灣仔,盧押道,成條街嘅黑道生意,已經歸入「立花正仁」。

統一嘅秩序,令各行各業生意,更加興盛,有錢嘅人,都開心暢快地吃喝玩樂婊賭吹飲「嗦」,即使有外來嘅古惑仔,都只會喺呢度玩,而唔會喺呢條街「生事」。

因為無論係來自任何「社團」,都曾經有該「社團」數一數二嘅代表,跟呢條街嘅「主人」比拼過,最後,更被承認為香港獨一無二嘅「雙花紅棍」。

所以,任何人如果想唔畀面,亦即係唔畀面其他「社團」嘅「公認」,呢種「唔憤巢」態度,只會令本身犯眾憎 。實力上,更如同自討苦吃。

所以,盧押道已經成為一個如「世界花園 ~ 瑞士」嘅不戰爭地區,而利潤,就全歸「和記」所有。呢點,就係「和記」龍頭高文彪,要立花正仁挑戰港九「十大紅棍」嘅智慧。





耀揚一經離開「東英」寫字樓,已經第一時間去到盧押道,一路行,一路盤算:

「點樣可以揾立花正仁幫手呢?」

「立花正仁又可以幫到啲乜呢?」

唔知道。。。一切,都要等見到立花之後先可以搵出答案。

耀揚未見駱駝之前,已經知道日本東英開戰嘅對手係「一和會」,佢亦知道立花前身,就係一和會員,而立花,於上次「考試」,唔多唔少自己都幫過佢一把(當然自己買外圍亦賺唔少),所以,立花應該係一個「入手處」,起碼,都能了解多啲「一和會」嘅資料。





耀揚入到一間 Bar ,坐低無耐,已經被「睇場」點出:

"咦,耀揚哥今晚咁好雅慶,嚟盧押道玩呀?(之後向酒保一句)
亞 Sam ,耀揚哥飲緊乜嘢,嚟多一杯,呢兩杯入 house 數。"

耀揚頭微微一側,用眼一掃呢位「睇場」答:

"你識得我?"

「睇場」被問得有點愕然,强笑:





"上兩星期我都有份去睇立花大哥,所以我認得出耀揚哥。"

耀揚搊起眉心微微點頭:

"原來係咁。。我仲以為有屎忽鬼想埋嚟溝我,請我飲兩杯嘢就想同我傾偈。"

「睇場」身邊有啲新儬未見過耀揚,見到有人咁樣串自己亞大,即時:

"兄弟,係咪想喺度玩嘢呀?"

耀揚只係冷笑:

"我要玩嘢,仲輪到你嚟問係咪玩嘢咩?用下個腦啦?做乜呀,似住人多,就連啲細嘅講嘢都咁大聲呀?"





「睇場」無預計新收嘅儬出口咁快(自從盧押道統一,「奶仔」(立花正仁幫中兄弟/好友) 廣收新門生,大展拳腳,所以好多新儬入門),即時向耀揚「沙霖」:

"唔好意思,耀揚哥,條儬啱啱尋日先收嘅,唔識世界,唔阻你飲酒,慢慢享受,打擾哂。。

(之後更向酒保講)亞 Sam ,耀揚哥今晚張單都入 house 數。"

就强笑行開。

不過,耀揚好似未夠皮:

"咪走住。"

畀足面都仲被耀揚喝住,「睇場」開始有啲火藥味,話哂,身邊五六人傍住,咁樣畀人喝停,難落枱啊:

"耀揚,你想點先?"





耀揚答:

"我係嚟揾奶仔嘅。"

乜耀揚,唔係嚟揾立花正仁嘅咩?



~ 待續 ~