當年我曾經追到一位女神,但我竟然飛左佢。: 第十九節:不解

檸檬,檸檬,一諗我就諗到聖誕前夕

睇黎已經趕唔切係聖誕節正日之前解到,究竟有咩含意係裏面。

又黎到一年一度既聖誕節崇拜,諗起前兩年我地四個既時光,不禁有啲懷念。

聽完啲老師歌頌完耶穌之後,上到班房又係開餐食野既時候。

其實年年都咁過我開始有啲厭倦,不過阿結推動之下我都勉強玩下小遊戲咁。



我亦都見到阿彤不斷望過黎,好似期待緊我同佢講檸檬有咩意思。

當然我仲未諗到。

「好啦,野又食完遊戲又玩完,到左交換禮物環節啦喎。」陳老師對住全班講

死啦,依排顧住解條難題,連禮物都唔記得買,不過唔緊要,換唔換禮物係自己簡。加上我都無特別想同邊個交換。

當我望住其他人好開心咁交換禮物個時,阿靜行埋黎拎左盒禮物送比我



「送比你架,唔好唔收呀,我自己親手整架」阿靜講完就塞左份禮物比我。

「妳都塞到埋黎,我邊好意思唔收呀,但係我唔記得買禮物喎。」我應返阿靜

「唔緊要呀,我都唔介意,不過我想你返屋企先拆黎睇。」阿靜話

「妳唔介意就得啦,咁我就返屋企先拆,多謝妳。」我估唔到今年會有人送聖誕禮物比我,更加估唔到會係阿靜。

「哇.平時咁cool既阿靜都會送禮物比人架。」阿結見阿靜行開左就過黎同我講



「佢唔係cool,只係成日都好怕羞姐,你地好多人都誤會左佢啦。」我解釋番比阿結聽

「係啦係啦,知你了解阿靜啦,不過我頭先見到阿彤望到阿靜送禮物比你,就即刻黑左面同有啲失落。」阿結將佢見到既野同我講番

死得啦,迷題未解到,依家仲比佢見到有女仔送禮物比我,換轉係我都會嬲。

放學番到屋企我就拆開阿靜送既禮物,一拆開原來係條頸巾。

原來阿靜親手織左條頸巾比我,我諗番起兩年前既我都係織左條頸巾比阿彤。

我係櫃桶拎埋阿彤之前整既手襪出黎。

[有人話過女仔親手整禮物送比男仔係想表達佢對男仔有意思。]

望住依兩份禮物,就好似望住兩份心意咁。



而個問題係阿靜對我係咩感覺呢?