人地話光陰似箭,我覺得係無錯既。

同番阿彤一齊我覺得時間真係過得好快。

由中二識佢,中途離離合合,眨下眼已經黎到中五。

升到上中五大家都為左準備DSE而奮鬥。

好多人都變到比初中成熟,為左自己既前途而努力讀書。



但係我覺得難得可以三年同一班就要更加珍惜依段時光。

就算要面對DSE都需要同班上面既同學多啲溝通交流。

老實講我地成班係中四既時候簡直係一盤散沙,

大家都黎自唔同既班別,大家都唔願意同其他人講多啲野。

就算講都只係學業上既話題,好少會有其他野講。



今年升左上中五班主任唔想大家係咁既風氣下讀書。

所以就舉辦就唔同既班會活動令大家團結融洽。

今年開左學三個星期班主任文老師就搞左個camp活動。

為左想我地班融洽啲,文老師就叫我同阿結叫多啲自己班既人參加。

「唉,死啦今次,我地班啲男同學好多都我行我素,好難叫到佢地參加架喎,文老師竟然比啲咁既重任我地。」我同阿結講



「不如咁啦,你就責備叫啲女同學參加,我就叫啲男同學參加,依班既男仔我都幾熟下。」阿結提出左建議

「好呀,不過我同班女同學都唔係好熟,未必叫齊到人。」我講

「你可以叫阿彤幫下手,橫掂你地都係番埋一齊,佢同依班啲女同學幾熟。」阿結同我講

唔知點解阿結又係邊到收到風,成日都知咁多野。

「好啦,咁我地分頭行事,我都想自己班團結啲。」我講

今年坐我隔離既係阿彤,我諗文老師已經知道我地拍拖所以好好人咁專登調我地兩個一齊坐,加上阿彤又可以係學業上幫助我,令到我覺得文老師諗野好周到。

番到位我就同阿彤講:

「文老師搞左個camp想多啲人參加,令到我地班融洽團隊,妳可唔可以幫手叫啲女仔參加。」



「緊係得,我都覺得我地班太過注重讀書好少交流,我陣間小息盡量叫多啲女仔參加啦。」阿彤答番我

就係咁,阿彤同阿結就幫手叫多啲同學參加camp依個活動,好快就去到報名既時候。