是咁的，我嘅職業係ptbf: 183.殺人犯

相入面嗰個，係阿純

我記得喇，依區嘅風景，就係喺新聞報導話發現ptgbf被殺嗰區

沙沙沙——

花灑嘅聲音突然停止

我喺手機到快速咁打：「幫我報」



點知未打完，浴室門就打開，阿純個頭就咁喺門口伸出嚟

「你搵邊個呀？」

睇嚟佢知道我知道佢啲野

我頂！啱啱聽李星段碌音係成段播出嚟，唔通佢喺浴室偷聽？

我故作鎮定，㩒咗送出制，希望佢兩個收得到幫我報警



但收到又點？佢兩個鬼知我而家喺邊咩！

咪住，點解左上角寫住「沒有服務」架？

佢打開浴室門，一陣強烈嘅香味即刻瀰漫成個空間

我望一望浴室地吓，係兩支爛咗嘅香水

「有香味冚一冚的話，血腥味就無咁快比人發現架喇。」



阿純雙手放喺身後面，好似準備咗神秘禮物咁款

佢嘅方位所在，令我無辦法衝出大門

「知唔知點解手機用唔到呀？」

阿純伸出背後嘅左手，展示一個小黑盒

手機電波嘅干擾器⋯⋯

依個時候我先發現，阿純變成咗短髮

原來係咁，戴帽係為咗掩飾自己戴咗假髮

特登喺餐廳前面睇餐牌，係等啲人對我地兩個一齊有印象，咁落口供嘅時候只會話見到我同個長頭髮嘅女仔一齊，就可以令本身短髮嘅佢嘅嫌疑大大減低



之所以搵大廈密度咁高嘅區域，係方便佢破窗或者經天台走去另一棟樓逃走

仲特登搵舊樓，貪依度無閉路電視

連開房比錢嘅時候企喺我後面，等阿嬸認唔到佢嗰樣，依一切都係佢殺人前嘅準備

依條友⋯⋯係有哂計劃嘅殺人狂！