✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: 補習社篇 #36

「痴、痴線！你飲醉啦白痴！醒下啦！知唔知自己講緊乜嘢呀！」
我拼盡最後的理性推開Michelle，她卻把雙臂繞到我背後，抱得更緊︰
「我……好清醒……我真係可以架……陪你等佢返嚟……」

她的臉貼在我胸前，即使隔著衣服仍感到好燙。
這白痴肯定是醉得不輕，才會做出這種弱智的事。
明天等她清醒過來，只要我稍微提起，她就會羞愧到瘋狂毆打我，然後打開窗從這邊直跳下海裡。

我不斷提醒自己，那個才是現實，我眼前這個Michelle不過是妄想啊、夢魘啊、靈魂出竅啊一類不設實際的東西。
我明明很清醒，完全掌握現狀，而且絕對沒有半分醉。

然而……
為什麼我竟會皮膚發癢、呼吸困難、心臟狂跳、連大腦都彷彿麻痺？

...................................................................................
.《自修室》小說已登錄各大書店
. 全新特別篇及修改內容
. 華小姐派必讀
. 死忠華小姐派建議人手一本 <3
....................................................................................




不行不行不行，再這樣下去，事情一定會變得超級麻煩，必須速戰速決！
我先狠狠地打了自己的臉頰兩下，再輕拍她的頭︰
「喂喂喂，醒啦。你呀，明明唔飲得就咪鬼咁勇啦。入到大學千祈唔好咁添呀，唔係ocamp就畀啲獸父食鬼咗你，到時就冇人救到你架啦，OK？嗱，我而家數三聲，你自己企返好。一……二……」

「……意你……」
聲音雖細如蚊，卻搶著先機。
我心臟猛跳，處於下風卻仍逞強︰
「三！好啦，阿妹，唔好再玩，係時候瞓覺喇！」



論氣力她必然會輸，於是我用力按住她的肩膀，將她推開。
胸前只覺一涼，她站在距離我一臂之遙處，雙眼卻堅持不移地直視我。
黝黑的雙瞳閃出異樣光彩，她的目光畢直地刺進我的眼裡，彷彿要穿透我的靈魂︰
「……我，中意你……」

.

轟呀——！
彷彿聽到大腦裡不知海馬體還是下丘被炸開的聲音，「中意你」這三個字，像毒霧那樣隨神經系統擴散，令我半身麻痺。

做了十八年人，我還是頭一次，在電視機以外聽見這三個字……
華小姐不用說，我連她人在哪裡都不知道，跟喜不喜歡這一類話題更是相隔了不知多少個銀河系。
就算我跟Suki拍拖兩次，她也只會問我喜不喜歡她，從不曾說她到底喜不喜歡我。

我一直安慰自己說，因為女生就是這樣的吧？


只會問你母親跟她掉海裡會救誰之類，卻連她今晚究竟想吃西餐還是日本菜都不肯答一句。

親口說「喜歡」、「中意」這些，根本就不現實啊！
又不是日本動畫，怎麼會有女孩含羞答答地在櫻花樹下對男生說這種話？
我早在中四時已拋棄了這種無謂的幻想。

.

偏偏，在我的眼前，Michelle卻毫不退縮地凝視著我。
漆黑中仍感到她的視線，掌心是她肩膀的溫度，鼻端聞到她洗頭水的淡淡清香……
這種種富有真實感的幻覺，秒秒衝擊著我對現實世界的認知。

「……呃……似乎係我醉咗，我都係返過去先，你自己小心……」
我正想轉身，幻像Michelle卻絲毫不打算放過我，抓住我雙手續說︰
「我係認真架……我、我知你仲等緊你女神，但係我……我都想你知道，我真係……真係對你……」



「等等等等等！咪、咪玩啦！OKOK！阿Bi同阿堅匿埋喺邊度？出嚟啦！開燈啦！你哋都係想睇我出醜啫，你哋而家想影相拍片乜都得架，我真係認輸啦！喂，出嚟啦！」
我向不同方位大叫幾聲，房裡卻還是悄然無聲，連走廊也沒有半點聲音，只有窗外風雨聲不斷。

Michelle搖頭苦笑︰
「你唔使咁驚啊……我、我唔會迫你。我只係……只係想你知道我點諗……」
「就、就算你咁講……我唔明呀！呢件事根本……根本都唔合理！你、你又靚女，你又叻女，你求其講一句，啲仔由嶺南排到科大再過埋海上Kong U啦！而且我咁廢，你又咁憎我，又點會……」

「係……我啱啱見返你嘅時候，的確係好討厭你。我覺得你唔知有咩居心，仲特登去搵老師想趕你哋走，等你哋唔好再……再騷擾我哋……」
「咁、咁咪係囉，我識嘅Michelle明明應該係咁。」
「但係我……我後嚟發現，你同其他接近我哋嘅男仔完全唔同……你……我從來都未見過，好似你咁樣嘅人……」

.

