老豆好專心咁睇戲,唔知係咪我錯覺,好似喺閃爍嘅光影之間,見到佢眼濕濕

佢唔知我望緊佢

其實劇情睇咗三次基本上已經知哂講乜

所以今次,我望住闊別多年,近在咫尺嘅老豆

時間終於無再錯開



我地嘅時間線融合,再次一齊前進

我做咗一件好基嘅事,就係伸出手,放喺老豆搭喺手柄位嘅左手手背上面

作為ptbf,每次拖起客人嘅人,對方都一定會回握,唔存在拒絕我嘅手,所以亦唔會有忐忑不安

但面對老豆嗰隻有啲粗糙嘅厚皮手,我驚受到拒絕,我不安,但仍然選擇搭喺佢手背上

係幾時開始,我隻手同老豆嘅手已經變得一樣大?



手心之下嘅手背縮走,我無奈咁笑一笑,搖搖頭

粗糙嘅手心兜去我手嘅上方,輕輕拍咗兩下

老豆依舊望住大螢幕

而我笑容中嘅無奈,煙消雲散