就喺呢個時候,古惑倫開始佢嘅說話嘞,

"蔡師傅丶齊師傅,最近,我聽聞到一啲消息,日本唐人街,好似有啲日本流氓喺度經常生事喎。。唔知,兩位師傅嘅武館,有冇受到乜嘢干擾呢?"

只見兩人眉額深鎖,無即時回應,或可能有,又或可能唔知情形,不過駱駝已經配合一齊「唱雙黃」嘞:

"兩位師傅,係咪真係有啲咁嘅事呀?如果真係嘅話,只要你哋出一句聲,我哋「東英社」,必定全力支持,無論人力,物力,只要你哋一句說話,我駱駝講過就係,尤其喺海外,我哋中國人,更加應該守望相助,係咪咁講呀?"

而情形的確係有嘅,因為兩間武館皆喺「東英」地盤範圍之內,而收「陀地」係東英嘅生意門路之一,所以「一和會」係踩過場,踢過館,而東英已經被打至縮埋,所以東英嘅地盤,已經被「一和會」橫行。





武館被人搞,兩位師傅皆知,不過,就只係唔知原來係兩黑幫爭戰嘅「副產品」啫。

蔡雄見自己老頭子未有否認,不清楚日本情況嘅佢,即時好大反應,

"老豆,真係有咁嘅事?我哋啲分館畀人搞?死架仔,咁沙pop,我哋啲館都夠膽搞?
我聽日就同啲兄弟過日本,見一個,打一個,當我哋「蔡氏武館」流㗎?"

蔡立賢回應蔡雄:

"日本分館,無錯係受過日本人干擾,不過,凡事都要從長計議,唔需要咁衝動,了解清楚多啲先至再作打算啦。"





薑,果然係老嘅辣,如果蔡立賢唔點頭,蔡雄再魯莽,都係會被㩒住。

蔡立賢雖然所知道消息只係有限,是因為分館館主亦只係受過有限干擾,「齊天分館」亦是一樣,因為「一和會」矛頭始終係「東英」班人,武館及其他生意,未係「重災區」。

古惑倫見狀,好,你有你老薑嘅辣,不過,遇上我古惑倫啊,一早已經意料當中:

"蔡師傅,言之有理,貴館既然真係出咗事,倒真要了解清楚,有乜嘢似得親身去到日本,就能夠清清楚楚啦,若然真係啲芝麻綠豆小事,咪當係去日本旅行,觀光一吓囉。"

駱駝亦乘機令事情更無話可推:





"蔡氏武館跟我哋東英社,關係密切,蔡雄更加係東英傑出嘅職員,如果唔嚴棄,今次到日本了解之行,所有機票食宿,就由社團包起,等件事情,得過明白,咁大家就可以安心啦。"

蔡立賢仍然面有難色,心諗「邊有咁大隻蛤乸隨街跳吖」:

"不過。。"

蔡雄又再搶口而出:

"仲不過乜嘢吖,老豆,咪當去旅行囉。。過去見下班徒弟徒孫都好吖。"

駱駝見蔡立賢在猶豫:

"若果蔡師父係驚及遇上日本流氓嘅安全而顧慮嘅,你大可以放心,我打算喺席上,再挑選十二位頂尖職員同行,咁,到期時,就有乜嘢事都唔使怕啦。"





蔡立賢今次真係無話可說:

"蔡某,年紀大喇,周車勞動,唔打算出門喇。。雄,你要去,就自己去啦,不過,萬事要小心,唔好輕舉妄動呀,嗰度,唔係圍村呀,人哋地方,有乜嘢事,唔好挾硬嚟呀。"

蔡雄得到蔡立賢允許,

"我知㗎喇,老豆。"

古惑倫就喺此時,再加一句,不過就向駱駝講出,但,其實係講畀眾人聽:

"老頂,如果認為十二頂尖紅棍都未夠安全,不如,我哋可以搵埋「下山虎」烏鴉做領隊吖,咁就萬無一失啦。"

古惑倫當然無打算真正搵「烏鴉」去啦,不過,佢清楚蔡雄以往跟「烏雅」嘅拳賽事件,特登借題,方便部署下一步,好叫十二位頂尖紅棍,自動請纓。

駱駝喺度扮考慮,當然又係預先開會時,排嘅戲:





"咁呀。。?"

蔡雄卻講出:

"烏雅?烏雅有乜嘢本事可以做我哋領隊呀?我哋呢度,個個都係呢兩區嘅人,大家一條心,使搵個外人做我哋領隊?"

無錯,搵烏鴉領隊,蔡雄當然不憤氣,其實佢說話亦有道理,同區職員,被另一區帶隊,格格不入,何況,呢十多人仲係「大人」紅棍?

水靈,見終於係時候出聲喇,當然,除咗佢輩分之高,大家要聽,仲有,一把柔和悅耳嘅聲音,都係非常吸引人聽:

"我,有一個提議。。"

~ 待續 ~