「有咩唔同先得架？傻妹，唔好咁多幻想啦！個個男人一樣睇AV架咋，分別只係中意睇邊間女優同邊個系列啫。」



面對我的苦口婆心，Michelle只是一笑，拉著我在Abby的地毯上坐下，話題一轉︰
「……你記唔記得我住邊度？」
猜不透她想幹什麼，但不再糾纏在「喜歡」的話題上，我暗自鬆了一口氣︰
「呃，記、記得。」

「有冇估過，點解我會住嗰度？」
「呃……咁有好多原因嘅……你總有你嘅難處……」
「不如你而家估下？」
「嗯……唔……我……我記得……你話你媽媽做嘢好辛苦……同埋……冇聽你提過……你爸爸……」

我小心翼翼地猜測，然後斜眼偷看她的反應，只見她抱著雙腿低聲說︰
「Bingo……我冇爸爸。5歲嗰年，佢跟女人走咗。嗰時我個妹都未夠1歲。」
「呃……咁、咁樣……」
「媽咪話我哋冇爸爸會畀人睇唔起，所以成日想幫我哋搵新爸爸……但每一次……每一次……每一次……一年唔夠，又係走咗去。」



.

話題沉重得我透不過氣來，我小心思考著措詞︰
「咁……呃……都係唔好彩啫……又未必……」
「唔會有例外，根本啲男人就係咁不負責任。就算係追我嗰啲男仔，幾個月得唔到手，佢哋咪一樣轉目標。每次見到咁嘅結果，我就覺得自己冇理佢哋真係好應該。就算我同佢哋開始咗，過多幾個月咪又係變心？咩愛情？根本呃人！」

她的話語氣平淡，內容卻相當激烈。
我正想著應不應該幫天下男人說兩句好話，她突然轉過頭來︰
「但係你唔一樣。」

「吓？關、關我咩事？」
「我唔相信愛情，更加覺得愛情故事好無聊……如果有人同我講，有個男仔無名無份咁等一個女仔，等咗一年、兩年，明明連佢喺邊度都唔知，仲要出盡全力咁去搵佢，周圍求佢身邊嘅人……我會覺得呢個故事好假。邊有人會做呢啲咁冇成本效益嘅事？搵過第二個咪仲快？係咪弱智架？唔識計數？」
「呃……」

她的目光掃到我臉上，深深地凝視著︰
「但係居然……呢啲事係真架……真係會有，我好震驚……原來呢個世界，仲有你呢種人。」

.

我連連搖手︰
「點可以咁比較架？你真係呀。啲男仔追你追唔到，又唔係傻嘅，咁梗係轉目標啦。但係我唔係呀嘛……因為我……我係因為之前傷害得佢咁犀利，所以想補償下咁……」
「你要咁講都得嘅。但係，呢個咪就係你同其他人最唔同嘅地方。」

漆黑當中，她的眼眸無比溫柔︰
「反正佢都走咗咁耐，又冇返嚟，又冇晒聯絡。正常人都會覺得，佢已經放低咗以前嘅事，佢應該開始咗新生活……然後就擺低晒啲舊情，開始向前行……就好似阿堅咁。」
「咦？你……你知道？阿堅同我之前……」

她默默點頭︰
「阿堅嘅做法係正常反應。過咗去嘅嘢反正已經追唔返，所以就由得佢過去，自己踏出新一步。但係……但係你，偏偏冇咁做。你仲走去研究佢中意嘅嘢，仲想去佢個領域搵返佢，仲想去……發明時光機……」

「呃……唔使再講喇，我知我有幾大言不慚……」
「我開頭以為，呢個女仔一定好特別、一定好靚……但搵得佢嘅嘢越嚟越多之後，我先明白……特別嗰個，係你……」

「我……我睇住你做緊嘅嘢，我記得你第一次去我學校嗰時嘅神情，我見到你不顧一切去追佢時嗰個樣……我……我終於相信，原來呢個世界，真係有咁長情嘅人……」
她臉龐添上一抹微笑，眼中除了我，再沒有其他人。


=10pt.
=10ptby=10pt又曦
=10ptlike Page=10pt追看最新章節︰=10pthttp://bit.ly/2jHymHF
=10pt