是咁的，我嘅職業係ptbf: 406. 勝利的一剎那

「咁要睇下佢死過翻生仲係咪咁諗喇。」

我開始明白，點解miki話我對自己嘅事毫無自覺，而且遲鈍

「我問多你一次，點解你最後會決定寫遺書比阿螢？」

唔想佢因爲我而死

但歸根究底，點解嗰陣我會喺跳之前嘅一刹那，諗起阿螢？



我回想miki聽我講來龍去脈嗰陣，好似攝影鏡頭嘅雙眼

依個女人只係靠我講嘅野，同望實我，竟然可以睇穿連我自己都無自覺嘅蛛絲馬跡

佢真係好厲害

「因為⋯⋯一刹那。」

我終於明白點解miki叫我蒙眼轉圈，喺視線被遮蔽嘅情況之下，阿螢就可以慢慢接近



而因為睇唔到，下墮嘅感覺成為確實嘅死亡威脅
當時我係真心覺得自己會死

真心後悔自己自殺

渴望有人拯救，但無，所以絕望

但絕望嘅盡頭，有阿螢嘅手

「點解⋯⋯我拒絕你咁多次，你仍然保護我？」



完全代入另一個個體嘅思考模式，係近乎無可能嘅事

必須了解一個人嘅本質、全心全意咁為佢諗，以佢為本位著想

「因為⋯⋯我真係⋯⋯好鍾意你⋯⋯」

痛苦，被感動淹沒

啊呀⋯⋯

眼淚⋯⋯滲咗出嚟

我一直，期待住嘅嗰一刹那



我伸出手，抬起阿螢嘅面容

「阿螢⋯⋯你嗰一剎那⋯⋯贏咗喇。」