✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: 時光機篇 #09

 
《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
 
．作者FB︰http://bit.ly/2jHymHF
．作者IG︰http://bit.ly/2rxGoFA
 
///////////




#09

溫暖的感覺瞬間填滿我的身體，如同會考那年無數個我們無比接近的時刻。

她的頭髮撫過我鼻尖的觸感，毛毛睡衣領口傳來暖乎乎的肥皂味，她輕柔的呼吸聲，全部都充滿真實感。

我只知道這次我必須抱緊她，不可以再放開了。

「喂！等、等陣呀……你……」



華小姐用力掙扎幾下把我推開，緊張地望了倒在床上的歐陽一眼，才把我推出房外關上門。

回到客廳，她雙手保護住自己身體，滿臉通紅地盯住我︰

「你……你做乜嘢呀？死變態佬，無名大喺度架！」

「我……你……我先想問你呀，點解你會同佢住埋一齊？你喺香港又唔係冇屋企！」

她送我一個「關你咩事」眼神︰



「住宿舍有咩問題？你同你女朋友一齊瞓研究生宿舍添啦。」

「咩女朋友？我都冇女朋友。」

她橫我一眼，冷笑︰

「Michelle Lam喎，你想唔認佢呀？嗰日睇住你哋晨早喺研究生宿舍行出嚟。」

我凝視著她生氣的樣子，喜不自勝︰

「……你，呷醋？」

「咩、咩呷咩醋呀？癡、癡線架！我只係話住喺宿舍好正常之嘛。」



.

她戴著眼鏡又羞又怒的樣子，直讓我想起會考時老是被我激怒的她，忍不住笑了起來，拉住她的手直視她的眼睛︰

「我真係冇女朋友。阿Mi唔係我女朋友嚟，只係我哋幫阿堅搞婚禮，所以佢嚟幫我手執嘢。你……你一直避開我，就係因為咁？」

她把手抽回去，皺起眉頭︰

「咩、咩呀？明明嗰年我返嚟香港，已經見到你哋著晒情侶裝鬼咁sweet。想呃邊個？」

「呃……你講中七嗰年？麥當當嗰次？冤枉呀大人！嗰次我已經即刻追出去，但根本追你唔到。跟住我仲一直上網搵你……啊……我諗起啦！」

我激動起來，指著歐陽的房門︰

「嗰時我明明已經搵到去星空，就係呢條友阻住晒唔俾我搵你。佢擺明好想食咗你啦，你仲同佢住埋同一間屋，著埋啲咁可愛嘅睡衣……半夜佢夜襲你點算？」



「咪當全世界都好似你咁周圍非禮人啦，死變態佬！」

「就算全世界男人都唔係咁，歐陽都一定係囉！」

「你根本就唔明！無名大都唔係啲咁嘅人！」

「好呀咁你講呀！你同佢咩關係？」

「佢……」

華小姐紅著臉想反駁什麼，最後只是盤起雙手，重重嘆一口氣︰

「算啦，我都係冇嘢想同你講……你走啦。」



.

我一愣，現在走了的話，我還有機會再跟她單獨說話嗎？

我連忙迫自己冷靜︰

「呃，sor，我、我頭先激動咗少少……因為我……我真係……真係好掛住你，掛咗好多年……send咗好多email俾你，但從來都冇收過回信……」

她別開臉︰

「以前嘅email我冇用啦……MSN轉咗skype之後，更加冇理由再開返……其實，點都好啦，件事真係過咗好多好多年啦……」

「等陣先，你指asd34567嗰個？但我係send email去plok嗰個mailbox喎。」

她終於抬起頭來望我︰



「你點會有呢個mailbox嘅？」

「呃，問你母校拎返嚟……總之，由中七嗰年開始，我就一直寄信過去，只係你唔理我。」

「……我真係冇收過喎。」

「有、有乜可能……你、你借部電腦俾我，我而家開俾你睇！」

「電腦？你用電話check唔得咩？」

我自豪地從褲袋中掏出日式摺機︰

「認唔認得？我仲係用緊呢部電話，所以係上唔到網架。」

她看著我的眼神有如看見古董︰

「吓……你……點解唔換smart phone？」

「因為，我有啲好緊要嘅嘢唔捨得放手。」

我笑著打開她會考那年send來的SMS，再遞給她。她每看一段SMS臉色就紅了幾分，接連看了好幾個，臉上已紅得像章魚︰

「唔、唔得！呢啲嘢……呢啲咁嘅……」

她的手指飛快動了幾起。

「喂，你想點？」

「梗……梗係delete咗佢啦！」

她說得激動，手指都有點發抖。

「癡、癡線！呢啲我寶貝嚟架！」

「唔得呀！俾人睇到點算喎？」

.

