✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: #7
《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
．作者FB︰http://bit.ly/2jHymHF
．作者IG︰http://bit.ly/2rxGoFA
///////////
華小姐在精英女校長大，根本不知道男人的可怕！
我從垃圾般的書堆中找出數學書，拿著紙筆學起來。
讀了3個ch.之後，我發現自己……好像在看一堆密碼。
才不過一年，難以想像教的東西差那麼遠。
迫於無奈，我在深夜時打給阿堅求教︰
「阿堅，你一定要救我……我完全睇唔明，機會率符號到底想點？」
阿堅耐性地講解，教到我明白後，才語重深長︰
「喂，阿翔，你……你真係諗住同華同學鬥？」
「梗係啦，賭約都立咗。我無可能縮沙喎。」
「但係……你……我唔明，你點解要咁做？」
「喂喂喂，你等陣先。你唔係以為我想出風頭呀？咪傻啦！我點都唔會對佢有興趣囉！」
「我……我唔係咁嘅意思……」
「得啦，我明。一世人兩兄弟，我點都唔會同你爭嘅，你放心啦！我只係睇唔順眼佢咁鬼囂張，想教訓下佢啫。等我贏咗之後，我會叫佢做你女朋友。」
「吓……可以咁嘅咩？」
「梗得啦！佢自己話聽晒我講嘅。你等我好消息啦！」
.
3日匆匆過去，我跟華小姐又去到麥當當。
我們從五份past paper中抽出一份，在阿堅的見證下開始計時比賽。
這次的題目是88年的Maths II，真是一個好年份。
我做卷的時候如有神助，每一題答案都呼之卻出，華小姐說得不錯，阿堅真的很有教書潛質。
「Times up！Pens down！」
阿堅一聲令下，我跟她同時把答題紙交出去，然後自負地盯著對方。
「我想講呢份卷真係好易做！你今次輸梗呀！」
她嫣然一笑︰
「係咩？睇下點～ 🙂」
阿堅神速改完卷，再臉無表情地把答案交給我們。
我緊張地看看自己的分數︰
37/45
再探頭看看華小姐的……
「呵～呵～好犀利喎！3日之間啱多咗20題，真係進步神速喇。不過，好可惜呀～ 🙂 」
她揚揚手上45/45的答題。
「痴、痴線架你……你係咪出貓呀？有咩可能一題都唔錯！」
「咪亂講呀。我哋抽嚟做，根本無人知會做邊份，呢啲叫實力囉。呀，翻譯做你嘅語言，應該係技術性擊倒～ 🙂」
連阿堅也一臉遺憾地補刀︰
「阿翔，sorry，我已經對過三次，肯定無改錯卷。其實，37都已經好好成績架啦……」
「係呀，flying far，我都對你刮目相看呀。」
我瞪了她一眼，只見她蠱惑一笑︰
「呀係呢，你講嘢算數架呵？」
「我知，我要聽你講呀嘛！你想點啫？你講囉！」
她掩嘴笑笑︰
「我而家唔想講住喎。」
「喂，你估而家睇武俠小說？唔好諗住可以用呢樣嘢要脅我一世呀！今日唔講，逾期無效！」
「你諗多咗啦。我只係唔想咁大庭廣眾，驚你尷尬啫～ 🙂」
我感到血液從臉上褪去。這個恐怖女人，她想對我幹什麼？
「呵呵～放心啦，唔係咩傷天害理嘅事喎。總之，你一陣返去解咗我個MSN block，我再MSN同你講啦。」
她拉拉阿堅的衣袖，使出美人計︰
「如果flying far走數嘅話，阿堅你要主持公道呀～ 🙂」
「好……好呀！當、當當當然無問題！」
這就是我的十幾年兄弟，唉。
.
晚上，我在MSN list上找回那個莫名奇妙的科幻頭像，解開asd34567的封鎖。
事實上，這張list上我只block過兩個人。一個是asd34567，另一個是……初戀。
現在，初戀又變回這張list的唯一。
Block初戀的原因跟華小姐完全不同。因為我最在意她，才不得不封鎖她。
人生和命運總是充滿了惡意啊。
.
解封asd34567不到5秒，message又如炸彈般連珠炮發，「叮噹咚」的聲音響個不停︰
「喲，好久不見啊！終於又見面啦flying far同學，我真是好感動啊」
「你知道嗎？封鎖別人真是一件很不禮貌的事啊」
「要好好地對待朋友啊，別再做這種事啦」
然後她專用的那隻古怪狗熊又擺出了幾個鬼臉表情。
「喂，唔好講咁多廢話啦，你究竟想我做啲咩？」
「哎呀，這麼久沒見當然要先寒喧一下嘛」
「難道你不歡迎我嗎？難道你就不關心我的近況嗎？」
我彷彿隔著螢光幕看到她那惡質的笑臉，只感到一陣噁心︰
「夠啦！你再扮嘢我就offline架啦！」
古怪狗熊哭喪著臉︰
「別這樣嘛，因為這要求很不好意思嘛，總要點開場白」
「咁唔好意思開口咪唔好開口囉！我無所謂喎」
「好啦好啦，我說了」
「……我要說了！」
「我真的要說了！」
就在我超級想跑到她家揍她一頓的時候，長長的message突然跳出來︰
「阿堅說你以前成績很好的，只是失戀之後才自暴自棄，這是真的嗎？告訴我你為什麼不肯再讀書吧。」
聽她提起初戀，我立刻被怒氣攻陷︰
「呢啲係我自己嘅私隱，關你咩事？你唔覺得咁問好過份咩？八卦都要有個限度呀！」
「所以我才在MSN裡問啊。算了，如果你不想說，我也沒有別的事要你做。如果你是不守約的人，那這件事就到此為止好了」
「唔係守唔守約嘅問題，而係每個人都有啲嘢唔想俾人知！你點解要用呢個咁嘅網名？點解要用咁嘅頭像？你都係想隱藏自己啫？」
她沉默了一陣，我還以為她終於放棄時，message又突然進攻︰
「這有什麼？都可以告訴你啊。Asd34567是我在註冊台灣的科學論壇時隨便打的名字，後來在論壇當上了版主，很多網友要加我MSN，所以也繼續用這個名字。然後頭像就是蟲洞啊，你看不出來嗎？簡單來說我有兩個MSN，另一個才是加同學的。因為一開始也沒打算跟你們再見，所以才給了你們這個。還有別的疑問嗎？」
長長的話裡，沒有一個狗熊表情。
我被她突如其來的坦白嚇到，呆呆地盯著對話框說不出話。
然後她再一步進逼︰
「我說完了，那麼到你囉。回答我，你為什麼要自暴自棄呢？這就是我要求你做的事」
/////
《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
*【時光機】由作者自資出版，外邊書店沒得買
你購書支持，將令我不必再苦練光合作用維生~衷心感謝
．作者FB︰http://bit.ly/2jHymHF
．作者IG︰http://bit.ly/2rxGoFA