架嘛，慳返唔少稅架！」老豆回應…估唔到佢而家已經識玩呢啲有錢佬遊戲，真係佩服佩服。
「拿…一樓係我哋兩老同你阿妹嘅，成層二樓都係留比你一家四口架啦，上去睇吓鍾唔鍾意！」老豆指一指樓梯講，於是我同詠恩就戰戰兢兢咁行上去睇吓啦。
「…你上過去未呀？」行緊嗰陣我問詠恩。
「…未…未呀，我都係琴日奶奶叫車車我過離攞啲飯餸比你我先離過咋，琴日都係喺樓下攞嘅！」詠恩擰頭回應，於是我就拖住詠恩隻手繼續行上去啦。
一上到二樓係一個偏廳，有梳化茶几同電視櫃，裝修得好溫馨，連住偏廳係一間半開放式兒童房，入面放左BB床同好多玩具色彩繽紛咁，之後有兩間房，其中一間房應該係比浠琳嘅，因為入面除左有張粉紅色嘅公主床之外仲有書枱，佈置得好sweet ，最後一間應該係我哋嘅主人房，有一個好大嘅套廁…仲放咗個好大嘅圓形浴缸喺度添，阿妹真係知我心…知我鍾意浸浴。
「…鍾唔鍾意呀？」睇完之後我問詠恩。
「…嗯！好鍾意呀，浠琳出院之後搬入嚟實開心死佢。」詠恩回應。
「…不過其實只要我地一家四口可以喺埋一齊，住邊度我都會咁開心！」詠恩再有感而發咁攬住我講。
就係咁…詠恩正式搬左入我哋張家嘅大家庭啦。之後嘅日子…因為我個肝要幾個月先可以完全恢復，咁所以呢…我就日日喺屋企成個廢青咁。不過好彩…而家資訊科技發達，我就算係屋企都可以繼續寫歌，間中開live同啲歌迷so so下，咁嘅生活真係快活過神仙。詠恩亦都無做野，全職做我嘅家務助理，平時跟住奶奶跟出跟入，幫浠琳返學校攞下功課同陪奶奶買餸咁，就係一個少奶奶嘅生活，好快就過左一個月啦，浠琳終於可以出院返離，入到屋果陣…浠琳興奮到周圍亂跑，要詠恩撳住佢，佢先肯停落離，之後上到二樓又玩到佢細佬間BB房啲玩具亂哂，嘻嘻…都係嘅…浠琳都係得九歲，仲係小朋友貪玩都正常嘅，希望第日佢錫個細佬，兩姊弟可以和睦相處唔好爭玩具玩啦。
時間好快又過左幾個月，我嘅身體已經完全康復，至於浠琳呢，都恢復得七七八八啦，早兩個星期已經可以返返學，今日係二零一九年四月十四日星期日…係浠琳九歲生日，今日我哋喺屋企準備同浠琳開一個盛大嘅生日會，所以一大朝早阿媽、阿妹同詠恩就出左香港仔中心果邊準備食物同蛋糕果啲啦。而我呢…嘻嘻…男人係懶啲㗎啦…瞓到黃朝百晏先施施然起身，再行左落會所度做左陣gym，hea玩完一輪之後，行返屋企…已經差唔多中午十二點啦。詠恩佢哋仲未返離，於是我就同我個寶貝女玩左一陣，我哋一齊幫手佈置場地，浠琳好乖呀…佢話自己生日會要自己搞喎，我哋夾手夾腳將啲枱櫈搬出去後花園，吹定啲氣球，同掛定啲裝飾，差唔多一點鐘…詠恩佢哋終於返離啦…而且仲同埋外父外母仲有小苑一齊返離。
「…公公婆婆、姨姨，好掛住你哋呀！」浠琳一見到佢哋就衝左埋去攬住佢哋，都係嘅…以前一向都係同佢地一齊住，依家搬走咗就梗係掛住㗎啦，不過好彩我哋都算住得近，平時浠琳返學又喺香港仔返，所以每日放學之後詠恩都會同浠琳返外家坐陣到差唔多食飯時間先返離嘅。
「…外父外母！」我禮貌叫人。
「…嘩！呢度…真係幾大吓喎！」外父入到個廳之後，睇到目定口呆咁，之後同外母咬耳仔，點晒頭咁，睇嚟佢哋都好滿意個女而家嘅生活咁。
同佢地寒暄左一輪之後，浠琳請嘅幾個Best friend都離左，生日會可以正式開始啦。大家開始食野…浠琳同啲同學有傾有講，仲喺間屋度走來走去玩得非常開心，外父外母同我阿爸阿媽坐咗喺花園出邊傾緊計，而我同詠恩、小苑、阿妹幾個就坐左喺大廳度食緊野。
「…嘩！家姐你個肚又大左啲啦喎，舵主個B係咪好辛苦㗎？」小苑摸住詠恩個肚傻更更咁問。
「…你自己試吓咪知囉！」詠恩奸笑回應，搞到小苑即時deadair 左。