我伸手想把電話奪回來，她機靈地背對著我，把電話伸到梳化的另一端，手指繼續不死心地在日文系統裡尋找著刪除鍵。

這傢伙真是太天真了，是不是已忘了當年跟我在自修室搶書的教訓？

玩這種搶東西的遊戲，身高就是絕對優勢啊！更何況現在的我比當年還高了幾cm，她怎麼搶得贏我？

我用手臂環著她的腰輕輕一抱，舉手一搶，電話手到擒來。華小姐轉身掙扎，想推開我再把電話搶回去，但當然不夠力。

我正想笑話她幾句，但在遇到她目光的瞬間，又不由得靜止下來。

那水潤潤的眼神不只有我的倒影，還彷彿藏著千言萬語。

她就在離我這麼近的距離，彷彿我的鼻尖隨時可以碰到她的臉頰。只要我稍稍靠近一點……

「唔！」

她漲紅著臉，扭著頭不讓我接近，還縮起肩膀用力地推開我的嘴巴。這一刻又覺得她的氣力比想像中大，我感覺到自己下顎開始變型。

就此僵持幾秒，我怕弄傷她便放鬆了力度。她抓緊時機鑽出去，逃到梳化最遠一端。

氣氛詭異地沉默。

我冷靜下來才覺得脖子有點痛，而且剛才發生的事怎麼想都比搶電話厲害多了。

我剛才是不是太衝動了……

偷望她一眼，只見她低著頭捂著嘴，似乎很不舒服。

「呃……我係咪整到你？sorry……」

她這才回過神來，狠狠瞪我︰

「……色狼！」

我連忙舉起雙手︰

「呃，唔、唔係呀……我本身真係只係諗住拎返部電話……因為嗰個係你，所以先至想……」

「你對個個都會咁講架啦！」

她拿起梳化的咕臣掟到我臉上︰

「死變態，你都係快啲返去喇，唔好再留喺度！」

「呃……我、但係我仲有嘢好多嘢想問……email啦，仲有嗰封密、密碼信啦……」

「呢啲嘢幾時講都一樣啦！」

她二話不說就打開大門，直把我往外推。

我抓住門框︰

「等、等陣先……咁我幾時可以再單獨……」

「單獨？有咩留返日光日白人多嘅時候再喺研究室講啦！」

「呯」！

木門重重關上，不給我繼續糾纏的機會。

我在門外站了一陣，檢查電話裡的SMS收件匣，確定那幾條SMS絲毫無損。

直至聽不到屋裡傳來動靜，我才轉身離開教職員宿舍。

夜風之中，手心上彷彿仍留有那件毛毛睡衣的柔軟觸感。

回味著剛才華小姐的神情，心中一甜。

我見過她傷心難過，見過她生氣絕望……幸好她剛才的表情，並沒到那地步。

也許她對我還有很多誤解，也許她還在怪責我，也許她認定我是個色狼，但是……

她說我還可以在研究室找她說話，真的太好了。

.

第二天我早早去到研究室，把歷年來的電郵列印出來，與那封用摩氏密碼寫成的me2信一同放進文件夾，緊張地等華小姐回來。

但等到黃昏，她還是沒有來。
.
.

by又曦
***補習社篇出書版與網上版是完全兩個故事
 

全系列現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
 
*【時光機】由作者自資出版，外邊書店沒得買
你購書支持，將令我不必再苦練光合作用維生~衷心感謝
 
．作者FB︰http://bit.ly/2jHymHF
．作者IG︰[url=http://bit.ly/2rxGoFA%5b/url]http://bit.ly/2rxGoFA[/url]