《三角•誌》: 2.2 結婚

「喂！阿郎，Sorry呀，呢排好多嘢做好多嘢煩，唔得閒約下你。係呢，我⋯⋯我出年年初結婚呀，作為我嘅好兄弟你一定要做伴郎呀！」
「一定一定。聽晚一齊出嚟食餐飯？」將軍嘅喜悅就算隔著部電話都聽得出，佢越開心我就越擔心。
「你唔好奇我做咩無啦啦結婚嘅咩？想唔想知我同邊個結婚？嘻嘻。」因為啱啱Cherry已經講咗我知，所以將軍打嚟話佢結婚我一啲都唔覺得驚喜。
「係呀！係呀！我嚇到反應唔過嚟姐。」唔通我又話你知你隻兵啱啱個剛剛就打嚟話晒我知咩。
「話你知你估都估唔到，我同我女神Ashley BB結婚呀！估唔到將軍都有坐正嘅一日！哈哈！」呢個傻仔，俾人當水魚咁都仲開心成咁，我就真係唔信個位公廁會睇得上將軍呢個屋邨毒撚，正式錢又冇樣又冇，冇樓冇車冇將來。

約咗將軍聽晚去鵝頸橋大排檔，摸住啤酒杯吹下水，仲話順面傾下婚禮擺酒嘅細節喎。