點解當初好挽唔挽要同女神挽同居: 第四章 受傷

一個星期就咁樣同Amy歡樂咁過去，雖然同自己班既男同學有唔少仇口，不過都已經唔重要，開心就得啦。
星期六我一如既往都系屋企宅住系度吸毒，我準備開新一局rank去屠人既時候，阿輝打電話比我。
「喂阿言？我地好耐無出黎打波啦wor，不如一齊出黎打返幾場街波？」的確我從暑假到開學都無乜點打過波。
「做咩咁好死無啦啦揾我打波吖？」我仲想繼續系屋企沖rank。
「屌，咁耐無打波個身就黎生銹啦，仲系屋企吸乜毒姐、系咪唔想比我屠姐？」佢超寸嘴，咁我都無理由拒絕佢。
「得，依家就即刻攞黎屠爆你個柒頭。」我回敬返佢。
過左5分鐘之後，我就換完衫落街打波。

去到我屋企樓下附近街場之後，已經見到有幾隊人系到鬥緊波，我同阿輝就行過去跟隊。
因為我帶波真系鬼死咁屎，所以我淨系系我平時45度角個鳩位等波射，結果都系贏唔少分。


我同阿輝足足由下午兩點鐘打到六點，天都差唔多黑，所以系球場隔離汽水機買完嘢飲就返歸。
行行下見到有個幾熟面口既女仔系度挽緊依家好興個啲滑板，個個就系Amy。
「咦個個咁熟面口既，系咪Amy？」睇黎阿輝都認得出系佢。
「你都覺得系阿？喂！Amy！」我叫佢。
「嗯？哎呀！！！」佢另轉左頭望我地跟住失平衡跌左落地下，哇真系見到都痛。
我即刻跑過去扶起佢，「唔好意思阿，我唔應該叫你架，你無事吖嘛？」我見佢隻左腳有個大傷口，仲流曬血。
「唔緊要啦，我無嘢.......」佢嘗試企起身但系左腳根本用唔到力所以差啲又跌低。
「咁既樣仲話無事！我孭你啦。」話曬都系因為我佢先整親，所以我決定要負返起個責任。
「喂阿言我阿媽啱啱打電話比我叫我快啲返屋企食飯所以走先啦拜拜~」阿輝講完之後用我識左佢咁耐都未見過既速度跑走。
「喂！楊志輝！你咪走啊！！！」佢已經跑出左我視線範圍。


「唔理佢啦，你上黎啦。」我比左個背隻叫Amy上黎。
「唔使啦....我無事。」佢仲系度死頂。
「上黎啦，隻腳流咁多血都仲話無事，我孭你返屋企搞掂你個傷口啦。」
「咁吖......好啦，麻煩你。」佢挨左上黎。


平時見佢有少少肉地，原來都幾輕，所以我都算系幾輕鬆。
「你屋企系邊吖？」我問佢。
「系XX花園。」佢答我。
「咦！原來你屋企系我隔黎個棟咋wor，點解平時唔見你既？」


「因為我屋企最近幾日先搞好個手續，所以最近先搬過黎。」唔怪得會系今日見到佢。
話咁快我就孭到佢屋企樓下，「你行唔行到阿？」我問佢。
「應該得既.....呃!」佢又差啲跌到，我又扶返佢起身。
「你屋企有無人幫你處理個傷口阿？」
「我屋企人都返曬工.....」佢依家咁既樣真系好慘。
「咁去我屋企啦，我幫你搞掂個傷口佢。」我繼續孭起佢。
「鉿，唔使啦，咁樣會煩到你，我自己ok架啦。」
「你依家咁既樣要我點信你，放心啦，我唔會食左你架wor。」


上到我屋企之後，我扶左Amy去張梳發個度坐。
「你系度坐陣先啦，我去攞紗布。」我同佢講。
我系櫃桶攞左啲醫療用品出黎，幫佢個傷口消毒然後再包紮。
「啊！好痛！」我塗左啲雙氧水落佢個傷口到。
「系咁架啦，忍耐下啦。」


過左一陣，我幫佢包紮完個傷口。
「應該無乜嘢架啦，記住小心啲。」我叮囑佢。
「嗯，我知啦。」佢個笑容又出返黎。
我送佢出去我大廈大堂門口。
「系呢，其實我識你咁耐都未有你電話wor。」佢系門口臨走個陣同我講。
我攞左佢部手機打比自己。「依家咪有咯，記得返去個陣小心啲。」我笑住咁同佢講。
「得啦得啦，咁勞氣架，好似做埋我阿媽咁，我會小心架啦，拜拜~」佢攞住佢塊滑板慢慢行左出去。


個晚臨訓個陣，我收到Amy個whatsapp。
「今日真系唔該曬你^_^」佢send左個笑哈哈emoji比我。
「小事黎架姐，我要訓啦，聽日見啦。」我send呢個whatsapp既時候，自己會心笑左出黎。
唔知點解我同Amy相處個陣真系好開心，個種感覺好奇怪。
呢個星期發生太多事啦，算啦訓先，哈啾！！！