當年我曾經追到一位女神,但我竟然飛左佢。: 第四十節:練習

到左下個星期一我地收到比賽既時間表,我果然無估錯到,我地中五既比賽定左係今個星期三放學時段。

阿結約左我地正選嗰八位同學放學練習,小息個陣我就同阿彤講：

「今日放學我溫唔到習,阿結約左我地練波。」我同阿彤講

「唔緊要呀,當係休息下囉,有時都要放鬆下。」阿彤好體貼咁講

「妳都係呀,唔好谷得自己太辛苦,會有反效果架。」我講



「我有分寸架啦,唔洗擔心我喎。」阿彤答番我

「星期三妳同補習班請左假未?」我問

「今個星期除左星期六其他日子都請哂架啦,學你講唔好谷得自己太辛苦呀,所以今個星期咪想休息下。」阿彤答番我

我地傾左一陣就打鐘,我就返埋位上堂期待今日放學既練習。

由於放學個陣有籃球隊既訓練,所以我地求其搬左個龍門去一二邊就練下射波。



「我地仲未分正選同後備喎,抽籤又好似唔係幾好,不如我地搵個人守住龍先,邊個最快射入兩球既就做正選。」阿結提議

「咁搵邊個守龍門?又猜包剪揼?」阿鈞問左我想問既問題

「不如由阿靖做龍門啦,我記得以前中三既時候班際足球佢有守過仲幾守得幾勁。」阿源講

我印象中三好似班際足球有對過佢班,佢仲好似係班上面既主力。

「就咁話啦,阿靖龍門就交比你，剩低既七個人過黎猜包剪揼,贏既射先,輸既跟係後面。」阿結講



阿靖只好無奈咁接受守龍門既事實。

猜完既結果順序排隊,最頭既係阿鈞,第二阿浩,第三我,第四阿結,第五阿源,第六阿蔥,第七阿河。

跟番頭先既次序我地每人輪流射三球,最快入到兩球就做正選。

打頭陣既阿鈞只係入左一球,佢好失望咁行埋左一邊。

阿浩曾經係足球隊既成員,所以好快就入左兩球做左正選,而依家終於到我射。

「放膽射過黎啦,唔洗留力。」阿靖同我講

我好快咁射完第一球入左,第二球既時候唔小心炒左,到最尾一球我非常緊張,我怕做唔到正選令到阿彤失望。

排後面既同學叫我快啲,我等左一陣就射出左我第三球,雖然無乜力水,但竟然入左。我感覺到阿靖對我放左水。



而到阿結既時候佢竟然一球都入唔到,但佢竟然一句怨言都無就行開左。

阿源曾經做過主力所以好輕鬆就入到兩球,阿蔥亦係現任足球隊,兩球對佢黎講太簡單亦都好輕鬆入左,阿河射都未射過就做左後備,我見到佢有啲唔開心。

正選名單五位已經有結果,分別係阿靖,阿浩,我,阿源同阿蔥,其他人就做後備。

我地既練習主要都係練射波,帶波同扭波，練左差唔多兩個鐘我地就休息放學。

阿結話聽日比賽前比我地休息下唔洗練,等我地有最佳狀態上場。

就係咁我地一日特訓就完結左,番到屋企臨訓前我whatsapp阿彤話我做到正選：

「頭先放學簡正選同後備我成功做左正選,比賽個日我唔會衰比妳睇」我wts阿彤



「正選還正選呀,如果累到踢唔到就唔好勉強要換人呀。」阿彤秒回我

「得架啦,信我一定無問題,個日一定拎個第一返黎比妳睇。」我講

「我都好期待睇你地比賽。」阿彤講

我地傾左一陣我話眼訓就結束左wts對話。

我都好期待個日既比賽,更加期待阿彤份禮物。