情人節快樂: 現在(1)、是太想念你？

     用左8年既銀包爛左，終於可以換過個新既！其實我覺得自己都唔算係一個特別念舊既人，但問題係換銀包就要將入面所有野都要清理一次，挑選一下先放入新銀包係一件好麻煩既事。所以就都拖到舊果個爛左先換。
     一一將證件，垃垃雜雜既野拎出黎逐樣分清楚邊d可以拎出黎邊d係放入新銀包好好保存。忽然係角落裏抽出一張有成10年既貼紙相，相入面有3個人，中間係我兩邊各一個女仔，大家果陣都係同班同學。左邊果個笑得甜到漏既叫Cathy，雖然係影相果陣大家都係普通同班同學，但過左一段時間之後佢成功地收左我做隻兵，而我就用左差不多一年時間先知原來佢有拍拖，我係佢心目中可能只係一隻特別執著既兵而已。
     而另一邊個女仔就叫Athena，雖然有個女神既名但從外型去到性格都一d都唔女神，就好似你從小便認識既鄰家女孩一樣雲淡風輕，連笑容也是淡淡然的。而呢個笑容亦都勾起我既一d回憶。
 
     某年新年前夕，天氣真係好凍，我企係路邊一路睇住d過路人一路係度睇下d舊既短訊。
「喂，你等左好耐呀？」Athena係人群當中竄左出黎。
「都唔係既，企係度咪當𥄫下女囉。」我收起部電話迎向佢。
「唔好意思呀，岩岩pt果度放遲左，我地快d行喇。」Athena講完已經大踏步神情確威武咁行前。
「又唔洗咁急，我地都係去年宵姐，你慌會賣哂咩d野。」
「最衰我放遲左，呢個時間搭地鐵實好多人！」


「咁. . .我地不如搭船過去再轉叮叮？應該唔會好似地鐵咁逼。」
「都ok喎！」
     就係咁我地就慢慢行去尖沙咀碼頭，係行緊既過程中我地都沒傾計，但好奇怪地又唔會有一絲絲尷尬既感覺。唔知係因為我地太熟既關係定係Athena可以比到人一種安寧既感覺。
     巴士就話會追車尾，估唔到而家搭船都會追船尾，我地就只好係等船果度坐低慢慢等。
「對唔住呀，其實我都唔知道Cathy沒同你講架，2個星期前佢同我講果陣佢都話會搵個機會同你講返. . .」Athena坐低沒幾耐就打破沈默。
「同我講返？定係好直接咁被我見到佢拖住條仔丫，佢同我直接講話我有仔呀你收當喇咪幾好，而家咁樣會好玩d？」我打斷左Athena，因為呢幾日以黎我對呢樣野都好不吐不快。
「我諗佢都唔想既，可能佢都係唔知點同你講姐. . .」Athena愈講愈細聲，可能連佢都唔知點講好。
     話題就咁戛然一止，望住個海我忽然之間諗起其實我以前一d都唔鐘意搭船。因為會暈船，但係Cathy就好鐘意一得閒就會去搭，所以陪下陪下佢搭到而家我忽然發現自己已經慣左搭船。
     係船上面我望出去維港中央夕陽既景色，細碎既金芒平均咁灑落，柔和得黎但因海面反射又有D刺眼。我忽然之間分唔清楚到底我身邊既係Cathy定Athena，到底我係慣左搭船定係慣左每日都追隨住Cathy既生活？
     夕陽每日都會有，但係賦予佢意義就只有自己，其實自己一個人睇夕陽都可以算係男人的浪漫掛，好似係。


     正當我係度胡思亂想期間，有人拍一拍我。「喂，落船喇，仲發咩吽逗呀！」Athena見我呆左係度就提我落船。
「唔通我做光合作用又要話你知咩。」我不甘示弱咁應左句。炒炒鬧鬧間我地係中環落船再行去搭叮叮去銅鑼灣。
     叮叮緩緩咁到站，見到架車就到果陣已經心叫不妙，wtf咁多人既，不過算喇都要上，因為呢個時間地鐵仲多人。同埋唔通呢個時刻先話搭地鐵咩！
     好不容易先上到車，好似入左個罐頭一樣，我同Athena身貼身咁企左一齊。我呢d毒撚幾時同除左呀媽以外既女性企得咁埋？所以為免尷尬，我就聚精會神咁望住出面，好似一個唔留神架叮叮就會飛站似的。
「你之前有沒同過Cathy搭過電車？」Athena好似為左打破我地之間既死氣好隨意問左句。
「沒喎。」我精簡而有力咁答左句，證明人係緊張既時間9up能力係大大減退。
「仲以為你地成日行街有好多機會搭添。」
「邊有好多機會丫，我就想。」我苦笑回左句。
「差不多了，我地順住人流慢慢向前，幾個站之後就可以好順利咁係車頭落車架喇。」我接住講多句，因為我發現呢個話題我真係唔係咁想接。