《三角•誌》: 5.2 訴苦

「Sorly，sorly。巴打，我好辛苦先求到老婆俾我出去炸，我話有個客搵我食飯。」將軍氣來氣喘咁係對面馬路跑過嚟，雙手㩒著膝頭，好似跑完千五米咁。
「等咗成半個鐘啦屌你。」我同將軍走過去去開個間大排檔。
「老闆照舊！」過咗陣，一碟生炒骨、豆腐火腩煲、兩碗白飯同兩支藍妹送到。將軍開晒兩支藍妹，一人支。
「點呀？出咗咩事呀？」
「唉！而家先知條女咁難頂。」？？？兄弟你做咗六年兵先知條女惡啃？臭西臭到咁都聞唔到？
「發生咗咩事呀？」我呷一啖啤酒，望著呢位突然開竅嘅巴打，後悔點解我唔早啲打醒佢。
「自從個次同你食完飯，我哋仲同咗Andy、呀康、陳仔個啲食。我老婆見完我班兄弟就屌晒鬼，話唔俾我再搵你地，話咩成班都死窮撚，唔配嚟我哋嘅婚禮。」
「嘩，條八婆都幾臭串。」
「米係囉，我同佢講，我哋班屋邨仔，小錢夠洗，有鬼大錢咩，你估個個都有父幹咩？個婚禮啲用錢我都係借錢炸。」
「條女成日懶係有錢咁，係咁白鴿眼都唔出奇。」




「有咩錢呀，住藍田私樓，小康啦。」將軍夾咗舊豆腐食，𡁻𡁻下無啦啦流眼淚。
「喂！搞咩呀男人老狗，米喊啦！有咩兄弟幫你拆掂佢！」
將軍一嘢隊咗大半支啤酒，塊面開始紅，識咗佢成八九年都係咁淺酒量，睇嚟今晚又要幫佢截的士嫁啦。