選完男女班長之後,我知道同Amy行得咁埋肯定會引人誤會,所以自己系個位到唉聲嘆氣。
「唉......」啱啱阿輝推薦我個陣真系想仰天長屌,可惜個陣情況唔允許我咁做。
「你無事吖嘛,做乜系度嘆氣既?」Amy系隔黎位問我。
「無阿,我未做過班長,有好多嘢都未做過,所以咪唔知自己做唔做得黎咯。」我個樣好似死左老豆咁樣。
「其實我都系吖,咁我地一齊努力啦~」佢個笑容真系好甜。
系咪覺得班入面無學生會好奇怪?因為何sir已經一手包辦成個班會,財政康樂個啲嘢全部佢搞曬,所以我地學生都唔使點做嘢。


第一堂系最煩既中文科,如果你唔抄筆記既話基本上UT同考試都唔使旨意可以合格,所以中文堂我都好用心咁抄低啲重點。
「喂.....阿言......」有人扯左一扯我衫袖。
「我太耐無接觸過中文啦,你可唔可以解釋比我聽呢啲字點解ar?」佢皺住眉頭。


「無問題阿。」女神叫到我點會唔教呢。
之後個半堂我都詳細咁解釋比佢聽啲字既詞義,佢亦都好專心咁聽我講。
話咁快中文堂就完左,有一個20分鐘既小息,我準備出去補返今朝早唔記得食既早餐既時候,我發現Amy自己坐左系個位到望住一邊既女仔系到傾計,好似好想加入佢地既話題咁樣,但系又講唔出口。


跟住個幾堂系IT,由於我對呢啲嘢太熟悉,所以都唔使點去聽書,我決定左要幫Amy認識班上面既同學。
個兩堂IT堂我帶左一本簿仔上IT室,逐一寫低班上面我認識既人同佢地既嗜好同性格,睇完呢本簿仔就可以同班上面既同學算系有多啲交流。之後個個小息,我放左本簿系佢個櫃桶入面,等佢發現個陣攞黎睇。


之後系英文堂,佢系櫃桶揾書,之後見到本簿仔,佢望住簿仔入面既內容自己系度傻笑。


「阿言,本嘢你寫架?」佢誠懇咁望住我,搞到我唔夠膽直接同佢對望。
「系阿,我見你小息個陣見人傾計個樣幾羨慕人就知你唔知點識朋友啦,啱啱IT堂咪幫你寫曬佢地啲嘢落本簿到等你可以同佢地做到朋友咯。」
「唔....唔該你吖」佢塊面有少少紅。
「系啦一陣lunch帶你出去食好嘢啦,話左我請架嘛。」
「唔使啦...你都幫左我咁多,本簿仔都應該嗮你唔少時間啦....」佢塊面又紅左,搞到我超想去搣佢一下。
「一件事還一件事,一系下次你請返我食嘢咯~」


到左lunch,我帶佢去返我去開食飯既豐記。
「伙記唔該照舊!」午餐我一向食開呢度既椒鹽豬扒飯。


「伙記唔該照舊!」Amy跟住我系度叫。
「阿言你帶左個女朋友黎食嘢吖?呢餐我請你!兩個椒鹽扒飯兩杯凍奶茶少冰!」伙記系度落單。
「唔系吖唔系吖,我地同學黎架咋。」我向佢解釋。
「明啦明啦,朋友吖嘛。」伙記去左幫人落單。
我見到Amy坐埋一邊塊面超紅,紅到好似發燒咁樣,我問佢:「你無嘢啊嘛?塊面紅曬wor。」
「無嘢無嘢!我有少少熱姐。」佢用隻手系度潑風。
過左無幾耐,兩碟椒鹽豬扒飯送到我地張臺到。
「阿言,碟飯好好食吖!」Amy將椒鹽同啲飯放埋一齊食。
「梗系啦,無介紹錯呢?」我攞左杯奶茶飲。
「系吖系吖,下次我又要黎呢度食~」佢好似食上癮咁狂咁系度食。
「下次就唔應該系我帶你黎呢度啦,你應該同朋友一齊黎,唔系既話個本簿仔就嗮曬架啦。」
「哦.....咁好啦。」睇得出佢個樣有少少失望。


返到去學校之後,仲有一段時間午息先完,所以我鼓勵佢去加入其他同學既話題。


「去啦去啦。」我推住佢。
「得啦得啦唔使推我我自己去。」佢一步一步咁行去女同學個邊。
過左幾分鐘之後,佢睇黎已經同個邊既同學打成一片,我豎起左隻大拇指比佢,佢同樣回敬返同樣既動作比我。
「頭先多謝你吖阿言~」佢個樣笑到好燦爛。
「同佢地熟都系因為你自己肯去試,我只系幫你了解佢地姐。」
​自從呢次之後,我同Amy既關係變得越黎越好。


已有 0 人追稿