是咁的，我嘅職業係ptbf: 367.困我一輩子吧

我同媽咪由街頭行到街尾，又由街尾行到街頭

毫無意義咁喺一條寂靜無人嘅荒廢街道行呀行

「我同你爸爸呢，廿年前就係喺依度行呀行，逐間逐間格價。」

行到中間，媽咪停低：「結婚有好多野要準備，過程好長，有時都會猶豫下，真係咁就結婚架喇？」

佢話，因為已經過咗熱戀期太耐，所以準備結婚嘅時候不停反問自己，真係依個人？



我而家諗翻，如果到結婚仍然會問依個問題，咁其實都唔係真係好愛

「直到行到依間，決定落訂之後，你爸爸拖實我行翻出嚟，佢合埋眼吸咗啖氣，然後望住我講，終於，真係結婚喇。」

我嗰陣對情情愛愛無乜興趣，但我鍾意聽媽咪講故事，所以靜靜望住佢，無出聲

媽咪凝視生鏽嘅鐵閘微笑，佢眼中所見嘅，一定係超越鐵閘嘅昔日

「成個老襯～從此被困～」媽咪合埋眼：「所有猶豫，都喺嗰一刻消失哂。」



成個老襯～從此被困～

爸爸看著媽媽

你就，困我一輩子吧