「東英」奔雷虎 : 耀揚: ( 7 )廿個一齊上？

古惑倫眼見席上一眾如餓虎嘅眼光，心裏不禁一笑，暗暗讚歎水靈錦上添花嘅配合自己嘅計謀，問：

＂水靈姐嘅提議，真係非常之好，唔知如何選出十二位「紅棍」，仲有冇高見呢？"

水靈望看駱駝："社團選將，都係交由返畀社團領導人去選啦，我只不過係提供一啲意見等大家參考吓啫。"

駱駝回應："水靈姐嘅智慧永遠都係先人一步，東英確係需要填補五虎呢個空缺。。（之後就面向席前所有人大聲講出），相信，剛才大家都聽到水靈姐嘅一番說話，而我駱駝認為，機會係每個人都應該平等嘅，今日坐喺席上嘅，都係我哋東英社嘅好兄弟，所以在座任何人，只要想去日本，角逐五虎空缺嘅兄弟，只需要企起身表明有興趣參加，我哋就會用方法選出當中嘅十二位。"

駱駝說話完畢，已經即時差不多每枱都有人企起身，因為在座嘅，大多數都係「大底」職位，除咗幾位叔父輩。，





古惑倫數一數人頭："老頂，有二十個。"

駱駝再次大聲："好，果然有好多兄弟「雄心壯志」，確實係我哋東英之福，呢啲兄弟們，請上一上前。"

但，之後又點呢？一般嚟講，都係大家輪流隻抽，搵出「十二强」嘅啫，非常簡單，但咁樣，難免又要另行安排，東英高層，都希望盡快解決，更唔希望搏鬥中有任何人受到損傷，講到尾，真正嘅戰場係喺日本。

駱駝正喺度諗「點樣可以叫班戇居佬隻抽呢？」，古惑倫已經微笑望向水靈，而水靈只係滿意地微笑，因為一切都進行得非常順利。。。直至駱駝細細聲喺水靈耳邊問：

"水靈姐，係咪要佢哋隻抽揾出「十二强」呀？"





水靈亦微聲耳邊回答："駱駝，做人唔好咁「死板」啦，乜你，唔想見識一吓齊師傅嘅功夫嘅咩？"

駱駝又再擺出佢迷惘嘅一副戇居表情：" 一抽二十呀？「洪興戰神 ～ 太子」都唔掂啦。"

水靈無嫌棄駱駝長他人志氣，只覺得很有趣：" 乜「洪興」嘅太子，好好抽嘅咩？有機會，倒希望可以會一會佢。" （大家當知道事後，太子因為水靈而沉淪啦）

之後，水靈就轉向齊天，

＂齊師傅，今次日本之旅，既然由你領行，唔知，可否麻煩你幫一幫忙，挑選十二位精英呢？＂





齊天唔想得罪任何人：

＂水靈小姐，齊天實在不敢，席前嘅，都係貴社得力人仕，齊某只係一介武夫，點識得揀呢？＂

水靈回答：

＂就係因為剛才得聽到蔡雄二少所講，得知齊師傅你武功高强，所以由你來揀選，就最適合不過，況且，我相信當大家見識過齊師傅嘅「大聖劈掛門」之後，一定更加令人心服口服。＂

齊天心諗，無錯，若然大過謙，呢班人未必咁輕易就咁服自己，再者，自己亦好想了解呢班所謂「棍底」，到底有起事上嚟，有冇「真材實料」幫到手，仲有最絕嘅，就係水靈連自己「門派」都搬埋上枱。。唔可以再謙喇。

齊天嘅信心，係可以「橫掃」眼前呢二十人嘅，即使佢未知眼前二十人嘅來頭，不過佢心諗，如果呢班人，以蔡雄已經係數一數二嘅話，咁即係話，在場，冇人可以擊敗佢。

雖知道，蔡雄曾經跟烏鴉打過平手嘅。

齊天企起身，抱拳：





＂既然係咁，齊天就恭敬不如從命喇，未知水靈小姐意思係想我遂個比試，還係一齊嚟呢？＂

嘩，廿個一齊上？

齊天真係自信到呢一個地步？定還是確實藝高人膽大。


～ 待續 ～