當年我曾經追到一位女神,但我竟然飛左佢。: 第四十四節：成績

好快就到左下個星期一，派卷對卷既日子。

朝早班主任節處理班務既時候,我就同阿彤傾閒計。

「點呀,你覺得自己中史會考成點?」阿彤問我

「中史我就好有信心,應該都有六成分數。妳又覺得自己點呢?」我講

「普普通通囉,應該唔會太高分。」阿彤講



「我覺得妳唔會低分囉,成日見妳日又溫夜又溫,點都有七成分數以上啦,係唔係先。」我講

「陣間就可以知道我地日溫夜溫既成果,我地兩個一定無問題既。」阿彤拉開話題

上堂鐘聲響起,我地亦拎左要用既文具就行去另一間課室。

何老師入到黎課室放低我地啲卷係老師枱就講:

你地覺得今次模擬DSE考試自己考成點?夏至東你發表下。」



我估唔到何老師第一個就問我,睇黎我今次衰左,不過唔緊要啦,照直講死就死,我心諗

「唔.........我覺得我令次自己考得都唔差,應該有六成份以上。」我緊緊張張咁講

「幾好,有自信心係一件唔錯既事。阿彤妳又點睇妳自己考成點。」何老師咁講搞到我覺得自己應該差到貼地

「我覺得自己今次比較差,應該只係僅僅合格。」阿彤咁講

何老師點一點頭講:



「我想同大家講既係,今次大家都考得唔錯,如果KEEP到去DSE,全部人拎到LEVEL 3以上都無問題。」

聽到何老師咁講我都有少少喜出望外,岩岩先比佢打沉完,依家又有番啲信心。

大家跟住自己班號出去拎卷,每個人拎卷既時候何老師都會同果位同學講幾句。

我見到阿彤攞卷果時何老師同佢講左好多野,阿彤亦好認真咁聽,阿彤番到埋位我就問佢考成點。

佢拎左份卷比我睇,成份卷既總分係80分,而阿彤竟然有65分,我望到都呆左,連出去攞卷都唔記得左。

夏至東出黎攞卷,何老師大叫我個名我先係位到出去。

拎到卷睇到分數係53分,我都即時放低左心頭大石。

何老師同我講今次考得唔錯,再努力啲都可以上到60分以上,同埋做卷果時要小心啲,錯既地方好多時都係大意。



講完之後我就行番埋位,阿彤亦都問完我幾多分都話我進步左。

雖然我同阿彤相差十幾分,但計番DSE既LEVEL已經差成兩個LEVEL。

「頭先你講我係唔係有七成分數以上我無答你係因為唔想你對自己成績低過我而失望。」阿彤講

「點會失望呢,妳考得好我緊係開心,而妳考得好過我亦係正常,妳比我更加努力去溫習,依個分數應得既,我仲會以妳為我目標追過妳既分數。」我講

「你識咁諗就好啦,我幾驚你會放棄。」阿彤講

一路對卷,阿彤亦都將我錯既地方講解一次比我聽,令到我下次唔會再錯,而有啲地方我岩佢錯我都會教番佢,大家互相提點咁樣先會有進步。

「由於份卷太多問題既關係,所以一日之內係對唔哂,我地下堂再講過。」何老師講完就放我地小息



行到返去自己間課室發現佢地仲未放得小息,我地課室上緊旅遊堂,我見到大家既面色都唔太好,睇黎今次考得唔係幾好。

果然有幾位其他班既同學係我地課室行出黎果時講左幾句話今次行得好差,我無意之中聽到。

返到課室放低文具同啲卷之後我就去左問下阿靜考成點。

「聽講今次你地好多人都考得好差,妳考成點?」我問阿靜

「唉,四成分數都無,今次死得啦。」阿靜好灰咁同我講

「唔緊要喎,今次只係模擬考試,仲有機會既,比多啲心機落去依科到,努力啲專攻依科一定會有好成績。」我拍一拍阿靜膊頭以示鼓勵

「嗯,我要再勤力啲溫旅遊依一科先得啦,咁你中史又未考成點呀?」阿靜問我

「唔錯呀都有六成分數,比我想像中高左。」我講



「咁你要KEEP落去啦,唔好一時好成績而放慢手腳。」阿靜鼓勵番我

我點頭示好之後就番左埋位,等待下一堂既來臨。

對左成日卷,終於到左放學既時候。

今日派既卷分數我都幾滿意,除左英文同數學我得四成分數之外,其他科目都過哂五成。

阿彤見我咁滿足就拉左我去行下街輕鬆下。

行過啲格仔店我地都入去睇下,夾下糖,買下野食咁,最後又坐左係商場附近既公園。

「我地幾耐無試過咁樣玩下行下食下?」阿彤問我



「對上一次我諗已經有半年啦,無辦法啦,有時我地都要為自己既學業而努力下。」我講

「岩既,你估畢左業之後我地仲多唔多機會可以咁樣輕鬆一日?」阿彤問我

「緊係會啦,點止畢業,出黎社會做野果時都會啦。」我雖然咁樣答,但實則上我完左DSE就要去外國,一年見面既機會都唔多

「係就好啦,我好驚中學畢業之後大家就失去哂聯絡,各自各為自己既生活而忙碌。」阿彤講

「就算幾忙都會抽時間出黎聚下既,大家感情咁好,一定肯抽時間出黎食番餐飯。」我講就咁講,實則上我諗既野同阿彤一樣

「唔好講到最長遠住,我地捱埋個DSE再算啦！」阿彤唔想整到個氣氛唔好而轉左話題

望住阿彤好有童真咁打鞦韆,我好想留住依一刻。

諗深一層,我地既中學生涯唔計假期真係所剩無幾,真心有啲唔捨得依間中學既人同事物。

希望畢左業之後,大家仲會保持連絡,唔好各散東西。