「…玩嘢咩家姐你！」小苑瞇起對眼同詠恩講。
「…你同果個kenny都算行得耐吖，幾時拉埋姐？」詠恩竟然開口串小苑，咁耐以離都係第一次聽到，睇嚟詠恩真係唔同晒，個人開朗咗好多。
「…你…你咪理啦！」小苑口窒窒咁回應。
「…因為跟住落嚟嘅環節，係特別嘉賓嘅環節！」電視忽然播放joey姐演唱會嘅片段，而且仲好似係我做嘉賓嗰場添。
「…喂！咩料呀？」我有啲驚訝咁問。
「…嘻嘻…原來YouTube搜尋Joey演唱會有阿哥你做特別嘉賓果一part 喎！」原來係阿妹開出離。
「…hello大家好！」電視畫面播放緊我喺個台下邊升緊上嚟嘅情況。
「好尷尬喎，唔好播得唔得呀。」我有啲尷尬咁講。
「…我未睇過喎！」詠恩好興奮咁講。
「…我都想睇吓！」小苑和應，依家搞到四大長老都行埋入嚟睇埋一份，我真係好想搵窿捐呀。
「…呢首歌想送俾一個好特別嘅人，順便送埋比大家啦今晚！」聽返自己當日講嘅台詞，有種起雞皮嘅感覺，詠恩就睇得好投入，而我呢…就乘機走咗出花園嗰度，等自己冇咁尷尬，到佢哋聽完首歌我先施施然咁行返入去。
「…阿聰你唱歌又幾好聽喎！」一入到去外父就俾咗隻手指公我。
「…多謝外父！」我尷尬回應。
「原來浠琳爸爸係明星嚟㗎？」浠琳其中一個同學講。
「…緊係啦，我爸爸仲拍過電影添㗎！我第時都要好似爸爸咁叻！」浠琳好自豪咁回應，係呢個時候門鐘忽然響起。
阿媽走去開門，之後一個中年四眼西裝友行咗入嚟，全屋人都好疑惑咁諗緊呢個到底係邊個嚟。
「…離左啦，使唔使食啲嘢先呀？」我講，因為呢個男人其實係我請離嘅。
「…邊個離架？」詠恩問我。
「…你估下？」我奸笑回應，而家詠恩真係好疑惑。
「…大家好，我係葉xx律師，係張生請我離為佢見證佢同陳詠恩小姐嘅結婚儀式架。」葉律師講，無錯呀…其實葉律師係我請嚟㗎，嘻嘻…雖然詠恩同浠琳已經搬咗入嚟同我哋住咗一排，但因為之前我嘅身體仲未好返，而且浠琳仲未出院，咁所以呢…我同詠恩其實仲未正式註冊結婚㗎。
「…！」詠恩deadair 左。
「…意唔意外？開唔開心啊？」我對住詠恩講出經典對白。
「…唔怪知得今日執到咁正啦，着晒恤衫西褲咁，平時你喺屋企着背心波褲架咋嘛。」詠恩係個心到笑咗出嚟咁講，小苑同阿妹幫手執空花園張枱之後，我哋同律師就一齊坐晒出去準備進行儀式啦。
「…早啲同人講吖嘛，我又冇化妝！」詠恩有啲尷尬咁講。
「…我就係鍾意你唔化妝！」我拖住詠恩隻手講。
「…吖～你又口花啦！」詠恩笑笑口回應。
「…準備好未呢，唔知兩位？」律師坐咗喺中間問我哋，搞到我都有啲唔好意思添。
「…唔好意思…可以㗎啦！」我坐返直個人回應。
「… 好啦…喺兩位結為夫婦之前，本人喺職責上要提醒你地：根據《婚姻條例》締結的婚姻係莊嚴而有約束力嘅，喺法律上係一男一女自願終身結合，不容他人介入。因此，張敬聰同陳詠恩，你們嘅婚禮雖然無世俗或宗教儀式，但你地喺本人同現時在場嘅人面前當眾表示以對方為配偶，並為此簽名為證後，便成為合法夫妻。」律師講完一輪之後，就攞咗份文件出嚟俾我老豆同埋外父簽名，之後就叫我哋宣讀誓詞。
「我請在場各人見證：我張敬聰願以妳陳詠恩為我合法妻子。」我跟住紙條讀出，緊接就到詠恩宣讀。
「我請在場各人見證：我陳詠恩願以你張敬聰為我合法丈夫。」詠恩順利讀出，幾驚佢有甩漏呀，你知佢幾大懵架啦。
「…好啦，雙方可以交換戒指！」律師講，於是我就攞出我一早準備嘅一對一卡結婚戒指出離同詠恩交換啦。
「…好啦，新郎哥而家可以錫新娘啦，我宣布你哋嘅結婚儀式完成，恭喜晒一對新人。」就係咁我同詠恩就喺一片歡呼聲中熱吻，終於都有情人終成卷熟，大團圓結局啦，希望下次見大家會係我仔仔出世之後啦。